وتان قورعاۋشىلار كۇنىنە وراي Showdown ۇستەل تەننيسىنەن مۇمكىندىگى شەكتەۋلى جاندار اراسىندا ارنايى تۋرنير وتۋدە, دەپ حابارلايدى astana-akshamy.kz
ەلوردادا مۇمكىندىگى شەكتەۋلى جاندار اراسىندا ەڭ ۇزدىكتەردى انىقتاۋ ماقساتىندا قالالىق سايىس باستاۋ الدى.
اتالعان تۋرنيردە 25 قاتىسۋشى ەرلەر جانە ايەلدەر ساناتى بويىنشا جۇلدەنى ساراپقا سالادى.
«1000 شاقىرىمدىق جول ءبىر قادامنان باستالادى دەمەكشى, 2022 جىلى وسى Showdown فەدەراتسياسىن العاش تىركەگەن ەدىك. ەندى, مىنە, وسى 23 ساۋىردە رەسمي رەەسترگە كىرگىزىلىپ, رەسمي تۇردە مويىندالدى. ءبىر جىلدان استام ۋاقىتتا قالالىق, رەسپۋبليكالىق دەڭگەيدەگى دودالاردى وتكىزدىك. وزگە وڭىرلەردە 16 فيليالىمىز اشىلدى. كىشى قادامدارىمىز ۇلكەن ماقساتقا اينالۋدا. بۇيىرسا, وسى باسەكەدە توپ-3-كە كىرگەن سپورتشىلار قازان ايىندا 2-مارتە وتكىزىلەتىن رەسپۋبليكالىق جارىسقا جولداما الادى. ءدال قازىرگى ساتتە استانادا وسى سپورت تۇرىمەن 50-گە جۋىق جان اينالىسادى. ماقسات – مۇمكىندىگى شەكتەۋلى جانداردىڭ ۇيدە وزدەرىن شەكتەمەي, قوعاممەن ارالاسىپ, ءوز پوتەنتسيالىن اشۋ. بۇيىرسا, تامىز ايىندا العاش رەت showdown جاقسى دامىعان بولگارياداعى حالىقارالىق جارىسقا جانە قاراشادا شۆەيتسارياعا جول تارتامىز. ستاتيستيكاعا نازار اۋدارساق, 2022 جىلى بۇل 19 ەلدە بولسا, قازىر 37-گە وسكەن. ياعني, بىزدە ءبىر ورىندا تۇرىپ قالماي, العا ۇمتىلامىز», – دەدى Showdown رەسپۋبليكالىق فەدەراتسياسىنىڭ پرەزيدەنتى ءجۇزباي سەرىكۇلى.
ايتا كەتەيىك, جارىس جەڭىمپازدارىنىڭ ەسىمدەرى بۇگىن بەلگىلى بولادى.
