مامىر ايىنىڭ العاشقى كۇندەرى بايقوڭىر اۋدانى بويىنشا بەلسەندى ۇزاق ءومىر ءسۇرۋ ورتالىعىندا سوعىس جانە تىل ارداگەرلەرىمەن كەزدەسۋ ءوتتى, دەپ حابارلايدى astana-akshamy.kz
ۇلى جەڭىس مەرەكەسىنە وراي وتكەن «ءاليا – سوعىس قۇربانى» اتتى ادەبي-تانىمدىق كەشكە قالا زەينەتكەرلەرى مەن ج. جاباەۆ اتىنداعى مەكتەپتىڭ وقۋشىلارى قاتىستى.
ادەبي-تانىمدىق كەش مەملەكەتتىك ءانۇراندى ورىنداۋمەن باستالىپ, جينالعاندارعا قازاقتىڭ باتىر قىزى – ءاليا مولداعۇلوۆانىڭ ەرلىك ىستەرى تۋرالى فيلمنەن ءۇزىندى كورسەتىلدى.
اتالعان كەشتىڭ قوناعى – استانا قالاسىندا تۇراتىن سوعىس ارداگەرى ابيدوللا ءاشىموۆ پەن تىل ەڭبەككەرى گريگوري شيشوۆ بولدى.
سوعىس جانە تىل ارداگەرلەرىمەن وتكەن كەزدەسۋ كەشىندە استانا قالاسىنىڭ قادىرلى زەينەتكەرى, ارداگەرلەر كەڭەسىنىڭ مۇشەسى قارشىعا كىشكەنتاەۆ «دوروگامي پوبەدى» اتتى كىتابىن ورتالىقتىڭ كىتاپحاناسىنا سىيعا تارتتى.
كەزدەسۋگە كەلگەن مەكتەپ وقۋشىلارى مايدانگەر اعالارىمىزدىڭ ەستەلىك اڭگىمەلەرىن تىڭداپ, ولاردىڭ ەرلىك ىستەرىن ۇلگى تۇتاتىنىن ايتتى.
«بۇگىنگى كەشتىڭ بالالار ءۇشىن تاربيەلىك ءمانى زور بولدى. وقۋشىلاردىڭ بويىنا وتانسۇيگىشتىك سەزىمدەرىن ۇيالاتۋ ءۇشىن زەينەتكەرلەر تاراپىنان وسى كەزدەسۋ كەشىن ۇيىمداستىرىپ وتىرمىز. ۇستازدارى دينارا قالدىبايقىزى باستاپ كەلگەن مەكتەپ ۇجىمىنا العىس بىلدىرەمىز. ەكى بۋىن وكىلدەرى اراسىندا ۇرپاقتار ساباقتاستىعىن جالعاستىرۋ ءۇشىن ءبىزدىڭ ورتالىققا باس سۇعىپ تۇرسا جاقسى بولار ەدى» – دەپ ءسوزىن تۇيىندەدى ورتالىقتىڭ مادەني ۇيىمداستىرۋشى باقىت بايمانوۆا.
مەكتەپتىڭ باستاۋىش سىنىپ وقۋشىسى ءامينا سەرجانقىزى م. ماقاتاەۆتىڭ «ءۇش باقىتىم» ولەڭىن مانەرلەپ وقىپ بەرسە, ونەرلى وقۋشىلاردىڭ ءبىرى نۇرالي اسقارۇلى «الاش اماناتى» كۇيىن ورىندادى.
ونەرپاز وقۋشىلارعا بەلسەندى ۇزاق ءومىر ءسۇرۋ ورتالىعىنىڭ ءتىل مامانى مارجان پىرىمبەتوۆا ءوزىنىڭ اۆتورلىق كىتابىن سىيعا تارتتى. كەزدەسۋ سونىڭدا قوناقتار مەن مەكتەپ وقۋشىلارى ەستەلىك سۋرەتكە ءتۇسىپ, ورتالىقتىڭ عيماراتىنا ساياحات جاسادى.
