«تازا قازاقستان. استانا – تازالىق پەن ءتارتىپتىڭ ۇلگىسى» ەكولوگيالىق اكتسياسى اياسىندا بايقوڭىر اۋدانىنىڭ ومىرلىك جاعدايى قيىن بالالاردى قولداۋ ورتالىعىنىڭ اۋماعىندا ءماسليحات دەپۋتاتتارىنىڭ قاتىسۋىمەن سانيتارلىق تازارتۋ جۇرگىزىلدى, دەپ حابارلايدى astana-akshamy.kz
ديرەكتوردىڭ مىندەتىن اتقارۋشى اياگوز نابيەۆا ارناۋلى الەۋمەتتىك قىزمەتتەرگە مۇقتاج بالالاردى قولداۋ ورتالىعىنا نەگىزىنەن جەتىم بالالار مەن اتا-اناسىنىڭ قامقورلىعىنسىز قالعان بالالار تۇسەتىنىن ايتتى.
«سونىمەن قاتار بىزگە زورلىق-زومبىلىق كورگەن بالالار, سونداي-اق دەۆيانتتى مىنەز-قۇلقى بار بالالار كەلەدى. بۇگىندە ورتالىقتا 70 ادام تىركەلگەن, ونىڭ 44-ءى تۇراقتى جانە 36-سى ۋاقىتشا تۇراتىندار. بۇل اتا-انالارى اتا-انا قۇقىعىنان ايىرىلعان بالالار جانە ورتالىقتا زاڭدى وكىلدەرى جوق ادامدار. بۇگىنگى سەنبىلىككە ءبىز قوناقتاردى-قالالىق ءماسليحات وكىلدەرىن شاقىردىق, ويتكەنى ولاردىڭ بالالارىمىزبەن بىرگە جاسىل جەلەكتەردى (قيار مەن قىزاناق كوشەتتەرىن) وتىرعىزۋعا جانە اۋماعىمىزدى جيناۋعا قاتىسقانىن قالايمىز. قالالىق ماسليحاتپەن بىرلەسكەن جۇمىس تۇراقتى نەگىزدە جۇرگىزىلىپ جاتقانىن اتاپ وتكىم كەلەدى», – دەدى اياگوز نابيەۆا.
VII جانە VIII سايلانعان قالالىق ءماسليحات دەپۋتاتى دينارا ورازالينا بىرنەشە جىل بويى ورتالىقتىڭ بارلىق ءىس-شارالارىنا قاتىساتىنىن ايتتى.
ء«بىز سەنبىلىكتەرگە عانا ەمەس, جاڭا جىل نەمەسە باسقا دا مەرەكە بولسىن, بارلىق مەرەكەلىك شارالارعا قاتىسامىز. ماعان بالالارعا كەلۋ, ولارعا كومەكتەسۋ ۇنايدى. بالالاردىڭ ءبارى جاقسى كۇتىمدى جانە كوڭىلدى, ويتكەنى ولارعا ورتالىق قىزمەتكەرلەرىنىڭ قولداۋى زور. دەمالىس كۇندەرى ولاردى تاماق پىسىرۋگە ۇيرەتەدى. ماماندىق بويىنشا مەن دارىگەرمىن جانە ءوزىم ءۇش بالانىڭ اناسىمىن, بىراق مۇندا قايتا-قايتا كەلۋدەن شارشامايمىن, ويتكەنى بالالاردىڭ قۋانىشتى جۇزدەرىن كورۋ مەن ءۇشىن عانيبەت», – دەپ تۇيىندەدى دەپۋتات.
