ەڭبەگى ەرەن جاۋىنگەر
ادام ومىرىنە اراشا ءتۇسىپ, جالىنداعان ءتىلسىز جاۋمەن كۇرەستە توتەنشە جاعدايلار قىزمەتكەرلەرىنىڭ ەڭبەگى ەرەن. قۇتقارۋشىلاردىڭ قىزمەتى قاشان دا قاۋىپ-قاتەرگە تولى. سوعان قاراماستان ادال ەڭبەك يەلەرى كۇن سايىن توسىننان تۋىندايتىن قىزىل جالىنمەن بەتپە-بەت كەلىپ, ءتىلسىز جاۋدىڭ «ءتىلىن تابۋعا» تىرىسادى. ناعىز ەر-ازاماتتارعا, جۇرەكتىلەرگە عانا ءتان ماماندىقتى تاڭداعانداردىڭ بىرەگەيى – ەرنار يسكاكوۆ. ول 2013 جىلدىڭ قاراشا ايىنان باستاپ نۇر-سۇلتان قالالىق تجد مامانداندىرىلعان ءورت ءسوندىرۋ بولىمىندە اعا ينجەنەر بولىپ جۇمىس ىستەيدى.
«ءورت ءسوندىرۋشى بولۋدى بالا كەزىمنەن ارماندادىم. مەن بۇل ماماندىقتى ادامدارعا كومەكتەسۋ, جاقسىلىق جاساۋ ءۇشىن تاڭدادىم. ءورت ءسوندىرۋشى جان-جاقتى بولۋى كەرەك. سپورتشى ءارى ءوز ءىسىنىڭ شەبەرى بولۋى كەرەك. بۇل ماماندىق ۇلكەن جاۋاپكەرشىلىكتى قاجەت ەتەدى. جاۋىنگەرلىك كەزەكشىلىك تاڭعى 8-دەن باستالادى. 8:15-تە ساپتىق تۇزەۋ جۇرگىزىلەدى, سودان كەيىن ءورت تەحنيكاسىن قابىلداۋ, قۇجاتتاردى قابىلداۋ ءىسى جۇرگىزىلەدى. ساباقتار 9:30-دان 12:00-گە دەيىن وتكىزىلەدى. 12:00-دەن 13:00-گە دەيىن نورماتيۆتىك جاتتىعۋلار ورىندالادى. ءورت ءسوندىرۋشىنىڭ تولىق كيىمى جاۋىنگەرلىك كيىم مەن «draegen» تىنىس الۋ اپپاراتىنان تۇرادى. ءبىز تۇتىننەن قورعانۋ ءۇشىن وسى اپپاراتتى كيەمىز. ءورت كەزىندە دەنەسىن كۇيىك شالىپ نەمەسە و دۇنيەلىك بولعان جانداردى كوزبەن كورۋ وتە قيىن. مۇلىك, قۇجاتتارىنان ايىرىلۋ ونىڭ الدىندا تۇك ەمەس. ەلدە جۇرەكتى اۋىرتار وقىس وقيعالار بولماسا دەپ تىلەيمىن» دەيدى ە.يسكاكوۆ.