ەڭبەك جولىن بىلتىر عانا №10 قالالىق ەمحانادا باستاعان دارىگەر نازەركە مۇراتوۆا – كوروناۆيرۋسپەن كۇرەستە اسا اۋىر حالدەگى ناۋقاستاردى ەمدەۋگە جۇمىلدىرىلعان جاس مامان. شىعىستان ارمان قۋىپ ەلورداعا كەلگەن قىزدىڭ استانا مەديتسينا ۋنيۆەرسيتەتىندە 7 جىل وقىعان ەڭبەگى بوسقا كەتپەدى. ول ەلدە ىندەت باستالعاندا ءوز ەركىمەن قالالىق فتيزيوپۋلمونولوگيالىق ورتالىققا اۋىسىپ, 6 ناۋرىزدان 24 تامىزعا دەيىن – 5,5 اي بويىنا جاعدايى اۋىر جانداردىڭ جانىن ساقتاپ قالۋ ءۇشىن كۇرەستى.
جاس مامان ەلوردادا اۋىر ىندەتپەن العى شەپتە كۇرەسۋگە بەل شەشە كىرىسكەنىن الىستاعى اناسى مەن تۋىستارىنىڭ ۋايىمدايتىندارىن ءبىلىپ, ءۇش ايعا دەيىن ايتپادى. ال ءوزى ەلگە ۆيرۋس ينفەكتسياسى جەتىپ, ىندەت تاراعاندا ەش قورىقپاستان وقشاۋلانعان ەمدەۋ ورنىندا جۇمىس ىستەۋگە بىردەن كەلىسىمىن بەرگەن. سەبەبى مەديتسينا قىزمەتكەرلەرى قورعانىش قۇرالدارىمەن قامتاماسىز ەتىلىپ, ورتالىق ىشىندە ساقتىق شارالارى تولىق ساقتالعان ەدى.
– مۇندا جۇمىس ىستەۋ وڭاي بولدى دەي المايمىن. ويتكەنى ءبىز اۋىر جانە اسا اۋىر حالدەگى پاتسيەنتتەردى قابىلدادىق. قانشاما ادام دەرتتى جەڭە الماي كوز جۇمدى. 2 ايدان كەيىن ينتەنسيۆتى تەراپيادا جۇمىس ىستەي باستادىم. ونداعى ناۋقاستاردىڭ جاعدايى وتە اۋىر بولدى. پاتسيەنتتەردە, اسىرەسە, پسيحولوگيالىق كۇيزەلىس كۇشتى, ءولىپ قالامىز با دەگەن قورقىنىشپەن بىردەن بايبالام سالاتىندار كوپ كەزدەستى. تۇسكەن ساتتە ولاردان اناليز الىپ, زەرتحانالىق ينسترۋمەنتالدى زەرتتەۋ جۇرگىزدىك. كۇن سايىن سيمپتوماتيكالىق ەم تاعايىنداپ وتىردىق. اۋىر حالدەگى پاتسيەنتتەردە قوسىمشا سوزىلمالى اۋرۋلار بولدى. ولارعا ۆيبرولانگپەن ماسساج جاساۋعا بولمايتىن ەدى. سوندىقتان ناۋقاستارعا مەدبيكەلەردەن بولەك, ءوزىمىز دە درەناجدى ماسساج جاسايتىنبىز. 90-نان اسقان شاعىندا ىندەتكە ىلىككەن كەيبىر اتا-اجەلەردىڭ ءوزى ساۋىعىپ كەتتى. ەمدەلىپ شىققاندا ءبىزدىڭ قۋانىشىمىزدا شەك بولمايتىن, سونى زور جەتىستىك ساناپ, توبەمىز كوككە جەتكەندەي سەزىمدە بولدىق, – دەيدى نازەركە دارىگەر.
پاتسيەنتتەردىڭ تاعى ءبىر قورقىنىشى – ولار وكسيگەنوتەراپيادا جاساندى دەم الۋ اپپاراتتارىنا قوسىلعاندىقتان, سول وتتەگىگە ءتاۋەلدى بولىپ قالامىز با دەپ قاۋىپتەنۋى ەدى. دارىگەرلەر سوندىقتان كۇن سايىن وتتەگى بەرۋدى از-ازدان, بىرتىندەپ ازايتىپ وتىرعان. ءسويتىپ پسيحولوگيالىق جانە فيزيكالىق تۇرعىدا ولاردىڭ جايلاپ جاساندى دەم الۋعا تاۋەلدىلىك دەڭگەيىن تومەندەتكەن.
جەر شارىنا توسىننان كەلگەن قاۋىپتى دەرتپەن كۇرەس دارىگەرلەر ءۇشىن ءارى سىناق, ءارى زور تاجىريبە بولدى. سەبەبى وكپەسىنىڭ باسىم بولىگى زاقىمدانعان ناۋقاستاردى سونداي قيىن جاعدايدان شىعارىپ الۋ وڭاي ەمەس ەدى. بىراق بۇل اق حالاتتىلاردىڭ قولىنان كەلدى. ونىڭ ۇستىنە نازەركە سياقتى اسا اۋىر حالدەگى ناۋقاستاردى ەمدەگەن ماماندار پاتسيەنتتەردىڭ قانت ديابەتى, ارتەريالدى گيپەرتونيا سياقتى قوسالقى اۋرۋلارىنىڭ دا اسقىنباۋى ءۇشىن بار كۇشىن سالدى.
– باسىندا 2 اپتا تۋبديسپانسەردە تۇردىق. قاتاڭ ءتارتىپتى رەجيمدە جاتتىق, ءتىپتى سىرتتان زات الىپ بەرىپ جىبەرۋ قيىن ەدى. سوسىن ءبىزدى Hilton قوناقۇيىنە كوشىردى. جۇمىسقا اپاراتىن ارنايى اۆتوبۋستار ءبولىندى. ول جەردە تاعى 2 اي تۇردىق. العاشقى كارانتين الىنىپ تاستالعان سوڭ Ramada Plaza قوناقۇيىنە ورنالاستىردى. وندا 1 اي تۇرعاننان كەيىن پاندەميا شارىقتاۋ شەگىنە جەتكەن كەزدە پاتسيەنتتەر كوبەيىپ كەتتى. بۇل قوناقۇيدى پروۆيزورلىق ورتالىق ەتىپ اشتى دا, ءبىز قر دسم رۇقساتىمەن ۇيىمىزدەن قاتىنايتىن بولدىق, – دەيدى دارىگەر.
قازىر بارلىعىمىزدى كوروناۆيرۋستىڭ ەكىنشى تولقىنى تۋرالى دەرەكتەر قىزىقتىرادى. سوندىقتان دارىگەرمەن تىلدەسسەك, دەرەۋ سونى سۇرايمىز. ەمحانادا جۇمىس ىستەگەن كەزدەگى ءوز تاجىريبەسىنە سۇيەنە وتىرىپ جاس دارىگەردىڭ ايتقانى, ادەتتە كۇزدە ستاتيستيكا بويىنشا بالالار اراسىندا تۇماۋ كوبەيەدى. تۇماۋ كەيدە پنەۆمونياعا ۇلاسىپ جاتادى. سول سەبەپتى دە ىندەتتىڭ ەكىنشى تولقىنى بالالارعا قاتىستى بولۋى مۇمكىن دەگەن ازىرگە بولجام عانا. بۇل رەتتە دە دارىگەرلەر قورقىنىشقا بوي الدىرماي, پروفيلاكتيكالىق شارالاردى كۇشەيتۋگە كوڭىل ءبولۋ كەرەك دەيدى.
نازەركەنىڭ ىندەتپەن كۇرەسۋىنە ونىڭ ستاتسيوناردا جۇمىس ىستەۋگە دەگەن قىزىعۋشىلىعى دا سەبەپ بولعان. 5 جىل باكالاۆريات, 2 جىل ينتەرناتۋرادا وقىدى. 1 جىل جۇمىس ىستەدى. بيىل ول گرانتپەن رەزيدەنتۋراعا تاپسىردى. ەندى ەكى جىل وقىپ, سونى بىتىرگەن سوڭ بولاشاقتا وتباسىلىق مەديتسينا بويىنشا ستاتسيوناردا جۇمىس ىستەگىسى كەلەدى. ءسويتىپ مەكتەپ قابىرعاسىندا 9-سىنىپتا جۇرگەندە پايدا بولعان بالا ارمانىن تولىقتاي جۇزەگە اسىرماق.
