قر پارلامەنتى سەناتىنىڭ دەپۋتاتى اقىلبەك كۇرىشباەۆ «جانۇيا» وتباسى ينستيتۋتىن قولداۋ ورتالىعىندا ەرەكشە قاجەتتىلىگى بار بالالار ماسەلەلەرى بويىنشا ۇيىم وكىلدەرىمەن كەزدەسۋ وتكىزدى. جيىنعا قالالىق ىشكى ساياسات باسقارماسىنىڭ باسشىسى داۋرەن بابامۇراتوۆ جانە نۇر-سۇلتان قالاسى جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى ساۋلە نۇرعوجينا دا قاتىستى.
سەناتورلاردىڭ ايماقتارعا شىعىپ, حالىقپەن كەزدەسۋدى باستاعانىن مالىمدەگەن ا.كۇرىشباەۆ ەلوردادا الدىمەن ەرەكشە قاجەتتىلىگى بار بالالار ماسەلەلەرىنە نازار اۋدارعاندى ءجون كورگەن. ونىڭ ايتۋىنشا, قازىرگى تاڭدا باس قالادا وسىنداي بەس جارىم مىڭ بالا بار. ولاردىڭ ءبىلىم الۋى جانە تۇرعىن ۇيمەن قامتىلۋى – قازىرگى تاڭدا ەڭ وزەكتى ماسەلە. كەزدەسۋگە قاتىسۋشىلاردىڭ ءبىرى «Strong mothers» قق باسشىسى رايگۇل سەرىكباەۆا 5-6 بالالى وتباسىلاردىڭ جوو-دا اقىلى ءبىلىم الاتىن 2 بالاسى بولسا, سونىڭ بىرەۋىنە بولسا دا گرانت الىپ بەرۋ تۋرالى ۇسىنىس ايتتى.
– ولارعا ارنايى كومەك كەرەك, مەملەكەت بۇعان نازار اۋدارۋى قاجەت. كوپتەگەن ماسەلەلەر كوتەرىلدى, سونىڭ ىشىندە ولاردىڭ تۇرعىن ۇيمەن قامتىلۋى, ورتا كاسىپتىك نەمەسە جوعارى ءبىلىم الۋى بويىنشا زاڭدار وزگەرىستەر ەنگىزۋدى قاجەت ەتەدى. مۇنداي بالالار مەكتەپتە وقىعانمەن, كوبىنە كوللەدج, ۋنيۆەرسيتەتتەرگە وقۋعا تۇسە الماي قالادى. سەبەبى ءبىلىم بەرۋ ورىندارىندا ولارعا تەحنيكالىق جاعداي جاسالماعان, ارنايى پەداگوگتار دا جوقتىڭ قاسى. سول سەبەپتى كوپتەگەن دارىندى بالالار وقۋعا تۇسەم دەسە دە تۇسە الماي ءجۇر. ەلىمىزدىڭ بولاشاق ازاماتى رەتىندە ولار دا ماماندىق الماسا, ەرتەڭگى كۇندە جاعدايى قالاي بولادى؟ وسى رەتتە ءبىز جۇيەلى شەشىمدەر قابىلداۋىمىز قاجەت. وسى ماسەلەلەردىڭ بىرقاتارىن وزىمە ءتۇرتىپ الدىم, ولاردىڭ كەيبىرىن بۇرىننان دا كوتەرىپ ءجۇرمىن, ءارى قاراي دا شەشىلگەنشە جۇمىس جۇرگىزەمىن, – دەدى سەنات دەپۋتاتى.
سونىمەن قاتار بۇل كەزدەسۋدە ەرەكشە قاجەتتىلىگى بار بالالاردى تاربيەلەپ وتىرعان وتباسىلارعا «مۇگەدەك بالاسى بار نەمەسە سونداي بالا تاربيەلەپ وتىرعان وتباسى» مارتەبەسىن بەرىپ, ولارعا زاڭدىق تۇرعىدا بەكىتىلگەن بارلىق مەملەكەتتىك جەڭىلدىكتەردى ۇسىنۋ, كەيىننەن ساتىپ الۋ قۇقىعىمەن ءۇي جالعا بەرۋ ماسەلەلەرى ءسوز بولدى. مۇگەدەك بالا تاربيەلەپ وتىرعان وتباسىلاردى بولەك ساناتقا جاتقىزۋ قاجەتتىلىگى ايتىلدى, سەبەبى قازىرگى تاڭدا وسىنداي وتباسىلار باسپانا كەزەگىندە ون جىلداپ تۇرادى. 5 جىل بويى جەرگىلىكتى بيۋدجەت ەسەبىنەن كەيىننەن ساتىپ الۋ قۇقىعىمەن ءۇي جالداۋ اقىسىن تولەۋ ءۇشىن تابىسى ەڭ تومەنگى كۇنكورىس دەڭگەيىنەن تومەن وتباسىلارعا اي سايىن 90 مىڭ تەڭگە سۋبسيديا ءبولۋ, يپوتەكالىق نەسيەسىن تولەۋگە تۇرعىن ءۇي تولەمدەرىن وتەۋ مەحانيزمدەرىن جاساپ شىعارۋ, بالانىڭ دياگنوزى قانداي بولعانىنا قاراماستان اتا-اناسىنىڭ ءبىرىن 50 جاستا زەينەتكە شىعارۋ ماسەلەسى دە كوتەرىلدى. وسىنداي وتباسىلارداعى اتا-انانىڭ بىرىنە جالاقىنىڭ ەڭ تومەنگى مولشەرىنىڭ 19 پايىزى كولەمىندە زەينەتاقى اۋدارىمىن تولەۋ, مەنتالدى اۋىتقۋشىلىعى بار بالالاردى وڭالتۋ بويىنشا قىزمەتتەر سانىن كوبەيتۋ, بالالاردى جالپى ءبىلىم بەرەتىن جۇيەگە تارتۋ ءۇشىن تيۋتورلار سانىن ارتتىرۋ جايى دا قارالدى. سونداي-اق مەنتالدى اۋىتقۋشىلىعى بار بالالارمەن جۇمىس جۇرگىزەتىن ماماندار دايىنداۋعا گرانت سانىن كوبەيتۋ, مەملەكەت ەسەبىنەن اۆۆا ماماندارىن وقىتۋ, اۋتيزمگە شالدىققان بالالار ءۇشىن ساناتوريالىق-كۋرورتتىق ەمدەۋ جولدارىن ۇسىنۋ, ينۆا-تاكسي قىزمەتىن دامىتۋ, 2-توپتاعى مەنتالدى اۋىتقۋشىلىعى بار بالالاردى 18 جاسقا تولعاننان كەيىن كۇتىپ, باپتاۋعا جاردەماقى تاعايىنداۋ جايى دا نازاردان تىس قالمادى.
