باس قالادا ەرەكشە قاجەتتىلىگى بار بالالاردى تاربيەلەپ وتىرعان وتباسىلار ءۇشىن «باقىتتى شاڭىراق» ورتالىعى اشىلدى. ورتالىقتىڭ ەرەكشەلىگى – مۇمكىندىگى شەكتەۋلى بالالارعا عانا ەمەس, ولاردىڭ انالارىنا دا قاجەت كومەك كورسەتىلەدى. بۇل تۋرالى ەلوردا اكىمى التاي كولگىنوۆ ءمالىم ەتتى.
مۇندا ەرەكشە بالالاردىڭ انالارىنا قايتا ءبىلىم الۋ, بىلىكتىلىگىن ارتتىرۋ كۋرسىنان ءوتۋ, جۇمىسقا ورنالاسۋ بويىنشا جاردەم بەرىلەدى. سول سياقتى پسيحولوگيالىق كومەك تە كورسەتىلەدى. «باقىتتى شاڭىراق» ورتالىعى مۇمكىندىگى شەكتەۋلى 600-دەن استام بالانى قامتيدى. ورتالىق ر.قوشقارباەۆ داڭعىلى, 60 مەكەنجايىندا ورنالاسقان.
«مەملەكەت باسشىسىنىڭ تاپسىرماسى بويىنشا ەرەكشە قاجەتتىلىگى بار بالالارعا جان-جاقتى جاعداي جاساۋ ماسەلەسىنە ەرەكشە كوڭىل بولىنەدى. وسىلايشا ەلوردادا 15-تەن استام ورتالىق اشىلدى, ولار 4 مىڭعا جۋىق مۇمكىندىگى شەكتەۋلى بالانى قامتىدى. ماسەلەن, وسىعان دەيىن «اسىل ميراس», «وردا», «بالام-اي» وڭالتۋ ورتالىقتارى, سول سياقتى №1 قالالىق بالالار اۋرۋحاناسى بازاسىندا «قامقورلىق» وڭالتۋ ورتالىعى اشىلدى. ولار بتسپ, اۋتيزم, داۋن سيندرومى جانە جۇرەك تالماسى سەكىلدى دياگنوزى بار بالالاردى وڭالتۋمەن اينالىسادى.سونداي-اق بىلىكتىلىكتى ارتتىرۋ جانە جۇمىسقا ورنالاستىرۋ ماسەلەسىنە ارنالعان ورتالىقتار, بەلسەندى ۇزاق ءومىر ءسۇرۋ ورتالىعى (ارداگەرلەر ءۇيى), الەۋمەتتىك ورتالىقتار («جانۇيا» وتباسى ينستيتۋتىن قولداۋ ورتالىعى), كورۋ قابىلەتى بۇزىلعان بالالارعا ارنالعان مامانداندىرىلعان بالاباقشا (سارىارقا اۋدانى, كەنەسارى كوشەسى, 9/1) اشىلدى» دەدى ەلوردا اكىمى.
