ناۋرىزناما ونكۇندىگى اياسىندا سەنات توراعاسى ماۋلەن اشىمباەۆ باستاعان ءبىر توپ دەپۋتات ەلورداداعى ەرەكشە قاجەتتىلىگى بار بالالارعا ارنالعان وڭالتۋ ورتالىعىنىڭ قىزمەتكەرلەرىمەن جانە ەمدەلۋشىلەرىمەن كەزدەستى. ماۋلەن اشىمباەۆ ءوز سوزىندە اتالعان ورتالىقتىڭ بىرنەشە جىلدان بەرى ەرەكشە قاجەتتىلىكتەرى بار بالالاردى دامىتۋ جانە ينكليۋزيۆتى قوعام قالىپتاستىرۋ جولىندا بەلسەندى جۇمىس ىستەپ كەلە جاتقانىنا نازار اۋداردى.
«قازىرگى تاڭدا ەلىمىزدە مۇمكىندىگى شەكتەۋلى جاندارعا قولداۋ كورسەتۋ, ولاردى الەۋمەتتىك قورعاۋ باعىتىندا كەشەندى جۇمىس جۇرگىزىلىپ كەلەدى. كەدەرگىسىز, ينكليۋزيۆتى ورتا قالىپتاستىرۋ – مەملەكەتىمىزدىڭ الدىندا تۇرعان ماڭىزدى مىندەتتىڭ ءبىرى. سەنات مۇگەدەك ازاماتتاردىڭ قۇقىعىن قورعاۋدى كۇشەيتۋ جانە تۇرمىس ساپاسىن جاقسارتۋ سالاسىندا ءتيىستى ءىس-شارالار قابىلداۋدا» دەدى م.اشىمباەۆ.
كەزدەسۋ بارىسىندا سەناتورلار ەستۋ, سويلەۋ, كورۋ, اۋتيزم سپەكترى جانە باسقا دا اۋىتقۋى بار بالالاردى وقىتۋدىڭ ارنايى جوبالارىمەن جانە مامانداندىرىلعان ادىستەمەسىمەن تانىستى. ورتالىق باسشىلىعىنىڭ ايتۋىنشا, قازىرگى تاڭدا بۇل جەردە 200 بالا جانە پسيحونەۆرولوگيالىق
پاتولوگياسى بار 42 ەرەسەك ادام ەسەپتە تۇر. مەكەمەنىڭ نەگىزگى مىندەتىنىڭ ءبىرى – بەلسەندى ومىرلىك پوزيتسيا مەن بالالاردىڭ وزىنە-ءوزى كومەكتەسۋ داعدىلارىن قالىپتاستىرۋ جانە ولاردىڭ جان-جاقتى دامۋىنا ىقپال ەتۋ. وسىعان بايلانىستى ەستۋ قابىلەتى بۇزىلعان 20-عا جۋىق ادام, ودان بولەك, ەرەكشە قاجەتتىلىگى بار بالا تاربيەلەپ وتىرعان اتا-انالاردىڭ وزدەرى ورتالىقتا اسپاز, تاربيەشىنىڭ كومەكشىسى بولىپ ەڭبەك ەتەدى. بۇل الەۋمەتتىك بەيىمدەلۋ مەن دامۋ ءۇشىن قولايلى اتموسفەرا قالىپتاستىرۋعا ىقپال ەتەدى.
ورتالىق ۇجىمىن جانە تاربيەلەنۋشىلەرىن ناۋرىز مەيرامىمەن قۇتتىقتاعان ماۋلەن اشىمباەۆ مەملەكەت باسشىسىنىڭ باستاماسىمەن بيىل اتالعان مەرەكە «ناۋرىزناما-2024» تۇجىرىمداماسى اياسىندا جاڭا فورماتتا اتالىپ ءوتىپ جاتقانىن ايتتى. مۇنداي قادام ۇلتتىق بىرەگەيلىكتى نىعايتۋدى كوزدەيدى.
