ەلوردا ۆولونتەرلەرى حالىقارالىق ەرىكتىلەر كۇنىن اتاپ ءوتتى. باس قالادا قازىر 25-تەن استام ەرىكتىلەر قوزعالىسى بار. ولارعا 14 مىڭنان اسا ادام بەلسەندى تۇردە قاتىسادى. قالالىق شتابتىڭ وزىندە 2,5 مىڭنان استام ەرىكتى تىركەلگەن. ولاردىڭ 500-ءى – الەۋمەتتىك, ەكولوگيالىق جانە باسقا شارالارعا ۇزدىكسىز قاتىسادى.
اسىرەسە, توتەنشە جاعداي جاريالانعاندا, پاندەميا كەزىندە ەرىكتىلەر بەلسەندى تۇردە قىزمەت ەتتى. قازىرگى ۋاقىتتا ۆولونتەر بولعىسى كەلەتىن ازاماتتار سانىنىڭ ءوسۋى بايقالادى. بيىلعى قىركۇيەكتەن باستاپ قالالىق شتابتىڭ ەرىكتىلەر مەكتەبىندە 300 ادام وقىتىلدى.
«ەگەر بۇرىن ۆولونتەرلەر قاتارىندا نەگىزىنەن جاستار بولسا, كوكتەمدە پاندەميا باستالعاندا بىزگە كوپتەگەن ورتا جاستاعى ازاماتتار دا قوسىلدى. بىراق اعا ۇرپاق بۇرىن قالانىڭ قوعامدىق ومىرىنە قاتىسپادى دەگەن ءسوز ەمەس. ولار نەگىزىنەن قايىرىمدىلىق جۇمىستارىمەن اينالىسقان» دەپ اتاپ ءوتتى «استانا جاستارى» جاستار رەسۋرستىق ورتالىعى.
ەلوردالىق ەرىكتىلەر شتابى ءارتۇرلى باعىتتا جۇمىس ىستەيدى. مىسالى, «قامقورلىق مەكەنجايلارى» جوباسى اياسىندا جىگىتتەر جالعىزباستى زەينەتكەرلەر مەن ارداگەرلەرگە اۋلالاردى قاردان, پاتەرلەر مەن اۋماقتى تۇرمىستىق قالدىقتاردان تازارتۋدا, كوكونىس باقتارىن وتىرعىزۋعا دايىنداۋدا كومەكتەسەدى.
قازاقستان رەسپۋبليكاسى تاۋەلسىزدىگىنىڭ 30 جىلدىعى قارساڭىندا «30 يگى ءىس» شاراسىنا «استانا جاستارى» جاستار رەسۋرستىق ورتالىعى ەرىكتىلەرى دە قوسىلدى. شارا شەڭبەرىندە ولار مۇقتاج وتباسىلارعا كومىر تاسىمالداۋعا كومەكتەسەدى, پاندەميانىڭ الدىن الۋ ءۇشىن ماسكالار تاراتادى, ۇيلەردى جوندەۋگە جاردەمدەسەدى, ال زەينەت جاسىنداعى ادامدارعا قىستا وتىن دايىندايدى.
