جەر بەتىندە ادام سانى ارتقان سايىن ادامگەرشىلىك تە ازايىپ بارا جاتقانداي. ىندەتتىڭ شىرماۋىنان شىعا الماي, مەيىرىم مەن ماحابباتقا مۇقتاجدىق ارتقان تۇستا جانىڭداعىعا جاي عانا ىزەت كورسەتۋدىڭ ءوزى يگى ءىس سانالدى. ودان بۇرىن بۇگىنگى نارىق زامانىندا ادامي قاسيەتتەر ارتتا قالىپ, پەيىلى تارىلعانداردىڭ كوبەيگەنىن ەشكىم جوققا شىعارماس. بىراق ارامىزدا ەرىككەننەن ەمەس, ءوز ەركىمەن قينالعاننىڭ قولتىعىنان دەمەپ, اۋىرتپالىعىن بىرگە ارقالايتىن ازاماتتار بار. ولار – ەڭبەگى ەرەن ەرىكتىلەر.
وتكەن جىلدىڭ مامىر ايىندا قوستانايدا وتكەن قازاقستان-رەسەي جاستارىنىڭ فورۋمىندا «ۇلتتىق ەرىكتىلەر جەلىسى» ۇيىمىنىڭ ءتورايىمى ۆەرا كيم 2020 جىلدى ەرىكتىلەر جىلى دەپ جاريالاۋدى ۇسىندى. مەملەكەت باسشىسى قاسىم-جومارت توقاەۆ قايىرىمدىلىقتىڭ قادىرىن اسپەتتەپ, وسىدان ون ەكى اي بۇرىن ەرىكتىلەر جىلىن جاريالادى. بۇل ون ەكى اي وڭايعا سوقپادى.
جىل باسىنان ارىستاعى جاعداي, ماقتاارالداعى سۋ تاسقىنى, پاندەميامەن كۇرەستە ۆولونتەرلەردىڭ ەڭبەگى وراسان. نەگىزگى جۇمىس «Birgemiz» جالپىۇلتتىق جوباسى شەڭبەرىندە كوزدەلگەن 7 باعىت – «Sabaqtastyq», «Saýlyq», «Taza álem», «Asyl mura», «Qamqor», «Umit», «Bilim» جوبالارى بويىنشا جۇزەگە اسىرىلدى. 17 وڭىرلىك ينفراقۇرىلىمنان تۇراتىن رەسپۋبليكالىق ۆولونتەرلەر فرونت-كەڭسەسى اشىلدى.
ءتاجۆيرۋس بەلەڭ الىپ, الەمدى الاڭداتقان الاساپىران شاقتا ەرىكتىلەر شاھارداعى بلوكبەكەتتەردە قالاعا كەلىپ جاتقان ءاربىر ازاماتقا ساقتىق شارالارىن ءتۇسىندىرىپ, بەتپەردەلەر تاراتتى. ونسىز دا جۇمىسى جەڭىل ەمەس ەرىكتىلەرگە قاۋىپ پەن جاۋاپكەرشىلىك جۇگى ارتىلدى. سانداردى سويلەتسەك, پاندەميامەن كۇرەسكە 500 مىڭنان اسا ەرىكتى اتسالىسقان ەكەن. 63 مىڭنان استام ازىق-تۇلىك جيىنتىعى, 4,4 ميلليون مەديتسينالىق بەتپەردە تاراتىلدى, 1 ملن ادامعا كومەك كورسەتىلگەن.
بۇگىنگى تاڭدا ەلىمىزدە ۆولونتەرلەردىڭ باسىن بىرىكتىرىپ, قوعام ءۇشىن تەگىن قىزمەت ەتىپ جاتقان بىرنەشە ۇكىمەتتىك ەمەس ۇيىم بار. جىل باسىندا مۇنداي ۇيىم سانى 224 بولسا, قازىر رەسمي مالىمەت بويىنشا 500-دەن اسادى. حالىقتىڭ قوعامدىق جۇمىستارعا ەرىكتى تۇردە ارالاسۋ بەلسەندىلىگى ارتىپ كەلەدى. وسى ۇيىمدارمەن جۇمىس ىستەيتىن ۆولونتەرلەر 30 مىڭنان 95 مىڭعا جەتىپ وتىر. جىل باسىندا جوسپارلانعان ۆولونتەرلىككە 50 مىڭ ادامدى تارتۋ بولجامىنان اسىپ تۇسكەن. 1 جىلدا جالپىۇلتتىق جوبالار اياسىندا 7 باعىت بويىنشا 18 قولداۋ ورتالىعى, 6 مىڭ دايىندىق ورتالىعى اشىلدى. وسى ۋاقىت ارالىعىندا 2 مىڭنان اسا شارا ءوتتى.
سونىمەن قاتار Qazvolunteer.kz ونلاين پلاتفورماسى ىسكە قوسىلدى, وندا 42603 ۆولونتەر, 3063 ۇيىم جانە 977 جوبا تىركەلگەن. 5600-دەن استام ۆولونتەر ارنايى وقۋدان ءوتىپ, 50 باستاماشىل توپ قۇرىلدى. جالپى قۇنى 150 ميلليون تەڭگەنى قۇرايتىن 500-دەن استام شاعىن گرانت ۇلەستىرىلدى. پاندەميامەن كۇرەسكە قوسقان ۇلەسى ءۇشىن ەلىمىزدىڭ 5 مىڭعا جۋىق ازاماتى «حالىق العىسى» ارنايى مەدالىمەن ماراپاتتالدى. «جىل ۆولونتەرى» حالىقارالىق سىيلىعى تاعايىندالدى. 7 وتانداسىمىز بۇۇ ەرىكتىلەر توبىنا قوسىلۋعا مۇمكىندىك الدى. ولاردىڭ 4-ەۋى تۇركيادا, ءبىرى يوردانيادا, قالعان ەكەۋى كەنيا جانە تايلاند ەلدەرىمەن كارانتيندىك شەكتەۋگە بايلانىستى ونلاين فورماتتا جۇمىس اتقارۋدا.
ءدال وسى جىلى ەلىمىزدە قوعامدىق باقىلاۋشى جانە ەكولوۆولونتەر دەگەن تەرميندەر پايدا بولدى. بەلسەندى جاستار ەكولوگيا باعىتىندا ءبىراز ءىستىڭ باسىن قايىردى. ەكومادەنيەتتى ناسيحاتتايتىنداردىڭ قاتارى كوبەيدى. ال رەسپۋبليكا كولەمىندە 10 مىڭ ۆولونتەردىڭ قاتىسۋىمەن 75-تەن اسا ەكواكتسيا ۇيىمداستىرىلىپتى.
مەملەكەت باسشىسى ەرىكتىلەر جىلىنىڭ رەسمي جابىلۋىندا بارلىق ءبىلىم بەرۋ مەكەمەلەرىندە ەرىكتىلىكتى دارىپتەپ, قايىرىمدىلىق تۋرالى تاقىرىپتىق ساباقتار مەن فاكۋلتاتيۆتىك ساعاتتار ەنگىزۋدى ۇسىندى. الداعى ۋاقىتتا جاڭا ۆولونتەرلىك ۇيىمدار اياققا تۇرىپ كەتۋى ءۇشىن جەڭىلدەتىلگەن نەسيە بەرىلەدى. سونداي-اق بيزنەس وكىلدەرى مەن جەكە تۇلعالاردى قايىرىمدىلىق جوبالارعا تارتۋ ءۇشىن مەملەكەتتىك قولداۋ قاراستىرىلىپ, يگى ىسپەن اينالىساتىن بىرلەستىكتەرگە بەرىلەتىن قارجىلاي كومەك ۇلعايادى. پرەزيدەنت پارمەنىمەن «قايىرىمدىلىق تۋرالى» ارنايى زاڭ ازىرلەنىپ جاتىر. ۆولونتەرلىك ۇيىمداردىڭ زاڭدى مارتەبەسى انىقتالىپ, قايىرىمدىلىق قىزمەت زاڭمەن رەتتەلەدى. ەرىكتىلەر جىلى اياقتالعانمەن, قايىرىمدىلىققا توقتاۋ جوق.
نايما نۇرالىقىزى
