«Nur Otan» پارتياسىنىڭ ورتالىق اپپاراتىندا بەلگىلى تاريحشى, ساياساتكەر بەرىك ابدىعاليۇلىنىڭ «ۇمىتىلعان قاھارماندار» اتتى كىتابىنىڭ تانىستىرىلىمى بولدى.
جاڭا جيناق اتالمىش پارتيانىڭ «ارداگەرلەردى ارداقتايىق» جوباسى اياسىندا جارىق كورىپ وتىر.
بۇل ەڭبەككە كەڭەس وداعىنىڭ باتىرى اتاعىنا ۇسىنىلعان 133 مايدانگەر تۋرالى مالىمەت ەنگىزىلگەن. ولاردىڭ كوپشىلىگى جاياۋ اسكەر, ارتيللەريست, پۋلەمەتشى, ساپەر, تانكيست, مەرگەن, سانيتار, بايلانىسشى, كاۆالەريست, دەسانتشى, اۋە دەسانتى, ۇشقىش, ينجەنەرلىك اسكەر قىزمەتكەرلەرى بولعان.
جيناققا تەك ماراپاتتاۋ پاراقشاسى تىزىمىنەن تابىلعان ارداگەرلەر كىردى. كىتاپ اۆتورى سوعىس جىلدارىندا 497 وتانداسىمىز كەڭەس وداعىنىڭ باتىرى اتاعىنا يە بولعانىن, الايدا ۇسىنىلعانداردىڭ سانى ودان كوپ ەكەنىن باياندادى.
سونداي-اق عالىم سەگىز بىردەي وتانداسىمىزدىڭ ەكى رەت باتىر اتاعىنا ۇسىنىلعانىن ايتتى. ولاردىڭ ەكەۋى – كاپيتاندار ساعادات نۇرماعامبەتوۆ پەن سەيتحان تەمىرباەۆ. ەكى رەت ۇسىنىلعانىمەن, ولار ءبىر رەت بولسىن باتىر اتاعىن الدى. ال قالعاندارىنا ەكى رەتىندە دە بەرىلمەگەن.
«ولاردىڭ اراسىندا ساپەرلەر – قاتارداعى جاۋىنگەر قۇدايبەرگەن جانسەرىكوۆ جانە اعا سەرجانت مىنايقۇل ساعىندىقوۆ, اتقىشتار روتاسىنىڭ كومانديرى, لەيتەنانت قابىش كوكتاەۆ, 248 جاۋدىڭ كوزىن جويعان مەرگەن, اعا سەرجانت زەيتىن بايجانوۆ جانە مايور ۆ.گۋتوۆ پەن لەيتەنانت ۆ.گۋتوۆسكي بار» دەيدى بەرىك ابدىعاليۇلى. اۆتور ءوز سوزىندە الداعى تاڭدا بۇل باعىتتاعى جۇمىستار ءارى قاراي جالعاساتىنىن جەتكىزدى.
