بيىلعى جازدىڭ سوڭىنا دەيىن ءار اپتانىڭ جۇما, سەنبى جانە جەكسەنبى كۇندەرى باس قالانىڭ تۇرعىندارى مەن قوناقتارى كەرەمەت كەشتىڭ كۋاگەرى بولا الادى. ەسىل وزەنىنىڭ جاعالاۋىندا ۇيىمداستىرىلاتىن لازەرلىك شوۋ كىم-كىمدى دە تاڭعالدىرارى انىق.
شوۋدىڭ ەڭ نەگىزگى كورىنىسى شەڭبەر ءپىشىندى سۋبۇرقاقتا بەينەلەنەدى. بۇل فونتان ەلوردانىڭ تۋعان كۇنىنە ارنالىپ جاسالعان-دى. ونىڭ ۇزىندىعى – 180 مەتر, ەنى – 20 مەتر, ال بيىكتىگى – 22 مەتر. فونتانعا پروجەكتورلاردىڭ 2880 RGB ساۋلەسى, 836 جوعارى قىسىمدى سورعى, 909 سۋ بۇرىككىش جانە 70 گاز بۇرىككىش قولدانىلعان.
– ساقينا ءتارىزدى گيدروتەحنيكالىق قۇرال-جابدىقتار جاعالاۋعا پاراللەل جاتقان پونتوندار ۇستىنە ورناتىلعان. سۋبۇرقاقتىڭ بۇرىككىشتەرى وت پەن سۋ اعىنىن بىركەلكى ءارى وتە ۇلكەن قىسىممەن شىعارادى. سونىڭ ناتيجەسىندە پايدا بولعان بۋلى اتموسفەرا لازەرلىك شوۋ مەن ءتۇرلى بەينەقويىلىمدار ترانسلياتسياسىن جاساۋعا مۇمكىندىك بەرەدى, – دەيدى استانا قالاسىنىڭ مادەنيەت باسقارماسى وكىلدەرى.
ۇزاقتىعى 15 مينۋتقا سوزىلاتىن لازەرلىك شوۋدى ادەمى مۋزىكا سۇيەمەلدەيدى. شوۋ بارىسىندا سۋبۇرقاق ورتاسىنداعى ەكراننان قىران قۇس, ارعىماق ءتارىزدى ۇلتتىق سيمۆولدار مەن شاھاردىڭ ساۋلەتتى عيماراتتارى كورسەتىلەدى. شوۋدىڭ ۋاقىتى: 21:00-21:10, 21:30-21:40, 22:00-22:15, 22:30-22:45.
بۇگىندە مۇنداي ەلەۋلى شارا الەمنىڭ تۇكپىر-تۇكپىرىندە تانىمال. ماسەلەن, گونكونگتاعى «ءتۇس سيمفونياسى» لازەرلىك شوۋى ءار ءتۇن سايىن شىعاناق پەن 40 عيماراتتى مىڭ سان تۇسكە بوياپ, 13 مينۋت بويى ادەمى اسەر سىيلايدى. ۇزدىكسىز جۇرەتىنى ءۇشىن گيننەستىڭ رەكوردتار كىتابىنا دا ەنىپتى. عاجايىپ شوۋدى تاماشالاۋعا دۇنيەنىڭ بۇرىش-بۇرىشىنان ميلليونداعان تۋريستەر اعىلادى. بولاشاقتا ءبىزدىڭ ءوڭىر دە ءدال وسى شوۋمەن تانىلىپ, شەتەلدىك مەيمانداردى قىزىقتىرىپ جاتسا, نۇر ۇستىنە نۇر ەمەس پە؟!
بوتاگوز ماراتقىزى
