استانا تۇرعىندارى ءۇشىن ءوز البومدارىن ەلباسىمەن بىرگە تۇسكەن سەلفيمەن تولىقتىرۋعا تاماشا مۇمكىندىك بار. مۇنداي كەرەمەت فوتونى بەيبىتشىلىك جانە كەلىسىم سارايىندا ءوتىپ جاتقان بالاۋىز مۇسىندەر كورمەسىندە جاساۋعا بولادى. ەرەكشە كورمە 21 تامىزعا دەيىن جالعاسادى.
بالاۋىز مۇسىندەردى سوناۋ سانكت-پەتەربۋرگ قالاسىنان اكەلىپتى. اتالمىش كورمەنىڭ اكىمشىسى رايسا پۋتيلينانىڭ ايتۋىنشا, بۇل جەرگە 40-قا تارتا ەكسپونات قويىلعان.
– بيىل قازاقستان رەسپۋبليكاسىنىڭ تاۋەلسىزدىگىنە 25 جىل, ال بەيبىتشىلىك جانە كەلىسىم سارايىنا 10 جىل تولدى. وسىناۋ ماڭىزدى داتاعا وراي استاناعا ارنايى ات باسىن بۇرىپ, مىنا كورمەنى ۇيىمداستىردىق. الداعى ۋاقىتتا قازاقستاننىڭ وزگە دە ايماقتارىنا قوناققا بارامىز, – دەدى ول.
بالاۋىز مۇسىندەردىڭ ورتاسىندا جۇمىس ىستەگەنىنە 16 جىل بولعان رايسا بىزبەن قاتارلاسىپ ءجۇرىپ, فيگۋرالاردىڭ جاسالۋ ءادىسىن تاپتىشتەپ تۇرىپ ءتۇسىندىرىپ بەردى. باقساق, ءار ءمۇسىندى ازىرلەۋگە ورتاشا ەسەپپەن 1 جىلداي ۋاقىت جۇمسالادى ەكەن. ويتكەنى, وعان 15 ءتۇرلى مامان ءوز قولتاڭباسىن قالدىرادى. ماسەلەن, ناقتى قاي تۇلعانىڭ ءمۇسىنىن جاساۋ كەرەكتىگىن شىعارماشىلىق كەڭەس شەشكەن سوڭ, سكۋلپتور ىسكە كىرىسەدى. اۋەلى ول قاھارمان تۋرالى مالىمەتتەر جينايدى, كىتاپتار وقيدى, دەرەكتى فيلمدەر كورەدى. كەيىپكەردىڭ بولمىس-ءبىتىمىن تۇگەلدەي ەلەستەتكەننەن كەيىن ءمۇسىندى قاشاي باستايدى. وندا گيپس, بالاۋىز جانە سيليكون ماتەريالدارى قولدانىلادى.
كەلەسى شارۋا – پوستيجەردىكى. ولار مۇسىنگە تابيعي شاش, قاس, كىرپىك, ساقال-مۇرت «قوندىرۋمەن» اينالىسادى. ەڭ كۇردەلى تىرلىك وسىلارعا تيەسىلى سياقتى. ءار قىلشىقتىڭ ۇشىن قىزدىرىپ, بالاۋىزعا ورنالاستىرۋ قانشالىقتى توزىمدىلىكتى تالاپ ەتەتىنىن بولجاپ كورىڭىز. بۇدان بولەك, ءمۇسىننىڭ «كوزىن» سالۋ – وفتالمولوگتىڭ, «ءتىسىن» تۇگەندەۋ – ستوماتولوگتىڭ موينىندا. كوز دە, ءتىس تە – كادىمگى ادامدارعا ارنالعان پروتەزدەر. سوندىقتان بالاۋىز فيگۋرالار مەيلىنشە شىنايى, ومىردەگى پروتوتيپتەرىنە بارىنشا ۇقساس.
كورمەدە ەلباسىمەن قاتار, رەسەي فەدەراتسياسىنىڭ باسشىسى ۆلاديمير پۋتين جانە اقش پرەزيدەنتى باراك وبامانىڭ دا مۇسىندەرىن كەزدەستىرەسىز. اقوردانىڭ فونىندا تۇرعان ءۇش ساياساتكەرمەن جۇرتشىلىق جاپا-تارماعاي سۋرەتكە ءتۇسىپ اۋرە. سولاردىڭ ءبىرى, ەلوردالىق ءسابيلا اجەيدى اڭگىمەگە تارتتىق.
– وسى ءتارىزدى مۇسىندەردى بىلتىر نەمەرەم امستەردامداعى مادام تيۋسسو مۋزەيىنە اپارعاندا كورىپ, قاتتى تاڭعالعان ەدىم. بۇگىن, مىنە, عاجاپ شەدەۆرلەردى ءوز ەلىمىزدە دە تاماشالاۋ باقىتى بۇيىردى. شوبەرەلەرىم دە ءماز-مەيرام, – دەپ اعىنان اقتارىلدى قاريا.
شىنىندا دا, كورمەگە كەلگەن بۇلدىرشىندەر سۇيىكتى مۋلتفيلمدەرىنىڭ قاھارماندارىمەن جولىعىپ, ءدان ريزا. بىرەۋى بويى ءۇش مەترلىك الىپ اۆاتارعا اڭتارىلىپ جۇرسە, ەندى بىرەۋى بۋراتينو مەن مالۆينانىڭ جانىنان ۇزامايدى. ولاردان باسقا, «كاريب تەڭىزىنىڭ پيراتتارى», «گارري پوتتەر», «ساقينالار ءامىرشىسى», «جۇلدىزدى سوعىس» سىندى فانتاستيكالىق كينولاردىڭ اكتەرلەرىنە كوپشىلىك ايرىقشا قىزىعۋشىلىق تانىتۋدا.
سپورتسۇيەر قاۋىمعا دا جەكە بۇرىش جاسالىپتى. فۋتبول اتاسى پەلە مەن داڭقتى بوكسشى مايك تايسون سول ماڭنان تابىلادى. سونداي-اق, گولليۆۋدتىڭ ايگىلى جۇبى – اندجەلينا دجولي مەن برەد پيتت تە شارا قوناقتارىن اسىعا كۇتەدى.
كورمە 13 شىلدە مەن 21 تامىز ارالىعىندا تاڭعى 10-نان كەشكى 8-گە دەيىن اشىق.
بوتاگوز ماراتقىزى
