كەشە ەۋرازيا گۋمانيتارلىق ينستيتۋتىندا ەسىرتكىگە قارسى «بيلە, بيلە!» اتتى شىعارماشىلىق جارىس ءوتتى.
شاراعا قالالىق ىشكى ىستەر دەپارتامەنتى ەسىرتكى بيزنەسىنە قارسى كۇرەس باسقارماسى جانە مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ دەپارتامەنتى مۇرىندىق بولدى. جوبا اياسىندا ءۇش اپتا بويى ۇستازدار مەن ستۋدەنتتەر ءتۇرلى باعىتتاعى ءبيدى مەڭگەردى. اقتىق سايىسقا شىققان بەس كافەدرا ءوزارا جارىسىپ, بيگە ەڭ يكەمدى دەگەندەرى جۇلدەلى بولدى.
– مۇنداي شارالار جاستارعا بوس ۋاقىتىن ءتيىمدى وتكىزۋ جولدارىن كورسەتەدى. وسىمەن ءتورتىنشى جىل قاتارىنان ۇيىمداستىرىپ كەلەمىز. ەڭ قىزىعى, بۇگىنگى قاتىسۋشىلاردىڭ ىشىندە كاسىبي ءبيشى جوق. الايدا, جوعارى دەڭگەيدە ونەر كورسەتىپ, بارشاعا ۇلگى بولا ءبىلدى. ەندىگى كوزدەگەنىمىز – اتالمىش شارانى قالالىق دەڭگەيگە كوتەرۋ, – دەيدى ەلوردالىق ءىىد ەسىرتكى بيزنەسىنە قارسى كۇرەس باسقارماسىنىڭ ءبولىم باستىعى سەرگەي يلينىح.
گۇلدانا تالعاتقىزى
