ەلوردالىق ۇكىمەتتىك ۇيىمدار مەن مەملەكەتتىك ورگاندار وكىلدەرىنىڭ قاتىسۋىمەن «الەۋمەتتىك دامۋدىڭ وزەكتى ماسەلەلەرى مەن ولاردى مەدياتسيانىڭ مۇمكىندىگىن پايدالانا وتىرىپ شەشۋ جولدارى» اتتى دوڭگەلەك ۇستەل جيىنى ءوتتى.
ءىس-شارا مەدياتسيا مۇمكىندىكتەرىن پايدالانا وتىرىپ الەۋمەتتىك ماسەلەلەردى شەشۋ جولدارىن, بىرلىكتى نىعايتۋ مەن قوعامدىق كەلىسىمدى ساقتاۋداعى مەملەكەتتىك جانە ۇكىمەتتىك ەمەس ۇيىمدار سەرىكتەستىگىنىڭ پىكىر الىسۋ الاڭىن دامىتۋعا باعىتتالعان.
«ستاتيستيكا بويىنشا مەدياتورلاردىڭ قاتىسۋىمەن وتكەن داۋلاردىڭ 80 پايىزدان استامى تاراپتاردىڭ كەلىسىمىمەن اياقتالادى. الايدا حالىقتىڭ مەدياتسيا جونىندە حابارى جەتكىلىكسىز بولعاندىقتان, الەۋمەتتىك ماسەلەلەردى رەتتەۋدە مەدياتسيانىڭ الەۋەتى تولىق كولەمدە پايدالانىلماي وتىر» دەيدى حالىقارالىق قۇقىق قورعاۋ ورتالىعىنىڭ باسشىسى, قازاقستان مەدياتورلارى قاۋىمداستىعىنىڭ باس ديرەكتورى ءجاندىلدا جاقىپوۆ. ونىڭ پىكىرىنشە, ەكونوميكالىق داعدارىس جاعدايىندا الەۋمەتتىك ماسەلەلەر دە شيەلەنىسە تۇسەدى. سوندىقتان, مەملەكەتتىك ورگاندار, ازاماتتىق قوعام وكىلدەرى بەيبىت كەلىسىمگە كەلۋدىڭ بارلىق ادىستەر مەن تاسىلدەرىن قولدانا بىلگەنى ابزال.
جوبا اياسىندا قالانىڭ ج.ناجىمەدەنوۆ كوشەسىندەگى 10/4-ۇيدە مەدياتسيا جانە قۇقىق ورتالىعى اشىلدى. وندا قالا تۇرعىندارىنا زاڭگەرلەر مەن مەدياتور قىزمەتى تەگىن كورسەتىلمەك.
ايگۇل ۋايسوۆا
