«Eta» شتامى قاۋىپتى مە؟
قىركۇيەك ايىندا قازاقستاندا كوروناۆيرۋستىڭ جاڭا شتامى – «Eta» انىقتالدى. دەنساۋلىق ساقتاۋ ۆيتسە-ءمينيسترى ەرلان قياسوۆتىڭ ايتۋىنشا, بۇل شتامم رەسپۋبليكانىڭ 4 اۋماعىندا – قاراعاندى, ماڭعىستاۋ, پاۆلودار وبلىستارى جانە نۇر-سۇلتان قالاسىندا تىركەلدى.
ددۇ مالىمەتى بويىنشا ۆيرۋستىڭ بۇل ءتۇرى باقىلاۋدى قاجەت ەتەتىن شتامعا جاتادى جانە ونىڭ كلينيكالىق كورىنىسى «الفا», «بەتا» شتامدارىنا ۇقساس, سوندىقتان بارلىق پروفيلاكتيكالىق شارالاردى ساقتاۋ قاجەت. نيگەريالىق «Eta», ۇندىستاندىق «Delta» نەمەسە بريتاندىق «Alfa» شتامىنىڭ قايسىسى قاۋىپتىرەك دەگەن ساۋالعا ۆيتسە-مينيستر قاي-قايسىسى دا وڭىپ تۇرماعانىن ايتتى. «قازىرگى تاڭدا كوروناۆيرۋس ينفەكتسياسىنىڭ نەعۇرلىم باقىلاۋدى قاجەت ەتەتىن 8 ءتۇرى بار, قازاقستاندا ونىڭ تورتەۋى انىقتالدى: بريتاندىق, ونتۇستىكافريكالىق, ۇندىستاندىق جانە نيگەريالىق شتامدار. ونىڭ ىشىنەن ۇندىستاندىق نەمەسە «دەلتا» شتامى قازاقستاندا ماۋسىم ايىندا انىقتالدى جانە كوروناۆيرۋس ينفەكتسياسىنىڭ باسقا تۇرلەرىنە قاراعاندا نەعۇرلىم اۋىر وتەدى جانە اعزاعا تەز تاراپ, بارلىق ورگانداردى زاقىمدايدى», دەدى ۆيتسە-مينيستر.