استانادا ەتىكشىلىك كاسىپپەن 30 جىلدان بەرى اينالىسىپ, وتباسىن اسىراپ جۇرگەن جانبولات مۇسايبەكوۆتىڭ ارمانى – اعىلشىن ءتىلىن جەتىك مەڭگەرۋ. ءتىلدى تولىق بىلگەن سوڭ وتباسىمەن شەتەلگە, اسىرەسە كاناداعا بارىپ تۇرۋدى جوسپارلاۋدا. سول ماقساتتا 3 جىلدان بەرى ءوز بەتىنشە اعىلشىن ءتىلىن ۇيرەنىپ كەلەدى. بۇگىندە ءتىل ءبىلۋى IELTS 4 دەڭگەيىنە جەتىپ قالعان ەتىكشى وتباسىمەن مۇحيت اسىپ كەتۋدى كوزدەپ وتىر.
كەڭەس كەزىندە ومبى پوليتەحنيكا ينستيتۋتىندا اۋىر ماشينا جاساۋ سالاسىنداعى ينجەنەر-تەحنولوگ ماماندىعىن بىتىرگەن مامان اقىرى وقىعان سالاسىندا جۇمىس ىستەمەستەن كەتتى. ءبىر جاعى ول كەزدە بۇل ماماندىق بويىنشا تەك 3 زاۋىت قانا بولدى ءارى بىرەۋگە ەمەس, وزىنە-ءوزى جۇمىس ىستەگەندى قۇپ كوردى. ال قازىر بۇل كاسىبىنە ابدەن ۇيرەنىپ العان. ەلوردانىڭ ا.بايتۇرسىنۇلى كوشەسى بويىنداعى الاقانداي ارنايى ورىندى ايىنا 20-30 مىڭ تەڭگەگە جالدايدى. ەتىكتىڭ, سومكەنىڭ جىرتىلعان, تەسىلگەن جەرىن تىگۋ, جاماۋ, جەلىمدەۋ, كىلت كوشىرمەسىن جاساۋ, قايشى, پىشاق قايراۋ سەكىلدى جۇمىستار بويىنشا 30-عا جۋىق تاپسىرىس قابىلداپ, كۇنىنە كەم دەگەندە 10 مىڭ, كوپ دەگەندە 25-30 مىڭ تەڭگەدەي تابىس تابادى. وسى تابىسىمەن ول ەكى قىز, ءبىر ۇلىن اسىراپ, ءبارىنىڭ جوعارى ءبىلىم الۋىنا كومەكتەسىپ وتىر, بالالارىنىڭ الدى وتباسىلى بولىپ ۇلگەردى, ءبىر قىزى چەحياداعى وقۋىن تامامداماق. استاناعا 2009 جىلى پەتروپاۆل جاقتاعى قىزىلتۋ اۋىلىنان كوشىپ كەلگەن. بۇل كاسىپ, جۇگەن, ەر-توقىم جاسايتىن شەبەرلىگى اكەسىنەن دارىپتى. اپتانىڭ بەس كۇنىندە ءوزى شىقسا, دەمالىستا جۇمىسىن ۇلىنا تاپسىرادى. وعان دا اتا كاسىبىن ۇيرەتىپ قويعان. بوساعان ۋاقىتىندا دا, جۇمىس ىستەپ وتىرىپ تا قازىرگى باستى ارمانى – اعىلشىن ءتىلىن ۇيرەنۋگە كىرىسىپ كەتەدى.
– ءتىلدى وقۋداعى باستى ماقساتىم – بىرىنشىدەن, ميدى جاتتىقتىرۋ, ادام قارتايعان سايىن مي جالقاۋلانا باستايدى, ادام سودان تەز قارتايىپ, ەرتە الجيدى. سوندىقتان ميدى جاتتىقتىرىپ, ءتۇرلى تاپسىرما بەرىپ, جۇمىس ىستەتۋ كەرەك. ادامنىڭ بۇكىل ومىرلىك رەسۋرسى ميدا عوي. سول ءۇشىن اعىلشىن ءتىلىن ۇيرەنە باستادىم. كوبىنە اۋىزشا جاعىن مەڭگەرەمىن. عالامتورداعى ءتۇرلى ساباقتى, اۋديو, بەينەباعدارلامانى تىڭداپ, كورۋ ارقىلى ءوز بەتىمشە ۇيرەنەمىن. تەلەفون قوسىمشالارى ارقىلى جاڭا سوزدەر جاتتايمىن. قولىم قالت ەتسە تاپسىرمالاردى ورىندايمىن. اقىلى كۋرستارعا بارعانمىن. بىراق بىلتىر ەۋروپانى ارالاعاندا ماعان سول اقىلى وقىعانىمنىڭ پايداسى تيمەدى. پولشا, چەحيا, گەرمانيادا جۇمىس ۆيزاسىمەن جۇرگەندە ءتىل ءبىلۋدىڭ قانشالىقتى ماڭىزدى ەكەنىن ءتۇسىندىم. كەز كەلگەن ەلگە ءتىل ءبىلىپ بارساڭ, اناعۇرلىم جەڭىل ءارى جالاقىسى جوعارى جۇمىسقا تۇرۋعا بولادى. ال ءتىل بىلمەگەندەر قارا جۇمىسقا جەگىلەدى. ەندى كاناداعا كەلسەك, ول جاققا ءتىپتى ءتىل بىلمەي بارۋ مۇمكىن ەمەس. كانادا – ناعىز وركەنيەتتىڭ وتانى, سول ەلدە تۇرۋ – كوپ ادامنىڭ ارمانى. بالالارىم جاس كەزىندە سونداي وركەنيەتتى كورسە ەكەن, ءوز بويىنا تاربيە ەتىپ ءسىڭىرىپ السا ەكەن دەيمىن. جەرىنە قاراساڭىز دىمى جوق, بىراق تۇرمىسى قانداي! قازاقستان بايلىقتىڭ ۇستىندە وتىرسا دا, حالقىنىڭ تۇرمىسى ءالى دە تومەن, كەيبىر اۋىلداردا ينتەرنەتتى قويا تۇرىپ, جارىق پەن سۋ جوق, – دەيدى جانبولات ەتىكشى.
بيىل ءوزى ءوتىنىش بەرگەن كوشى-قون قىزمەتىنىڭ تالابى بويىنشا اعىلشىن ءتىلىن ءبىلۋ دەڭگەيىن IELTS 5-كە جەتكىزسە, وتباسىمەن كاناداعا كوشىپ كەتۋگە دايىن وتىر. تاڭ اتقاننان كۇن باتقانشا سۇيىكتى كاسىبىمەن اينالىسا ءجۇرىپ, جاسى 60-قا تاياپ قالسا دا, الدىنا ۇلكەن ارمان قويا بىلگەن كەيىپكەرىمىز ەرىنبەگەن ەتىكشى عانا ەمەس, اعىلشىن ءتىلىن دە ەركىن مەڭگەرە الاتىنىن دالەلدەپ ءجۇر.
