استانا – بۇكىل قازاقستاننىڭ جەتىستىگى. ءبىز ءححى عاسىردا عالامات دۇنيەنى بىرگە جاسادىق. ادامزات تاريحىندا مۇنداي قالالار ەشقاشان 20 جىلدىڭ ىشىندە سالىنباعان. ال ءبىز سالدىق!
نۇرسۇلتان نازارباەۆ,
قازاقستان رەسپۋبليكاسىنىڭ تۇڭعىش پرەزيدەنتى
ءسات سايىن زىمىراپ ءوتىپ بارا جاتقان ۋاقىت ادامزات تاريحىنىڭ جاڭا ءبىر بەتتەرى بولىپ جازىلىپ قالىپ جاتىر. قازاق ەلىنىڭ سول ۋاقىت ۋىسىنداعى تاريحىنىڭ ەڭ ءبىر باي دا مازمۇندى بەتتەرى ءتاۋەلسىزدىك تاراۋى بولار, بالكىم؟! كەلەر جىلى ەل تاۋەلسىزدىگىنە 30 جىل تولعالى وتىر. وسى كەزەڭدە ءبىر عاسىردىڭ اياسىنا دا سىيا بەرمەس جاعدايلاردى كوز كوردى. ەڭ باستىسى, الەمدىك ابىرويلى مەملەكەتتەردىڭ ءبىرى بولا بىلدىك! 
وسى ورايدا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ رەسپۋبليكالىق «Egemen Qazaqstan» جانە «Aiqyn» گازەتتەرىنە (2 ءساۋىر, 2019 جىل) بەرگەن «بارىمىز دا, باعىمىز دا – تاۋەلسىزدىك» اتتى سۇحباتىندا: «نۇرسۇلتان ءابىشۇلى نازارباەۆ تاۋەلسىزدىكتىڭ العاشقى جىلدارىنان باستاپ جاڭا مەملەكەتتىلىك جاساۋدىڭ بارلىق تاۋقىمەتىن باسىنان وتكەردى. قيىندىققا تولى وسى جولدا تولاعاي تابىستارعا قول جەتكىزدى. قازاق ەلىن تورتكۇل دۇنيەگە ايگىلەپ, بارشا الەمگە مويىنداتا ءبىلدى. تاۋەلسىز ەلىمىزدىڭ بۇگىنگى ءوسىپ-وركەندەۋى, ەرتەڭگى دامۋ كەلەشەگى نازارباەۆ ەسىمىمەن تىعىز بايلانىستى» دەگەن پىكىرىن العا تارتا سويلەر بولساق, بۇگىنگى ەلوردامىز – كەشەگى تسەلينوگراد, ودان كەيىنگى اقمولا, ال قازىرگى نۇر-سۇلتان قالاسى – تۇڭعىش پرەزيدەنتىمىزدىڭ اقىل-پاراساتىمەن جانە ەل بولاشاعىن الىستان بولجاعان كەمەڭگەرلىگىنىڭ ارقاسىندا ورناعان شاھار!
قازاقستاننىڭ استاناسىن الماتىدان سارىارقا توسكەيىنە اۋىستىرۋ تۋرالى ويدى ەڭ العاش نۇرسۇلتان نازارباەۆتىڭ ايتقانى دا ەستە. شىنىن ايتقاندا, جۇرەگىمىز اۋزىمىزعا تىعىلدى. نەعىلعان جاڭا استانا؟! ەكونوميكا بولسا قۇلدىراپ جاتىر, حالىق جۇمىسسىز, كۇنكورىستىڭ ءوزى اۋىرلاي باستاعان تۇستا استانانى كوشىرىپ نە كورىندى؟ وسى سارىنداعى كوڭىل كۇيدىڭ بولعانى جاسىرىن دا ەمەس. الايدا سوعان قاراماستان ەلوردانى اۋىستىرۋ تۋرالى قازاقستان رەسپۋبليكاسى جوعارعى كەڭەسى 1994 جىلى 6 شىلدەدە شەشىم قابىلدادى دا, استانانى رەسمي كوشىرۋ 1997 جىلعى 10 جەلتوقساندا جۇزەگە اسقان بولاتىن. مىنە, سول ءبىر تاريحي ساتكە دە 23 جىل!
اقمولالىقتار الماتىدان كەلگەن العاشقى كوشتى سارىارقانىڭ ساقىلداعان سارى ايازى مەن ۇلي سوققان بورانىمەن قارسى الىپ ەدى. «جىلى جاققا ۇيرەنگەن الماتىلىقتار كوپ ۇزاماي كەيىن قايتىپ كەتەدى ءالى» دەپ ويلاعانىمىز دا بولدى. الايدا بار قيىنشىلىقتارعا قاراماستان جانە دە نۇرسۇلتان نازارباەۆتىڭ جەكە باسىنىڭ بارىنشا قاجىرى مەن قايراتىنىڭ ارقاسىندا استانا سالىنا باستادى. ال ەندى قازىر قاراپ وتىرساڭىز, سەنگىڭ-اق كەلمەيدى! ويتكەنى كوڭىلدەگى دە, كوكەيدەگى دە, كوز الدىمىزداعى دا استانا – نۇر-سۇلتان قالاسى تاپ ءبىر بۇرىننان بار, ماڭگىلىك ورناپ باياعىدان تۇرعان قالا سياقتى جۇرەك تۇكپىرىندە قۇتتى ءبىر قۋانىش بولىپ جاتقانداي كورىنەدى!
تاۋەلسىز ەل بولىپ قالىپتاسقان ەكى ون جىلدىقتىڭ ارالىعىندا, كوك كۇمبەزىنىڭ ۇشار باسىندا كوك بايراعى اسقاق جەلبىرەپ تۇرعان ءدال مىناداي اقوردالى استانا سالىپ الۋ مۇمكىن بە ەدى؟ مۇمكىن بولماسا دا, قازاق ەلىنىڭ ەلورداسى, استاناسى سالىندى! الەمدە قازاق ەلىنىڭ استاناسى بار! سول بۇگىنگى نۇر-سۇلتان قالاسى ءوزىنىڭ تاڭعاجايىپ كەسكىن-كەلبەتىمەن دە, ارلەنگەن سانىمەن دە قازىر دۇنيە الەمىن تاڭداندىرىپ تا, تامساندىرىپ تا وتىرعاندىعى اقيقات!
تاۋەلسىزدىكتىڭ باياندى تاعدىرى نۇرسۇلتان نازارباەۆتىڭ تاعدىرى, ال ەلباسىنىڭ تاعدىرى تۇتاس ءبىر حالىقتىڭ, بارشا قازاقستاندىقتاردىڭ تاعدىرى بولىپ قالىپتاستى. ماڭگىلىك ەلدىڭ استاناسىن تۇڭعىش پرەزيدەنتىمىز كورىكتى, ىرگەسى بەرىك, ەڭسەسى بيىك, بىرلىگى مىزعىماس, ىنتىماعى ارزىماس, ىرىسى تاۋسىلماس, بەرەكەسى كەتپەس, ىرىزدىعى ورتايماس, داۋلەتى شايقالماس, الەم الدىنداعى ءجۇزى جارقىن, ءسوزى ءوتىمدى, ايبىنى اسقاق بولسىن دەگەن پەرزەنتتىك تە, پرەزيدەنتتىك تە, ادال ويىمەن باردان جوقتى قۇراپ دەگەندەي ءبارىن دە جاسادى!
بۇگىنگى استانامىز – قاسيەتتى قازاق جەرىنە جۇرەگىنە سىيعان تۇتاس الەمدى ءوز ەلى مەن حالقىنا دەگەن شەكسىز سۇيىسپەنشىلىگىنىڭ بەلگىسىندەي ەتىپ ءوز دالاسىنا قوندىرىپ, ورنىقتىرا بىلگەن نۇرسۇلتان نازارباەۆتىڭ وزىندىك ءبىر الەمى!
تاۋەلسىز ەلىمىز ءۇشىن نۇرسۇلتان نازارباەۆ ەسىلدىڭ بويىنا ەل قوندىرىپ, العاشقى قازىعىنان باستاپ ءوزى قاعىپ, بۇگىنگى ايدىندى دا ايبىندى اقوردالى استانانى دۇنيەگە اكەلگەندىگى ءبىزدىڭ, ياعني قازاق ەلىنىڭ ماڭگىلىك ەل بولا الاتىندىعىن دالەلدەپ, وسىعان ەڭ اۋەلى ءوز جۇرتىنىڭ دا, ودان قالدى دۇنيە جۇرتىنىڭ دا كوزدەرىن جەتكىزىپ, يلاندىرا بىلگەن ۇلىلىعى ەدى!
XXI عاسىرداعى قازاق ەلىن جانە اتا-بابالارىمىز ءۇشىن عاسىرلار بويى ارمان بولعان تاۋەلسىزدىگىمىزدى بۇگىنگى استاناسىز كوز الدىڭىزعا ەلەستەتىپ ءبىر بايقاڭىزشى! اۋزىڭىزدىڭ ءدامى كىرمەس ەدى!
بۇگىنگى ەل استاناسى – نۇر-سۇلتان قالاسى ەل تاۋەلسىزدىگىنىڭ ءلۇپ-ءلۇپ سوعىپ تۇرعان جۇرەگى ەمەس پە؟!
حالقىمىزدىڭ بارلىق ۇلى مۇراتتارىنىڭ بايتەرەك بولىپ تەرەڭگە تارتقان تامىرى, جايقالعان جاپىراعى ەمەس پە؟!
بۇگىنگى ەل استاناسى – نۇر-سۇلتان قالاسى دوڭگەلەنگەن دۇنيەنىڭ قازاق يەلەنىپ وتىرعان قاسيەتتى ءبىر جەرىنە ورناتىلعان الەمنىڭ ءتورت بۇرىشىنان دا كوزگە ءتۇسىپ كورىنەر, التىن تۇعىرلى, ەڭ زاڭعار دا ەڭ بيىك, ەڭ ابزال دا, ەڭ ءبىر ازبايتىن, توزبايتىن ماڭگىلىگى جولىندا مىڭ ءولىپ, مىڭ تىرىلگەن قازاق ءۇشىن سوعىلعان ۇلى ەسكەرتكىش!
سول ۇلى دا قاسيەتتى, كيەلى ەسكەرتكىشتى قازاق حالقى ءۇشىن تۇرعىزىپ بەرگەن ەلباسى نۇرسۇلتان نازارباەۆتىڭ ءوز حالقىنىڭ الدىنداعى پەرزەنتتىك تە پرەزيدەنتتىك پارىزىنا ءاماندا ادال بولىپ كەلە جاتقاندىعىن جانە دە ءوز حالقى ءۇشىن نەبىر كوزسىز ەرلىككە بارا الاتىن, باتىل دا باتىر بولا الاتىن تەكتى دە ءبىر ايرىقشا دارا دا دانا قاسيەتىن ايعاقتاپ تۇر!
جەر ماڭگىلىك بولار, ەل بولسا! ەل ماڭگىلىك جاسار, ەر بولسا! ەر ماڭگىلىك جاسار, ەل بولسا! مىنە, ماڭگىلىكتىڭ بار تۇتاستىعى وسىعان كەلىپ سايارى دا بار. الايدا وسى ماڭگىلىكتەردى باياندى ەتۋ جولىنداعى العاشقى قادامدار ەلباسى ءۇشىن وڭايعا ءتۇستى مە؟ ارينە, وڭايعا سوقپادى! سوعان قاراماستان, ول قازاقستاننىڭ وزىندىك دامۋ جولىن قالىپتاستىردى. ەل شەتى مەن جەر شەگىنە ەشكىمنىڭ كوز الارتپاۋىن اڭدادى, شەكارانىڭ قاۋىپسىزدىگىن قامدادى. سان ۇلت وكىلدەرىنەن قۇرالعان ەلدىڭ بىرلىگى مەن ىنتىماعىن ويلادى. ەسىلدىڭ بويىنا ەل قوندىرىپ, دۇنيەنىڭ ءتورت بۇرىشىنا ەسىگى ايقارا اشىلعان «ماڭگىلىك ەل» قاقپاسى بار قازاق ەلىنىڭ استاناسىن سالدى!
بۇل كۇندەرى نۇر-سۇلتان قالاسىنىڭ اۋماعى عانا قانات جايىپ, ۇلعايىپ بارا جاتقان جوق, ەلوردامىزدىڭ جەر جاhانداعى ابىرويى دا, ىزگىلىكتى ىستەرى دە ۇلعايىپ, ءوسىپ, داۋىرلەپ بارادى. ءبارىن دە قۇتتى قىلسىن!
جابال ەرعاليەۆ, جازۋشى-دراماتۋرگ,
قازاقستاننىڭ ەڭبەك سىڭىرگەن قايراتكەرى
