ەلورداداعى «جانۇيا» ورتالىعىندا «زورلىق-زومبىلىققا قارسى 16 كۇن» شاراسى اياسىندا ونلاين فورماتتا «باقىتتى وتباسىنىڭ مودەلى» اتتى دوڭگەلەك ۇستەل ءوتتى. جيىندا قوعامداعى كوكەيكەستى ماسەلەنىڭ ءبىرى – تۇرمىستىق زورلىق-زومبىلىق تاقىرىبى تالقىلاندى.
شاراعا نۇر-سۇلتان قالاسى اكىمدىگى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا حاتشىسى ءمولدىر بولەباەۆا, قازاقشا كۇرەس, گرەپلينگ, جەكپە-جەك اكادەمياسىنىڭ ترەنەرى توقتار زارۋبەكوۆ, «قارا شاڭىراق» قوعامدىق بىرلەستىگىنىڭ ءتورايىمى, جۋرناليست, قالالىق ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا مۇشەسى تۇرار شاكەن, «ءۇمىت» داعدارىس ورتالىعىنىڭ ديرەكتورى گاليحان كۋكانبەكوۆ جانە وزگە دە سالا ماماندارى, كوپبالالى انالار قاتىسىپ, جيىندا وتباسىنداعى ەرلى-زايىپتىلاردىڭ ءرولى, ۇلداردى جىگەرلى, رۋحتى, ازامات ەتىپ تاربيەلەۋ جولدارى ايتىلدى.
سونىمەن قاتار زورلىق-زومبىلىققا ۇشىراعان وتباسى مۇشەلەرىنە پسيحولوگيالىق, قۇقىقتىق كومەك كورسەتۋ, زورلىق-زومبىلىق قۇرباندارىن وڭالتۋ بويىنشا قىزمەت كورسەتۋ, حالىق اراسىندا ءتۇسىندىرۋ جۇمىسىن وتكىزۋ, تۇرمىستىق قىلمىستار مەن قۇقىقبۇزۋشىلىقتاردىڭ الدىن الۋ ماسەلەلەرى ورتاعا سالىندى.
قۇقىق قورعاۋشىلاردىڭ ايتۋىنشا, بالالارعا ءزابىر كورسەتۋ دەرەگى ازايماي تۇر. قالادا جاستار جانە جاسوسپىرىمدەر ىسىمەن اينالىساتىن مەملەكەتتىك مەكەمەلەر, داعدارىس ورتالىقتارى جۇمىس ىستەيدى. ۇكىمەتتىك ەمەس ۇيىمدار دا جەتكىلىكتى. الايدا وتباسىندا زورلىق-زومبىلىق كورەتىن ايەل مەن بالا ءتيىستى دەڭگەيدە قورعالماي وتىر. اسىرەسە, كارانتيننەن كەيىن دە تۇرمىستىق قىلمىس بىرنەشە ەسەگە وسكەن.
«رۋحاني قوعام الەمى» قوعامدىق قورىنىڭ پرەزيدەنتى, قالالىق ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا مۇشەسى, پسيحولوگ ليمانا قويشيەۆا ءوز اتا-اناسىنان ءجابىر كورگەن بالالاردىڭ ارتقانىن ايتادى. «ماسەلەن, 10 جاسار قىز ينستاگرام پاراقشامىزعا «باقىتتى وتباسىنىڭ مودەلى قانداي بولادى؟» دەپ ساۋال جولدادى. قازىر باقىتتى ءومىر ءسۇرىپ جاتساق تا, وتباسىندا تۇيتكىلدەر كوپ. انا بولۋ, بالا تاربيەلەۋدىڭ ءوزى – ۇلكەن مەكتەپ. قوعامداعى انانىڭ ءرولىن ايقىنداۋىمىز كەرەك. ايەلدىڭ باقىتى – وتباسىندا. بالاسىن تاربيەلەي وتىرىپ, وزىنە ۋاقىت تابۋى كەرەك. سپورتپەن اينالىسىپ, سۇلۋلىعىن ساقتاپ, ءبىلىمىن جەتىلدىرۋى قاجەت. قىزمەتتە جۇرگەن ادام مەن قازان-وشاقتىڭ اراسىندا كۇنىن وتكىزەتىن ايەلدىڭ دەڭگەيى ەكى ءتۇرلى. ورتاق اڭگىمە بولمايدى. سوندىقتان كوپ وتباسىندا داۋ-جانجالدار تۋىندايدى. ۇيدە وتىرعان ايەلدەرگە ءوزىن-ءوزى ۇنەمى جەتىلدىرىپ وتىرۋ قاجەت. جىل باسىنان بەرى قالالىق دەپارتامەنتپەن بىرگە 12 وتباسىنا كومەك كورسەتىلدى. بۇگىنگى شارانىڭ ءوزى – جاڭا ناتيجە» دەدى پسيحولوگ.
نايما نۇرالىقىزى
