فرانتسۋز كومپانياسىمەن مەموراندۋم جاساستى

VII استانا ەكونوميكالىق فورۋمى اياسىندا ەلوردا اكىمدىگى مەن فرانتسۋزدىق «EIFFAGE-EGIS-GDFSUEZ» كونسورتسيۋمى اراسىندا «ASTAINABLE» جوباسىن جۇزەگە اسىرۋ جونىندەگى مەموراندۋم جاسالدى. قۇجاتقا قالا اكىمى يمانعالي تاسماعامبەتوۆ پەن فرانتسيانىڭ قازاقستانداعى ەلشىسى فرانسيس ەتەن مىرزا قول قويدى.

اتالعان كەلىسىم اياسىندا «قالانىڭ تۇراقتى دامۋىنا ارنالعان 3D ىنتالاندىرۋشى» جوباسى جۇزەگە اسىرىلادى. ونىڭ كومەگىمەن استانادا ەلەكتروندى كارتالار قولدانىسقا ەنگىزىلەدى. 3D جۇيەسىندە جۇمىس ىستەيتىن كارتانى قالا ينفراقۇرىلىمى, جول, ساۋلەت ونەرى مەن قۇرىلىستا, كارىز جەلىسىندە كەڭىنەن پايدالانۋعا بولادى. مۇنداي تاجىريبەمەن فرانتسۋز كومپانيالارى بولىسپەك.

ەلشىنىڭ ايتۋىنشا, ەكى ەل ءتۇرلى سالالاردا تىعىز ىنتىماقتاستىق ورناتتى, الدا بىرلەسىپ جۇزەگە اسىراتىن جوبالار دا كوپ.

«21 عاسىردا زاماناۋي قۇرال-جابدىقتىڭ بولعانى دۇرىس. قالادا بولىپ جاتقان وقيعالاردىڭ تولىق كورىنىسىن باقىلاۋ دا ماڭىزدى. قازىرگى ۋاقىتتا ەلەكتروندى كارتانى پايدالانۋ تاپتىرماس مۇمكىندىك دەپ بىلەمىن. بۇل جوباعا دەيىن دە استانامەن تىعىز قارىم-قاتىناستا جۇمىس ىستەگەنبىز. دوستىعىمىزدىڭ ودان ارى جالعاساتىنىنا سەنەمىن» دەپ اتاپ ءوتتى قول قويۋ راسىمىنەن كەيىن فرانسيس ەتەن.

جوبانى تولىقتاي قارجىلاندىرۋدى فرانتسۋزدار ءوز مىندەتتەرىنە العان. جۇزەگە اسىرۋ ءۇشىن شامامەن 3 ملن ەۋرو جۇمسالادى دەگەن بولجام بار. ال, ەلوردا اكىمدىگى جوبانىڭ كەدەرگىسىز جۇزەگە اسىپ, تولىقتاي ورىندالۋىن قاداعالايتىن بولادى.