گاز تارتىلماي, ءتۇتىن ارىلمايدى

استانا اۋا اتموسفەراسىنىڭ تازارۋى ءۇشىن قالا گازبەن جىلىتۋ جۇيەسىنە كوشۋى قاجەت. بۇل تۋرالى اكىمدىكتە وتكەن بريفينگ بارىسىندا ايتىلدى.

جالپى, قىس تۇسسە, ەلوردانىڭ اسپانىن ءتۇتىن باسۋى ۇيرەنشىكتى جاعدايعا اينالدى. وعان جىلۋ ەلەكتر ورتالىقتارى مەن اۆتونومدى قازاندىقتاردان, جەكە سەكتورلارداعى ۇيلەردىڭ مۇرجاسىنان شىعاتىن ءتۇتىن جانە اۆتوكولىكتەردەن بولىنەتىن گاز جەل سوقپاعان كۇندەرى اۋانى تورۋىلداپ تۇرىپ الاتىنى سەبەپ بولادى.
– مەنىڭ ويىمشا, گاز تارتۋ جۇمىسى رەتكە كەلتىرىلگەننەن كەيىن جاعداي ەداۋىر جاقسارۋى ءتيىس. بيىل دا استانادا تۇتىنگە بايلانىستى پروبلەما بولۋى مۇمكىن, – دەيدى استانا قالاسىنىڭ قورشاعان ورتانى قورعاۋ جانە تابيعاتتى پايدالانۋ باسقارماسى باسشىسىنىڭ ورىنباسارى مىندەتىن اتقارۋشى ءابدىماناپ جۇمادىلداەۆ.
ونىڭ ايتۋىنشا, جىلۋ-ەلەكتر ورتالىق­تارىنىڭ مۇرجالارى ۇزارتىلىپ, ولاردىڭ بيىكتىگى 120 مەترگە جەتكىزىلىپتى. وسىنىڭ ارقا­سىندا ءتۇتىننىڭ ءبىراز بولىگى ەندى قالا اۋماعىنا بۇرىلمايتىن كورىنەدى.
ال قالانىڭ قىسقا دايىندىعى مەن ەلوردانى گازداندىرۋ جونىندە وتىن-ەنەرگەتيكالىق كەشەنى جانە كوممۋنالدىق شارۋاشىلىعى باسقارماسى وتىن-ەنەرگەتيكالىق رەسۋرستار ءبولىمىنىڭ باسشىسى ماقسات ەسماعۇلوۆ ايتتى.
ونىڭ سوزىنشە, گاز ءبىرىنشى كەزەكتە كوكتال-1 جانە كوكتال-2 تۇرعىن الاپتارىنا, ەكىنشى كەزەكتە ميچۋرين, ينتەرناتسيونالنىي, تەلمان, Garden Village جانە Family Village تۇرعىن الاپتارىنا تارتىلماق. ال ءۇشىنشى كەزەكتە 2025 جىلعا دەيىن ۇركەر, ءوندىرىس تۇرعىن الاپتارى مەن شۇبار ىقشام اۋدانى گازداندىرىلماق. جەكە ۇيلەردىڭ يەلەرى گازدى ءوز قارجىسى ەسەبىنەن تارتاتىن كورىنەدى.
– كەز كەلگەن ينجەنەرلىك ينفراقۇرىلىم نىسانى سەكىلدى مۇنىڭ ءبارى تەحنيكالىق شارتتارعا سايكەس بولادى. گاز تارتۋ جۇمىسى ەنەرگيا مەن سۋ تارتۋ جۇيەسىنە ۇقساس كەلەدى. سوندىقتان گاز تەك نەگىزگى جەلىلەرگە, ياعني نەگىزگى كوشەلەرگە تارتىلادى. ال جەكە سەكتورعا گاز تارتۋ ماسەلەسى ۇيلەردىڭ ورنالاسۋىنا قاراي بەلگىلەنەدى, – دەدى م.ەسماعۇلوۆ.