سارىارقا اۋدانى اۋماعىندا بارلىعى 540 اۋلا بار. ولاردىڭ 77,5 پايىزى قاناعاتتانارلىق جاعدايدا. بيىل 40 اۋلا جوندەلىپ جاتىر. بىلتىر اۋداندا تابىستى جۇزەگە اسىرىلعان «بيۋدجەتكە قاتىسۋ» جوباسى وسى جىلى دا قولعا الىندى. سونىڭ اياسىندا 13 اۋلانى اباتتاندىرۋ جۇرگىزىلۋدە. قازىرگى ۋاقىتتا بىرقاتار اۋلانى كوركەيتۋ ءىسى تولىعىمەن اياقتالدى.
وسى جازدا ەلورداعا تابيعي گاز كەلدى. بۇل جىلدىڭ اۋىز تولتىرىپ ايتارلىقتاي ۇلكەن جاڭالىعى بولدى. بىرنەشە الەۋمەتتىك نىسان مەن جەكە تۇرعىن ۇيلەر «كوگىلدىر وتىنعا» قوسىلىپ تا ۇلگەردى. جوسپار بويىنشا جاقىنداپ قالعان جىلىتۋ ماۋسىمىندا ءبىراز ءۇي گازبەن جىلىتىلادى. بۇل ءىستىڭ بارىسى تۋرالى سارىارقا اۋدانىنىڭ اكىمى ەرعالي ەگەمبەردى ايتىپ بەردى.
ونىڭ ايتۋىنشا, گاز جەلىسىنىڭ ۇزىندىعى 200 شاقىرىمدى قۇرايدى. بۇگىندە ونىڭ جارتىسىنان استامى, ياعني 101 شاقىرىمى تارتىلدى. قازىر ورامىشىلىك قۇبىرلار تارتىلۋدا.
– «كوكتال-1» تۇرعىن الابىندا بارلىعى 91 كوشە بار. ونىڭ 88-ىنە قۇبىر تارتۋ اياقتالدى. «كوكتال-2»-دە جالپى كوشەلەر سانى – 41. ءتيىستى جۇمىس ەكى كوشەدە قالدى. «اگروقالاشىقتاعى» 94 كوشەنىڭ 22-سىندە گاز جەلىلەرىن سالۋ جوسپارلاندى. ءبىر ايتا كەتەرلىگى, بۇل جوبا بىرنەشە جىلعا ارنالعان. قازىر اتالعان اۋماقتاردا 10230 جەكە تۇرعىن ءۇي بار. سونىڭ ىشىندە بيىل 5000-نان استام ءۇيدى گازداندىرۋ جوسپارلانۋدا. ءبىز ورامىشىلىك قۇبىرلاردى جۇرگىزەمىز. ال گازدى كوشەدەن ۇيىنە تۇرعىندار ءوز قارجىسىنا تارتادى. بۇل جۇمىس, قاجەتتى قوندىرعىلاردى ساتىپ الۋدى قوسقاندا, شامامەن العاندا 300 مىڭ تەڭگەدەن اسادى. ەسەپتەگىش قۇرالدارى اكىمدىك ەسەبىنەن ورناتىلادى. تەحنيكالىق شارتتاردى بەرۋ جۇمىستارى باستالدى. ونى الۋ ءۇشىن جۇمىس كۇندەرى «كوكتال-1» تۇرعىن الابىنداعى بولاشاق كوشەسى, 4/2 مەكەنجايىنا بارۋ كەرەك, – دەيدى ەرعالي ەگەمبەردى.
جالپى العاندا, بيىل «كوكتال-1» جانە «كوكتال-2», «اگروقالاشىق», «پرومىشلەننىي», «جەلەزنودوروجنىي» تۇرعىن الاپتارى جانە «وڭتۇستىك-شىعىس» اۋدانىنىڭ بىرقاتار ۇيلەرى گازعا قوسىلىپ, جەو-1 جانە جەو-2 گازعا اۋىستىرىلادى.
وندىرىستىك سەكتور مەن تۇرعىن الاپتاردى گازداندىرۋ 3 كەزەڭدە جۇرگىزىلەدى. ەكىنشى كەزەڭدە «كوگىلدىر وتىن» «ميچۋرينو», «ينتەرناتسيونالنىي», «كۇيگەنجار», «تەلمان», «پريگورودنىي» تۇرعىن الاپتارى مەن Garden Village جانە Family Village كوتتەدجەر قالاشىقتارىنا جەتكىزىلەدى. ءۇشىنشى كەزەڭدە «يلينكا», «شۇبار», «ءوندىرىس» تۇرعىن الاپتارى گازداندىرىلاتىن بولادى. جوبانى ىسكە اسىرۋ مەرزىمى 2020-2023 جىلدارعا جوسپارلانعان.
