كارانتيندىك شەكتەۋ شارالارىنىڭ كەزەڭ-كەزەڭىمەن جەڭىلدەۋىنە بايلانىستى ازاماتتارعا كەيبىر مەديتسينالىق قىزمەتتەر قاشىقتان كورسەتىلەدى. وسىعان وراي الەۋمەتتىك مەديتسينالىق ساقتاندىرۋ قورىنىڭ ەلوردا بويىنشا فيليالى قالا تۇرعىندارىنا سول قىزمەتتەردى ەمحاناعا كەلمەي-اق قالاي الۋعا بولاتىنىن ءتۇسىندىردى.
بۇرىن قاشىقتان كەڭەس بەرۋ تەك سوزىلمالى اۋرۋلارى بار ناۋقاستاردى ديناميكالىق باقىلاۋ كەزىندە قولدانىلاتىن. ال بيىل 17 شىلدەدەن باستاپ كۇشىنە ەنگەن «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكستىڭ 129-بابىنا سايكەس قاشىقتان مەديتسينالىق قىزمەت كورسەتۋدىڭ جاڭا ەرەكشەلىكتەرى قاراستىرىلدى. وسىلايشا ەندى سالالىق مامانداردىڭ كەڭەستەرى, تەلەمەديتسينا ارقىلى كونسۋلتاتسيالار, سونداي-اق رەنتگەن ءتۇسىرىلىمىن قايتا وقىتۋ, ەلەكتروكارديوگرامما تاڭبالارىن ءتۇسىندىرۋ قىزمەتتەرى ەندى قاشىقتان قابىلداۋ كەزىندە دە قولجەتىمدى بولدى. بۇل زاماناۋي تەحنولوگيالار مەن ءتۇرلى بايلانىس ارنالارىنىڭ ارقاسىندا مۇمكىن بولىپ وتىر. الداعى ۋاقىتتا قاشىقتان كورسەتىلەتىن قىزمەتتەر ءتىزىمى كەڭەيتىلمەك.
ونلاين-كەڭەس قالاي بەرىلەدى؟
الدىمەن ءوز ەمحاناڭىزدىڭ Call-ورتالىعى نەمەسە باسقا بايلانىس ارنالارى, موبيلدىك قوسىمشالار ارقىلى دارىگەردىڭ كەڭەسىنە جازىلۋ كەرەك. سوسىن كەڭەس بەرۋ كۇنى مەن ۋاقىتىن تاڭداپ, سالالىق ماماننىڭ قابىلداۋىنا جازىلۋ ءۇشىن ۋچاسكەلىك دارىگەردەن جولداما الۋ قاجەت. ول ءۇشىن ءوزىڭىزدىڭ تەراپەۆت/جالپى پراكتيكا دارىگەرىنىڭ قابىلداۋىنا ءوتىنىم جىبەرەسىز. ودان ءارى تاڭدالعان بايلانىس ارناسى ارقىلى ماماننىڭ بەلگىلەنگەن ۋاقىتتا قوڭىراۋىن كۇتىڭىز.
– دارىگەردەن كەڭەس الۋ ءۇشىن ەمحاناعا بارۋدىڭ قاجەتى جوق. دارىگەر كەڭەسى ناۋقاس قاي جەردە بولماسىن, قاشىقتان قولجەتىمدى. سونىمەن قاتار دارىگەر ءدارى-دارمەكتەرگە رەتسەپت جازىپ بەرە الادى. سىرقاتتاما پاراقشالارىن, زەرتحانالىق زەرتتەۋلەردىڭ, تەكسەرۋلەردىڭ ناتيجەلەرىن دە ايتىپ بەرەدى. سىرقاتتار مەن جاراقاتتاردى دياگنوستيكالاۋ, ەمدەۋ, مەديتسينالىق وڭالتۋ جانە الدىن الۋ, زەرتتەۋلەر مەن باعالاۋ ءۇشىن مەديتسينالىق قىزمەتتەر ساندىق تەحنولوگيالار ارقىلى قاشىقتان ۇسىنىلادى. ياعني, وسى قىزمەتتەردى الۋ ءۇشىن ەمحاناعا كەلۋدىڭ قاجەتى جوق» دەيدى «امسق» كەاق نۇر-سۇلتان قالاسى بويىنشا فيليالى ديرەكتورىنىڭ ورىنباسارى ايناگۇل داۋلەتشينا.
ۋچاسكەلىك دارىگەردىڭ قاشىقتان كەڭەس بەرۋى العاشقى مەديتسينالىق-سانيتارلىق كومەك بەرەتىن مەديتسينالىق ۇيىمداردىڭ, ياعني, ەمحانالاردىڭ جان باسىنا شاققانداعى نورماتيۆ تولەمى شەڭبەرىندە تمككك تىزبەسىنە ەنەدى. ال سالالىق مامانداردىڭ كونسۋلتاتسيالارى مەن ناقتى كورسەتىلگەن قىزمەتتەرى, ياعني تمككك بويىنشا قىزمەت كورسەتىلەتىن سوزىلمالى, الەۋمەتتىك ءمانى بار جانە ينفەكتسيالىق اۋرۋلاردان باسقاسى ءمامس پاكەتىنە كىرەدى. قانداي دا ءبىر سۇراقتار تۋىنداعان جاعدايدا ازاماتتار مەديتسينالىق ساقتاندىرۋ قورىنىڭ Qoldau 24/7 موبيلدىك قوسىمشاسى ارقىلى كومەككە جۇگىنە الادى.
