ەلوردانىڭ ەكولوگياسىنا دا, قالا تۇرعىندارىنىڭ ومىرىنە دە وڭ اسەرىن تيگىزەتىن كوگىلدىر وتىن ماسەلەسى – باس شاھاردىڭ باستى پروبلەمالارىنىڭ ءبىرى. اسىرەسە, ۇيىنە گاز كىرگىزۋ ءۇشىن قۇجات جيناۋ بويىنشا تۇرعىندار اكىمدىككە ءجيى جۇگىنىپ جاتادى. بۇل تۋرالى قالا اكىمى التاي كولگىنوۆ ءمالىم ەتتى.
– وسىعان دەيىن گازعا قوسىلۋ ءۇشىن مىندەتتى تۇردە قۇجاتتىڭ 8 ءتۇرى تالاپ ەتىلىپ, ءىس بىرنەشە ايعا (6 ايدان اسا) سوزىلىپ كەتەتىن. ەندى وسىعان بايلانىستى قۇجاتتار ءتىزىمىن قىسقارتۋدى جوسپارلاپ وتىرمىز. بۇل شارا مەملەكەت باسشىسىنىڭ «مەملەكەتتىك اپپاراتتىڭ قىزمەتىن بيۋروكراتيادان ارىلتۋ جونىندەگى شارالار تۋرالى» جارلىعى اياسىندا قابىلدانادى. بۇعان دەيىن ەنەرگەتيكا, ۇلتتىق ەكونوميكا مينيسترلىكتەرىنىڭ, «QazaqGaz» ۇك» اق جانە ت.ب. قاتىسۋىمەن ۇكىمەتتە ارنايى كەڭەس ءوتىپ, گازعا قوسىلۋ بويىنشا قۇجاتتار ءتىزىمىن قىسقارتۋ ماسەلەسىن قاراستىردىق, – دەدى ا.كولگىنوۆ.
ەلوردا اكىمىنىڭ ايتۋىنشا, بۇگىنگى تاڭدا باس قالاداعى سارىارقا جانە الماتى اۋداندارى تولىقتاي گازداندىرىلدى. ول ءۇشىن 680 كم-دەن استام گاز تاراتۋ جەلىسى سالىنىپ, كۆارتال ىشىنە جەلىلەر تارتىلدى.
«قازىرگى كەزدە قالا بويىنشا 14 مىڭ ابونەنت گازعا قوسىلدى, 6 مىڭنان استام ابونەنت تەحنيكالىق شارتتار الدى, سول سياقتى 3,5 مىڭنان استام (25%-دان استام) ءۇي گازعا قوسىلدى. وسىعان قاتىستى بىرقاتار جەڭىلدىكتەر قابىلدانىپ, مۇقتاج ساناتتاعى تۇرعىنداردىڭ گازعا قوسىلۋى ءۇشىن الەۋمەتتىك كومەك ءبولىندى. ونىڭ مولشەرى 413 مىڭ تەڭگەگە دەيىن ۇلعايدى. قالا تۇرعىندارىنىڭ بارىنە تەگىن تۇردە ەسەپتەگىشتەر بەرىلەدى, سونداي-اق پايىزسىز كرەديت بەرۋ باعدارلاماسى دا بار.
جازدا بايقوڭىر جانە ەسىل اۋداندارىندا گاز قۇبىرىن تارتۋ جۇمىسىن باستايمىز. ماسەلەن, «يلينكا» (ۇركەر), «ءوندىرىس», «پريگورودنىي», «تەلمان» ەلدى مەكەندەرى, «Family Village», «Garden Village» شاعىن اۋداندارى جانە ت.ب. سول سياقتى «شۇبار» شاعىن اۋدانىندا جوبالاۋ جۇمىسى ءجۇرىپ جاتىر. ەسىل جانە بايقوڭىر اۋداندارىندا الدىمەن جەتكىزۋشى گاز قۇبىرىن, ال كەلەسى جىلى كۆارتال ىشىنە جەلىلەر سالامىز.
سونىمەن قاتار جەو-1 جانە جەو-2-دە باس-اياعى 13 سۋ جىلىتۋ قازاندىعى گازعا اۋىستىرىلدى. ال جەو-3 قۇرىلىسى قايتا جانداندى, قۇرىلىسى ءجۇرىپ جاتقان جاڭا اۋدانداردى جىلۋمەن قامتاماسىز ەتۋ ءۇشىن 3 گاز قازاندىعىن جوبالاۋ جۇمىسى ءجۇرىپ جاتىر» دەدى اكىم.
قولعا الىنعان شارۋالاردىڭ ءبارى قالانىڭ ەكولوگياسىن جاقسارتا تۇسەدى. گازداندىرۋ جۇمىسى مەملەكەت باسشىسىنىڭ تىكەلەي باقىلاۋىندا.
