كەشە ەلورداداعى ماحامبەت وتەمىسۇلى اتىنداعى وقۋشىلار سارايىندا نۇر-سۇلتان قالاسى اكىمىنىڭ اتىنان از قامتىلعان جانە كوپبالالى وتباسىلاردان شىققان, ەلەۋلى جەتىستىكتەرگە جەتكەن بالالارعا جاڭا جىلدىق سىيلىق تاپسىرۋ شاراسى ءوتتى.
بۇعان دەيىن ءداستۇرلى تۇردە ۇلكەن سالتاناتپەن تويلاناتىن مەرەكەلىك شارا بيىل پاندەميا جاعدايىنا بايلانىستى ەرەكشە تۇردە ۇيىمداستىرىلدى. بالالارعا جاڭا جىلدىق سىيلىقتى اياز اتا مەن اقشاقار سانيتارلىق نورمالاردى ساقتاي وتىرىپ, ۇيلەرىنە ارنايى جەتكىزىپ تابىستادى. «بۇگىن قالا اكىمىنىڭ اتىنان 450 بالاعا مەرەكەلىك سىيلىقتار تاپسىردىق. كارانتيندىك شەكتەۋلەرگە بايلانىستى جاڭا جىلدىق شىرشالار وتكىزىلگەن جوق. بىراق وعان قاراماستان ءبىز بالالاردى قۋانتۋدى ءجون كوردىك. سىيلىق جيىنتىعىنىڭ ىشىندە قالا اكىمىنىڭ اتىنان قۇتتىقتاۋ اشىق حاتى, ۇستەل ويىندارى مەن تاتتىلەر, سونداي-اق كيىم دۇكەندەرىنە سەرتيفيكاتتار بار. وتباسىلاردى تاڭداۋ بارىسىندا مەكتەپ جانىنان قۇرىلعان قامقورشىلىق كەڭەس ۇسىنىس بەردى» دەدى ءبىلىم باسقارماسىنىڭ تاربيە جۇمىسى جانە قوسىمشا ءبىلىم بەرۋ ءبولىمى باسشىسى اقمارال حون.
جىل سايىن اياز اتانى اسىعا كۇتىپ, تاقپاعىن ايتۋعا اسىعاتىن قامكوڭىل بالا مەن تىلەكشى اتا-انالار دا يگى باستاماعا قۋانىپ, ءوز تىلەكتەرىن ايتتى. «بالامنىڭ جەتكەن جەتىستىكتەرى مەن تالپىنىسىن ەسكەرىپ, مەرەكەمەن قۇتتىقتاپ كەلىپ جاتقان بارشا ءبىلىم باسقارماسىنىڭ قىزمەتكەرلەرىنە العىس ايتامىن. مۇراگەردىڭ مەكتەپتە كوزگە ءتۇسىپ ونلاين بولسا دا اكىم شىرشاسىنا قاتىسىپ, سىيلىق العانىنا قۋانىشتىمىن» دەدى كوپبالالى انا ءۇمىت سەيسەمباەۆا.
اياز اتا مەن اقشاقار وقۋشىلاردىڭ ۇيىنە توسىننان بارسا دا, بالالاردىڭ ولارعا كورسەتەتىن ونەرلەرى دايىن ەكەن. «مەن وسكەندە ەلىمدى الەمگە تانىتاتىن ازامات بولعىم كەلەدى. مەكتەپتە ماتەماتيكادان جانە باسقا پاندەردەن عىلىمي جوبالارعا قاتىسىپ ءجۇرمىن. بارشا قازاقستاندىقتارعا دەنساۋلىق پەن تابىس تىلەيمىن. جاڭا جىل ءار وتباسىعا باقىت اكەلسىن. كارانتين تالاپتارىن ساقتاي وتىرىپ وتكىزىلگەن شىرشا كەشى ماعان ۇنادى. سەبەبى ءبارى تەز جانە قىزىقتى بولدى» دەدى جامبىل جاباەۆ اتىنداعى №4 مەكتەپ-گيمنازياسىنىڭ وقۋشىسى مۇراگەر ساتان.
ايتا كەتەيىك, بارلىق ءبىلىم بەرۋ ۇيىمدارىندا بەكىتىلگەن شارالار جوسپارعا سايكەس ونلاين فورماتتا وتكىزىلەدى.
