ۇكىمەت باسشىسى اسقار ءماميننىڭ توراعالىعىمەن نۇر-سۇلتان قالاسى جاڭا ورتالىعىنىڭ قۇرىلىسىن باقىلاۋ جونىندەگى مەملەكەتتىك كوميسسيانىڭ وتىرىسى ءوتتى.
2019-2023 جىلدارعا ارنالعان نۇر-سۇلتان قالاسى قۇرىلىسىنىڭ كەشەندى جوسپارىن جۇزەگە اسىرۋ تۋرالى قالا اكىمى ا.كولگىنوۆ, تۇرعىن ءۇي سالۋ, ينجەنەرلىك جانە جول-كولىك ينفراقۇرىلىمىن دامىتۋ تۋرالى يندۋستريا جانە ينفراقۇرىلىمدىق دامۋ ءمينيسترى ب.اتامقۇلوۆ, ەلوردانى گازداندىرۋ تۋرالى ەنەرگەتيكا ءمينيسترى ن.نوعاەۆ, مەكتەپتەر سالۋ تۋرالى ءبىلىم جانە عىلىم ءمينيسترى ا.ايماعامبەتوۆ, حالىقتى سۋمەن قامتاماسىز ەتۋ جاعدايى تۋرالى ەكولوگيا, گەولوگيا جانە تابيعي رەسۋرستار ءمينيسترى م.مىرزاعاليەۆ, سونداي-اق ورتالىق مەملەكەتتىك ورگانداردىڭ باسقا دا باسشىلارى بەيىندى جۇمىس باعىتتارى تۋرالى باياندادى.
بيىل نۇر-سۇلتان قالاسىندا شامامەن 3 ملن شارشى مەتر تۇرعىن ءۇي, سونىڭ ىشىندە 8 مىڭ قولجەتىمدى پاتەر پايدالانۋعا بەرىلەدى. تۇرعىن ءۇي الاپتارىنىڭ ينجەنەرلىك-كوممۋنيكاتسيالىق ينفراقۇرىلىمىن دامىتۋ جۇمىستارى جۇرگىزىلىپ جاتىر. ۇلەسكەرلەر ماسەلەسىن شەشۋ اياسىندا بيىل 20 نىساننىڭ قۇرىلىسى اياقتالادى (2019 جىلى – 10). جەلتوقسان ايىنىڭ باسىندا 7 جىلدىق تاريحى بار «گارانت» تۇرعىن ءۇي كەشەنى پايدالانۋعا بەرىلدى. قالعان 22 پروبلەمالىق نىساندى 2021-2023 جىلدار ارالىعىندا پايدالانۋعا بەرۋ كوزدەلگەن.
بيىل ەلوردادا 150 اۋلا جانە 60 قوعامدىق كەڭىستىك (760 مىڭ شارشى مەتر) اباتتاندىرىلدى, 106 مىڭ جاسىل جەلەك وتىرعىزىلدى. №1 جىلۋ-ەلەكتر ورتالىعى جانە №2 جىلۋ-ەلەكتر ورتالىعى ءىشىنارا گازعا اۋىستىرىلدى. «كوكتال» تۇرعىن الابىنا اپاراتىن گاز قۇبىرىنىڭ قۇرىلىسى اياقتالدى. «جەلەزنودوروجنىي» تۇرعىن الابىندا 100 پايىز تاراتۋ جەلىلەرى سالىندى. «اگروقالاشىقتىڭ» ءبىر بولىگى, «كوكتال-1», «كوكتال-2» تۇرعىن ءۇي الاپتارى اياقتالۋ ساتىسىندا تۇر, «كۇيگەنجار», «ميچۋرينو», «ينتەرناتسيونالنىي» تۇرعىن ءۇي الاپتارىن گازداندىرۋ جۇمىستارى جۇرگىزىلۋدە. جالپى العاندا, ەلوردانىڭ تۇرعىن ءۇي الاپتارىندا 300 كم-گە جۋىق گاز قۇبىرى سالىندى, 5 مىڭنان استام ءۇي گازبەن جابدىقتاۋ جۇيەسىمەن قامتاماسىز ەتىلدى.
اعىمداعى جىلى ەلوردادا 12 مەكتەپتىڭ قۇرىلىسى اياقتالدى, بۇل وتكەن جىلدىڭ كورسەتكىشىنەن 2 ەسەگە كوپ. 2021 جىلى قوسىمشا 15 مەكتەپ سالىپ, پايدالانۋعا بەرۋ جوسپاردا بار. وتىرىسقا قاتىسۋشىلار تۇرعىن ءۇيدىڭ قولجەتىمدىلىگىن ودان ءارى ارتتىرۋ, الەۋمەتتىك نىساندار قۇرىلىسى, تىرشىلىكتى قامتاماسىز ەتۋ جانە كولىك ينفراقۇرىلىمىن دامىتۋ, الەۋمەتتىك ماڭىزى بار ازىق-تۇلىك ونىمدەرىنىڭ باعاسىن ۇستاپ تۇرۋ ءتارىزدى جۇيەلى ماسەلەلەردى قاراستىردى. پرەمەر-مينيستر قالانىڭ قىسقا مەرزىمدى جانە ۇزاق مەرزىمدى دامۋىنا قاتىستى بارلىق ماسەلەلەر بەس جىلدىق كەزەڭگە ارنالعان ەلوردانىڭ ىقشام قۇرىلىسى جونىندەگى كەشەندى جوسپارمەن ۇيلەستىرىلۋى ءتيىس ەكەنىن اتاپ ءوتتى.
«قازاقستاننىڭ تۇڭعىش پرەزيدەنتى – ەلباسى نۇرسۇلتان ءابىشۇلى نازارباەۆ پەن مەملەكەت باسشىسى قاسىم-جومارت كەمەلۇلى توقاەۆ ەلوردانى دامىتۋعا ەرەكشە كوڭىل بولەدى. نۇر-سۇلتان قالاسى قۇرىلىسىنىڭ كەشەندى جوسپارىنىڭ ءىس-شارالارىن ساپالى ءارى ۋاقىتىلى ورىنداۋ ءۇشىن بارلىق شارالاردى قابىلداۋ قاجەت» دەدى ا.مامين. ۇكىمەت باسشىسى ەلوردانى دامىتۋعا ينۆەستيتسيالار تارتۋ بويىنشا جۇمىستى جانداندىرۋ قاجەتتىگىنە, تۇرعىن ءۇي, الەۋمەتتىك-مادەني جانە كولىك ينفراقۇرىلىمى قۇرىلىسىنىڭ جوسپارلانعان كولەمىن قامتاماسىز ەتۋگە, سونداي-اق قالانى سۋمەن قامتاماسىز ەتۋ جانە اباتتاندىرۋ پروبلەمالارىن شەشۋ قاجەتتىگىنە نازار اۋداردى.
