استاناداعى «دوستىق ۇيىندە» انالار كۇنىنە ارنالعان مەدياتسيا بويىنشا كەزدەسۋ ءوتتى, دەپ حابارلادى astana-akshamy.kz
اتالعان ءىس-شارانىڭ ماقساتى ايەل-انانىڭ قوعامداعى,وتباسىنداعى, جاس ۇرپاقتى تاربيەلەۋدەگى ءرولىن ايقىنداپ, وتباسىلىق قۇندىلىقتاردى دارىپتەۋ.
استانا قالاسىنىڭ ىشكى ساياسات باسقارماسى Qazaqstan jastary قوعامدىق قورىمەن بىرلەسە ۇيىمداستىرعان دوڭگەلەك ۇستەلگە بەلگىلى مەدياتورلار مەن پسيحولوگتار, باسقا دا قوعام بەلسەندىلەرى جانە جاستار قاتىستى.
ءىس-شارانىڭ مودەراتورى روزا بەكىشەۆا اتالعان كۇننىڭ تاريحىن تانىستىرىپ ءوتتى.
«انالار كۇنى ءبىزدىڭ ەلىمىزدە 2012 جىلدان باستاپ اتالىپ ءوتىپ جۇرگەنمەن, بيىل حالىقارالىق مەرەكە رەتىندە ءبىرىنشى رەت تويلانىپ وتىر. بۇل كۇن مامىردىڭ ەكiنشi جەكسەنبiسiندە اتالىپ وتەدى, بيىل 12 مامىرعا سايكەس كەلiپ وتىر. انالار كۇنى – بۇۇ-نىڭ حالىقارالىق ۇيىمى مويىنداعان مەرەكە. ول كوپتەگەن ەلدە تويلانادى. بيىل وسى مەيرامدى اتاپ وتەتىن ەلدەرگە قازاقستان دا قوسىلدى. بۇل مەرەكەنىڭ تاريحى امەريكادان باستاۋ العان. ياعني, XIX عاسىردا اقش-تا پايدا بولدى», – دەدى ر.بەكىشوۆا.
العاشقى ءسوز كەزەگىن العان استانا قالاسى ىشكى ساياسات باسقارماسى باسشىسىنىڭ ورىنباسارى ءلاززات قۇسايىنوۆا اتالعان كۇننىڭ ءمان-ماڭىزىنا توقتالدى.
«قازاقستان – وتباسىعا قاتىستى ءتۇرلى حالىقارالىق كەلىسىمدەر مەن شارتتاردىڭ, جالپى العاندا, گەندەرلىك ساياساتتى بەلسەندى تۇردە جۇزەگە اسىرۋشى مەملەكەتتەردىڭ ءبىرى. قازاقستان – ەجەلدەن ورتالىق ازيا اۋماعىنداعى, بالكىم, الەمدىك كەڭىستىكتەگى انا تۇلعاسىنا فيلوسوفيالىق كوزقاراستا بولعان مەملەكەت. بۇعان ءتۇرلى ماقال-ماتەلدەر مەن كۇنى بۇگىنگە دەيىن قولدانىلىپ جۇرگەن تەرمينولوگيامىز دالەل. ءبىر قولىمەن بەسىكتى, ءبىر قولىمەن الەمدى تەربەتكەن انا قاي سالادا دا بەلسەندى ەكەنىن ايتۋىمىز كەرەك. بۇل ءسوز قازاقتىڭ ءاۋ باستان وتباسىنداعى انانىڭ رولىنە ەرەكشە ءمان بەرگەنىن كورسەتەدى. ويتكەنى بالا تاربيەسى انادان باستالادى.
سول سياقتى «انا ءتىلى» دەيمىز. ويتكەنى بالا, ەڭ ءبىرىنشى, انا تىلىندە سويلەيدى. وسى سوزدەردىڭ, وسى تىركەستەردىڭ ماعىناسىنا بويلاساق, فيلوسوفيالىق وي-تولعانىستارعا تەرەڭدەي تۇسەر ەدىك. بىراق نەگىزگى ءمانى كەز كەلگەن وتباسىندا, كەز كەلگەن جۇيەدە, كەز كەلگەن ەلدە انانىڭ رولىنە باعا جەتپەيتىندىگىندە», – دەدى ل.قۇساينوۆا.
العىسوزدەردەن سوڭ زاڭگەرلەر مەن مەدياتورلار جانە وزگە دە قوعام بەلسەندىلەرى انا مەن وتباسى ماسەلەلەرى توڭىرەگىندە ءسوز سويلەپ, وسىعان قاتىستى قوعامداعى پروبلەمالاردى شەشۋ جولىن تالقىلادى.
