ساعادات نۇرماعامبەتوۆ پەن راقىمجان قوشقارباەۆقا ارنالعان سپورت فەستيۆالى وتەدى
جەڭىس كۇنىنە وراي ساعادات نۇرماعامبەتوۆ پەن راقىمجان قوشقارباەۆتىڭ رۋحىنا باعىشتالعان ايتۋلى مادەني-سپورتتىق ءىس-شارا وتپەك, دەپ حابارلايدى astana-akshamy.kz
بۇل تۋرالى «اتامنىڭ اماناتى» قوعامدىق بىرلەستىگى باسقارما توراعاسىنىڭ ورىنباسارى ابۋباكىر سمايىلوۆ ءمالىم ەتتى.
«26 مامىردا ەلورداداعى ترياتلون پاركىندە ساعادات نۇرماعامبەتوۆ پەن راقىمجان قوشقارباەۆتىڭ 100 جىلدىعىنا ارنالعان سپورت فەستيۆالى وتەدى. ول جەردە جۇگىرۋ, ارقان تارتۋ, اسىق اتۋ, كىر تاسىن كوتەرۋ جانە باسقا دا ۇلتتىق سپورت تۇرلەرىنەن جارىس ۇيىمداستىرماق ويىمىز بار. سپورتتىق شارادان تىس, كونتسەرت بولادى, كوپشىلىك الدىندا قورعانىس مينيسترلىگىنىڭ جانە ۇلتتىق ۇلاننىڭ ءان-بي انسامبلدەرى ونەر كورسەتەدى», – دەدى ابۋباكىر سمايىلوۆ اگەنتتىك تىلشىسىنە بەرگەن سۇحباتىندا.
اتالعان شارانى ۇيىمداستىرۋعا قوعامدىق بىرلەستىكتەن بولەك, قورعانىس مينيسترلىگى مەن ەلوردا اكىمدىگى ۇيىتقى بولىپ وتىر.
