قالالىق ءماسليحاتتا وتكەن اپتادا تۇراقتى كوميسسيالاردىڭ وتىرىسى ءوتتى, دەپ حابارلايدى astana-akshamy.kz
سەنبى كۇنى ازامات ءايتحوجيننىڭ توراعالىعىمەن وتكەن زاڭدىلىق, قۇقىقتىق ءتارتىپ جانە جۇرتشىلىقپەن جۇمىس ماسەلەلەرى جونىندەگى تۇراقتى كوميسسيانىڭ وتىرىسىندا جەر تەلىمىن مەملەكەتتىك مۇقتاجدىقتار ءۇشىن الۋعا بايلانىستى جەر ۋچاسكەلەرىن نەمەسە وزگە دە جىلجىمايتىن مۇلىكتى يەلىكتەن شىعارۋ تۋرالى شارتتاردى كەلىسۋ جايىندا ماسەلە قارالدى.
تۇرعىن ءۇي جانە تۇرعىن ءۇي ينسپەكتسياسى باسقارماسى باسشىسىنىڭ مىندەتىن اتقارۋشى بەيسەن ۇسەنوۆ ءسوز سويلەپ, ءماسليحاتتىڭ تۇراقتى كوميسسياسىنىڭ قاراۋىنا شىعارىلاتىن, مەملەكەتتىك مۇقتاجدىقتار ءۇشىن الۋعا بايلانىستى يەلىكتەن شىعارىلاتىن جەر ۋچاسكەلەرىنىڭ تىزبەسىن ۇسىندى. وتىرىس جۇمىسىنا وتەماقى سوماسىمەن كەلىسەتىن جەر ۋچاسكەلەرىنىڭ يەلەرى ونلاين رەجيمدە قاتىستى.
مەنشىك يەلەرىمەن كەزدەسۋ بارىسىندا تۇراقتى كوميسسيانىڭ توراعاسى ازامات ايتحوجين ولارعا جۇگىندى جانە ولار وتەماقى سوماسىمەن كەلىسكەندىكتەن, شارت جوبالارىن كەلىسۋ بويىنشا ماسەلە كەزەكتەن تىس سەسسيانى تالقىلاۋعا شىعارىلاتىنىن جانە ول بويىنشا ءتيىستى شەشىم قابىلداناتىنىن مالىمدەدى.
سونداي-اق بەيسەنبى كۇنى اسقار سماعۇلوۆتىڭ توراعالىعىمەن الەۋمەتتىك-مادەني دامۋ ماسەلەلەرى جونىندەگى جانە ۆلاديسلاۆ سەرگەەۆتىڭ توراعالىعىمەن قۇرىلىس, ەكولوگيا, كولىك جانە تۇرعىن ءۇي-كوممۋنالدىق شارۋاشىلىق ماسەلەلەرى جونىندەگى تۇراقتى كوميسسيالاردىڭ وتىرىسى ءوتتى.
العاشقى وتىرىستا دەپۋتاتتار «مادەني كلاستەرلەر ارقىلى ءبىلىم بەرۋ مەن مادەني ساۋاتتىلىقتى دامىتۋ. مادەني تۋريزم مەن حالىقارالىق ىنتىماقتاستىققا جاردەمدەسۋ. ەلوردانىڭ برەندبۋگىن قۇرۋ» سۇراقتارىن قارادى.
ال ەكىنشى وتىرىستىڭ كۇن ءتارتىبى: «استانا قالاسى بويىنشا قالالىق جانە قالا ماڭىنداعى قاتىناستاردا جولاۋشىلار مەن باگاجدى اۆتوموبيلدىك تۇراقتى تاسىمالداۋعا تاريفتەردى كەلىسۋ تۋرالى» بولدى.
