استانا قالاسىنداعى مەكتەپتە باتىر پوليتسيا قىزمەتكەرىنىڭ قۇرمەتىنە كادەت سىنىبى اشىلدى, دەپ حابارلايدى astana-akshamy.kz
ەلوردا پوليتسەيلەرى قالاداعى №85 مەكتەپ-ليتسەيدە عازيز بايتاسوۆ اتىنداعى پوليتسەيلەر اللەياسى مەن كادەت سىنىبىنىڭ اشىلۋ سالتاناتىن وتكىزدى.
اشىلۋ سالتاناتىنا استانا قالاسى پد باسشىلىعى, جەكە قۇرام, رەسپۋبليكالىق “جاسىل ەل” جوباسىنىڭ مۇشەلەرى قاتىستى. سونداي-اق شاراعا مارقۇم قىزمەتكەردىڭ تۋىستارى – اعاسى باقتىبەك پەن اپكەسى قۇندىز بايتاسوۆتار شاقىرىلدى.
بۇل شارا جاس ۇرپاقتى ناعىز ەرلىك پەن جانقيارلىق ۇلگىلەرى ارقىلى تاربيەلەۋدەگى ماڭىزدى قادام بولىپ تابىلادى. كادەت سىنىپتارىنىڭ قۇرىلۋى مەن جۇمىس ىستەۋى وسكەلەڭ ۇرپاقتى پاتريوتتىق رۋحتا تاربيەلەۋگە, بالالاردىڭ قۇقىقتىق دۇنيەتانىمىن, جوعارى رۋحاني-ادامگەرشىلىك جانە مورالدىق-پسيحولوگيالىق قاسيەتتەرىن قالىپتاستىرۋعا ىقپال ەتەدى.
وزگەنىڭ ءومىرىن ساقتاپ قالۋ ءۇشىن ءوزىن قۇربان ەتكەن پوليتسيا كاپيتانى عازيز بايتاسوۆتىڭ ەرلىگى ەشقاشان ۇمىتىلمايدى.
2011 جىلدىڭ 12 قاراشاسىندا تاراز قالاسىندا جامبىل وبلىسى ءىىد جول پوليتسياسى جەكە باتالونىنىڭ ءبىرىنشى ۆزۆودىنىڭ كومانديرى عازيز بايتاسوۆ وزگەلەردىڭ ءومىرى ءۇشىن ءوزىنىڭ جانىن قيىپ, اۋىر قىلمىستىڭ جولىن كەستى.
عازيز بايتاسوۆقا قازاقستان رەسپۋبليكاسى پرەزيدەنتىنىڭ جارلىعىمەن وتان الدىنداعى ەرەكشە قىزمەتى, قىزمەتتىك بورىشىن وتەۋ كەزىندە كورسەتكەن ەرلىگى مەن جانقيارلىعى ءۇشىن وعان قايتىس بولعاننان كەيىن “حالىق قاھارمانى” اتاعى بەرىلدى.
