جۋىردا ەلىمىزدەگى كينوتەاترلار نارىعىنىڭ 33 پايىزىن قامتيتىن Kinopark-Kinoplexx جەلىسىنىڭ باس ديرەكتورى الماز مالدىباەۆ بيىلعى 1 ساۋىردەن باستاپ اتالمىش جەلىلەر جۇمىسى توقتاۋعا ءماجبۇر بولاتىنىن مالىمدەدى. وعان گولليۆۋد ستۋديالارىنىڭ ءوز فيلمدەرىن رەسەيگە جونەلتۋدەن باس تارتۋى سەبەپ بولدى. اقش كينوتۋىندىلارى قازاقستانعا سولتۇستىكتەگى كورشىمىز ارقىلى ورىس تىلىنە دۋبلياجدالىپ كەلەدى ەكەن. رەسەيگە سالىنعان سانكتسيالار ەلىمىزگە مۇحيتتىڭ ارعى جاعىنان كەلەتىن فيلمدەردىڭ جولىن بوگەدى.
قازىر كينوتەاترلاردا قازاقستاندىق جانە ەۋروپا ەلدەرىنىڭ فيلمدەرى بولماسا, گولليۆۋدتىڭ تۋىندىلارى جوقتىڭ قاسى. ماسەلەن, ەلورداداعى «كەرۋەن» ساۋدا ويىن-ساۋىق ورتالىعىنداعى «Kinopark 7 IMAX Keruen» كينوتەاترىندا 1 ساۋىردەن باستاپ گولليۆۋدتىق ءبىر عانا «موربيۋس» ءفيلمى كورسەتىلىپ جاتىر. ال كەلەسى مامىر ايىندا كينوتەاترلار تابىسىنىڭ نەگىزىن قۇرايتىن امەريكالىق فيلمدەر مۇلدە كورسەتىلمەۋى مۇمكىن. سەبەبى كورەرمەندەرگە ۇسىناتىن دايىن كينو جوق. ەگەر جاعداي تەز ارادا شەشىلمەسە, گولليۆۋدتىڭ رەسەي ارقىلى كەلەتىن كينوتۋىندىلارىنا بايلاۋلى كينوتەاترلار شىنىمەن جابىلۋى مۇمكىن.
جاقىندا مادەنيەت جانە سپورت ءمينيسترى داۋرەن اباەۆتىڭ توراعالىعىمەن ەلىمىزدەگى كينويندۋستريانى دامىتۋ ماسەلەلەرىنە ارنالعان كەڭەس ءوتتى. جيىندا كينوپروكات ماسەلەلەرى دە تالقىلاندى. سوندا شەتەلدىك كومپانيالارمەن بارلىق قاجەتتى كەلىسسوزدەر جۇرگىزىلىپ جاتقانى ايتىلدى. اتاپ ايتقاندا, گولليۆۋدتىڭ ءۇش ستۋدياسى – Universal Pictures, Warner Bros جانە Paramount Pictures بۇرىن بەكىتىلگەن كەستەگە سايكەس قازاقستاندىق كورەرمەندەرگە ءوز كارتينالارىن ۇسىنۋدى جالعاستىراتىنى باياندالدى. ال Walt Disney Company جانە Sony كومپانيالارىمەن وتاندىق كينوپروكاتشىلار تىكەلەي كەلىسسوزدەر جۇرگىزۋدە. بۇل كەلىسسوزدەرگە مادەنيەت جانە سپورت مينيسترلىگىنىڭ وكىلدەرى دە قاتىسىپ جاتىر.
الماز مالدىباەۆتىڭ ايتۋىنشا, مينيسترلىكتە ماسەلە تالقىلانعان سوڭ, كينوپروكات نارىعىنداعى وتاندىق كومپانيالاردا جاعدايدىڭ وڭ شەشىلەتىنىنە سەنىم پايدا بولدى.
ماسەلەن, ەلورداداعى «كەرۋەن» ساۋدا ويىن-ساۋىق ورتالىعىنداعى «Kinopark 7 IMAX Keruen» كينوتەاترىندا 1 ساۋىردەن باستاپ گولليۆۋدتىق ءبىر عانا «موربيۋس» ءفيلمى كورسەتىلىپ جاتىر. ال كەلەسى مامىر ايىندا كينوتەاترل ار تابىسىنىڭ نەگىزىن قۇرايتىن امەريكالىق فيلمد ەر مۇلدە كورسەتىلمەۋى مۇمكىن. سەبەبى كورەرمەندەرگە ۇسىناتىن دايىن كينو جوق
– وتكەن ايدا, 10 ناۋرىزدان باستاپ «مەن – قىزارامىن» اتتى Walt Disney Company شىعارعان ءمۋلتفيلمدى كورسەتۋىمىز كەرەك ەدى. بىراق رەسەيگە سالىنعان سانكتسياعا بايلانىستى بۇل مۋلتفيلم كەلمەدى. سودان سوڭ دابىل قاعۋىما تۋرا كەلدى. دەرەۋ ماسكەۋگە, سونداعى Walt Disney Company جانە Sony كومپانيالارىنىڭ وكىلدەرىنە حابارلاستىم. انتون سەرەنكو, ۆاديم سميرنوۆ دەگەن جىگىتتەرمەن 20 جىلدان بەرى جۇمىس ىستەپ جاتىرمىن. ولار ءوتىنىشىمدى اقش-قا جىبەرۋگە, كومەكتەسۋگە تىرىسۋعا ۋادە بەردى. سودان ناتيجە شىقتى, «موربيۋس» اتتى ءفيلمدى الدىق. Sony كومپانياسىنىڭ فيلمدەرى بويىنشا ماسەلە شەشىلىپ جاتىر, Walt Disney Company-مەن كەلىسسوزدەر ءالى جۇرگىزىلۋدە. «دوكتور سترەنچ» اتتى ءفيلمدى الۋىمىز كەرەك ەدى. بىراق اۋدارما جۇمىستارى قايتادان باستالعان ەكەن. فيلم بىزگە كەلە مە, كەلمەي مە, ءالى بەلگىسىز. باستىسى, ءساۋىر جانە مامىر ايلارىندا كينوتەاترلاردا كورسەتىلەتىن كينولار قورىمىزدا بار. بىزگە بۇل تاراپتا «قازاقفيلم» كينوستۋدياسى, مادەنيەت جانە سپورت مينيسترلىگى, ۇلتتىق كينونى قولداۋ مەملەكەتتىك ورتالىعى كومەكتەسىپ جاتىر. بىراق سودان كەيىن جاعداي قالاي بولاتىنى بەلگىسىز, – دەيدى الماز مالدىباەۆ.
ونىڭ سوزىنشە, گولليۆۋد ستۋديالارىنىڭ شتاب-پاتەرلەرى ماسكەۋدە ورنالاسقان. فيلمدەر سودان قازاقستانعا جانە وزبەكستان, قىرعىزستان سەكىلدى باسقا ەلدەرگە تارالادى. اۋدارما جۇمىستارى دا رەسەيدە جولعا قويىلعان. ورتا ازيا مەملەكەتتەرى دە قازىر سانكتسياعا بايلانىستى امەريكالىق فيلمدەردەن تاپشىلىق كورىپ وتىر.
ۇلتتىق كينونى قولداۋ مەملەكەتتىك ورتالىعى باسقارما توراعاسىنىڭ ورىنباسارى باۋىرجان شۇكەنوۆتىڭ پىكىرىنشە, رەسەيگە سالىنعان سانكتسيالار كەرىسىنشە وتاندىق كينويندۋستريانىڭ دامۋىنا جول اشادى.
– وتاندىق كومپانيالار گولليۆۋد فيلمدەرىنىڭ تەڭ جارتىسىن دۋبلياجداپ ءجۇر. وعان ۇلگەرمەسە, تۇپنۇسقاسىن كورسەتىپ, سۋبتيترمەن بەرۋگە بولادى. قىتاي ەلى تالاي جىلدان بەرى وسىلاي جاساپ ءجۇر. قازىرگى جاعدايدا جاڭا مۇمكىندىكتەردى پايدالانۋعا بولادى. مەملەكەتتىڭ قولداۋىمەن تۇسىرىلگەن جيىرما شاقتى فيلم بار. سونىڭ ءبارى بيىل پروكاتقا شىعۋى كەرەك. ءوزىمىزدىڭ قازاقشا كينولاردى ناسيحاتتايتىن كەز كەلدى, – دەيدى باۋىرجان شۇكەنوۆ.
بۇعان الماز مالدىباەۆتىڭ ايتار ءوز ءۋاجى بار. ونىڭ ايتۋىنشا, دۋبلياج بيۋدجەتى ورتاشا ەسەپپەن 100 مىڭ دوللاردان باستالىپ, 300 مىڭ دوللارعا دەيىن بارادى. قازاقستاندىق ديستريبيۋتەرلەر مۇنى كوتەرە المايدى. ونىڭ ۇستىنە دۋبلياج جۇمىسى جىلدام بىتكەنى ءجون.
– قازاقستاندىقتار اراسىندا قازىر تانىمالدىققا يە نۇرلان قويانباەۆ, نۇرتاس ادامباي, قۇرالاي اناربەكوۆانىڭ فيلمدەرى تابىس اكەلۋى مۇمكىن. بىراق فەستيۆالدەرگە ارناپ تۇسىرىلگەن باسقا قازاقستاندىق كينوتۋىندىلار بىزگە ءتيىمسىز بولادى دەپ ەسەپتەيمىن. سەبەبى بۇل فيلمدەردى كورسەتۋ ارقىلى قىزمەتكەرلەر جالاقىسى, عيماراتتى جالعا الۋ قۇنى, نەسيەلەردى جابۋ سياقتى شىعىندارىمىزدى جابا المايمىز. بىزگە بۇرىن كورسەتىلگەن فيلمدەردى پروكاتقا قايتادان جىبەرۋ, قازاق جانە كەڭەس كينوسىنىڭ كلاسسيكاسىن كورسەتۋ تۋرالى كەڭەستەر ايتىلىپ جاتىر. بىراق بۇل فيلمدەر قولجەتىمدى رەسۋرستا, يۋتۋبتەن كورۋگە بولادى. سوندىقتان بىزگە بۇدان ەشقانداي پايدا جوق. «بولاشاق» قورى قازاق تىلىنە اۋدارعان فيلمدەر وتە از تابىس اكەلەدى. كورەرمەندەردە سۇرانىسقا يە فيلمدەردىڭ 99,9 پايىزى ورىس تىلىندە, قازاق سۋبتيترلارمەن جۇرەدى. ارينە, مەن قازاق تىلىنە قارسى ەمەسپىن. بىراق كورەرمەندەردىڭ كوبىسى فيلمدەردى قازاق تىلىندە كورۋ ءۇشىن ءالى دە ءبىراز ۋاقىت ءوتۋ كەرەك دەپ ەسەپتەيمىن, – دەيدى الماز مالدىباەۆ.
Kinopark-Kinoplexx جەلىسىنىڭ جابىلۋى تۋرالى حابار كينورەجيسسەرلەردى دە الاڭداتتى. اقان ساتاەۆتىڭ قاسىم حان تۋرالى «ۇلى دالا تاڭى» اتتى تاريحي ءفيلمى جۋىردا پروكاتقا شىعۋى ءتيىس. كينورەجيسسەر الماز مالدىباەۆپەن كەزدەسىپ, كينوتۋىندىسىنىڭ كينوتەاتردا كورسەتىلۋى جونىندە كەلىستى.
قازىر گولليۆۋد فيلمدەرىن رەسەي ارقىلى ەمەس, اراداعى دەلدالسىز قازاقستاندا دۋبلياجداۋ ماسەلەسى, كورەي, قىتاي, ءۇندىستاننىڭ كينولارىن ەلىمىزگە اكەلۋ قاراستىرىلىپ جاتىر. مۇنىڭ ناتيجەسىن الداعى ۋاقىت كورسەتەر.
