نەمەسە ۋچاسكەلىك پوليتسەيدىڭ ءبىر كۇنى
قازاقستان پرەزيدەنتى قاسىم-جومارت توقاەۆ ءوزىنىڭ حالىققا ارناعان «جاڭا قازاقستان: جاڭارۋ مەن جاڭعىرۋ جولى» جولداۋىندا قۇقىق قورعاۋ ورگاندارىنا بارىنشا كوڭىل ءبولىپ, ولاردىڭ جۇمىستارىن جەتىلدىرۋ كەرەكتىگى تۋرالى ايتقان ەدى. قازىر وسى باعىتتا ەلىمىزدىڭ ىشكى ىستەر سالاسىندا ناقتى ءىس-جوسپارلار قولعا الىنىپ, «ءتيىمدى ۋچاسكەلىك پوليتسيا ينسپەكتورى» قاناتقاقتى جوباسى جۇزەگە اسىرىلۋدا. ءبىز بۇگىن وسى نەگىزدە اتقارىلىپ جاتقان جۇمىستارعا كۋا بولىپ, نۇر-سۇلتان قالاسى جەرگىلىكتى پوليتسيا قىزمەتىنە قاراستى №11 ۋچاسكەلىك قوسىنىنىڭ ۋچاسكەلىك ينسپەكتورى, پوليتسيا كاپيتانى نۇرالى تاڭىربەرگەنوۆتىڭ ءبىر كۇندە اتقارعان جۇمىسىمەن تانىستىق.
عابيدەن مۇستافين كوشەسى, 3/2 ۇيدە ورنالاسقان پوليتسيانىڭ ۋچاسكەلىك قوسىنىنا كەلگەنىمىزدە تاڭەرتەڭگى جۇمىستىڭ جاڭا قىزىپ جاتقان كەزى ەكەن. نۇرالى كەشە كەشتە WhatsApp-قا كەلىپ تۇسكەن تۇرعىنداردىڭ ارىز-شاعىمدارىمەن تانىسىپ جاتتى.
– مەن كۇندەلىكتى جۇمىسىمدى وسىدان باستايمىن. وزىمە ءتيىستى اۋماقتاعى تۇرعىن ۇيلەردەن قانداي اقپاراتتار ءتۇستى, ولاردىڭ پيك توراعالارى نە ايتادى, وسى ۇيلەردە تۇراتىن بەلسەندى ازاماتتاردان قانداي حابارلامالار ءتۇستى, بارلىعىن ءبىر شولىپ شىعامىن دا, وسىعان وراي, ءبىر كۇندىك جۇمىس جوسپارىمدى جۇيەلەيمىن, – دەيدى ۋچاسكەلىك ينسپەكتور.
بۇل ونىڭ وسى قىزمەتكە كەلگەن سەگىز جىلدان بەرگى كۇندەلىكتى ادەتى ەكەن. قاراعاندى قالاسىنداعى قر ءىىم اكادەمياسىن بىتىرگەننەن كەيىن ەلورداعا جۇمىسقا كەلگەن. ارينە, العاشقى جىلدارى تاجىريبەسى ازداۋ جاس مامانعا حالىقپەن قويان-قولتىق جۇمىس ىستەپ كەتۋ قيىنداۋ بولعانىن ول جاسىرمايدى.
«العاشقى جىلدار ۇيرەنۋ, تاجىريبە جيناۋ جىلدارى بولدى. كۇنىنە 14-15 ساعاتقا دەيىن جۇمىس ىستەيتىنبىز. ءار ءۇيدىڭ ەسىگىن قاعىپ, تۇرعىندارمەن جەكە-جەكە تانىسقان كۇندەرىمىز بولدى. ءسويتىپ ءجۇرىپ قىزمەتتىڭ قىر-سىرىن مەڭگەردىك. ادامدارمەن قارىم-قاتىناستى, جۇمىس ىستەي ءبىلۋدى ۇيرەندىك» دەيدى ول.
تاڭەرتەڭگى ساعات 10:00-دە ۋچاسكەلىك ينسپەكتورمەن بىرگە عابيدەن مۇستافين كوشەسىندەگى 13/1 ۇيگە كەلدىك. وسى ءۇيدىڭ №68 پاتەرىنەن كەشە كەشتە ءتورت جىگىت بالكوندا تەمەكى تارتىپ تۇرىپ, تۇقىلىن سوندىرمەستەن جەرگە لاقتىرعانى جونىندە ءبىر تۇرعىننان شاعىم تۇسكەن بولاتىن. ەسىكتى ايەل ادام اشتى. ۋچاسكەلىك ينسپەكتور بولعان ءمان-جايدى بايانداپ بەردى. ءۇي يەسى كەشە ۇيدە بولماعانىن ايتىپ, وقيعادان حابارى جوق ەكەنىن جەتكىزدى. وسى كەزدە باسقا بولمەدەن 8-9 جاستاعى كىشكەنە قىز جۇگىرىپ شىعىپ «ءيا, مەن كوردىم, كەشە بالكوندا ەرجان اعالار تەمەكى تارتتى» دەپ سايراي جونەلدى. بۇعان پوليتسيا ينسپەكتورى: «بالالى ءۇيدىڭ ۇرلىعى جاتپاس…» دەگەن, مىنە, كىشكەنتەي كومەكشى» دەپ ريزا بولىپ قالدى. سونىمەن, №68 پاتەردەگى ايەل ادامعا تۇسىنىك جۇمىستارىن جۇرگىزىپ, ەندى قايتالانسا, ايىپپۇل تولەيتىنىن قاتاڭ ەسكەرتكەننەن كەيىن كەلىپ تۇسكەن كەلەسى شاعىم بويىنشا №92 پاتەرگە كوتەرىلدىك.
ەسىكتى جيىرمالارداعى جاس جىگىت اشتى. پاتەر جالداپ تۇرادى ەكەن. كورشىلەرى شاعىمدانىپتى. كەيدە تۇندە تىنىشتىقتى بۇزاتىنى بار, ونىڭ ۇستىنە تۇرىپ جاتقان مەكەنجايلارىنا تىركەلمەگەن. بۇرىن دا بىرنەشە رەت ەسكەرتۋلەرگە قۇلاق اسپاعان سوڭ بۇل جىگىتتەرگە ايىپپۇل جازىپ بەرۋگە تۋرا كەلدى.
بىزدە ۋچاسكەلىك پوليتسيا ينسپەكتورىنىڭ مىندەتىنە ءبارى كىرەدى ەكەن. دۇكەنگە بەتپەردە تاعىپ كەلۋدەن باستاپ, الەۋمەتتىك ماڭىزى بار تاۋارلارعا شەكتىك باعانىڭ ساقتالۋىنا دەيىن شاعىم تۇسسە, ۋچاسكەلىك ينسپەكتور باقىلاۋعا الۋى قاجەت.
ال كەيبىر جۇرگىزۋشىلەردىڭ اۆتوكولىكتەرىن جاياۋ جۇرگىنشىلەر جۇرەتىن تروتۋاردىڭ ۇستىنە قويىپ كەتەتىن وقيعالار ءجيى كەزدەسەدى. مىنە, وسى جايلارعا بايلانىستى دا ارىز-شاعىمدار از تۇسپەيتىن كورىنەدى.
ساعات 15:30-دا پوليتسيا ينسپەكتورى راقىمجان قوشقارباەۆ داڭعىلى بويىندا 80/1 ءۇيدىڭ اۋلاسىندا اۆتوكولىگىن ءۇيدىڭ كىرەبەرىسىنە تاقاپ قويىپ كەتكەن ءبىر جۇرگىزۋشىگە ەسكەرتۋ جاساپ, سول ءۇيدىڭ ءبىر تۇرعىنىنىڭ تەلەفونمەن تۇسىرگەن شاعىمىن قاناعاتتاندىردى.
سونداي-اق ول ءوزىنىڭ WhatsApp-ىنا كەلىپ تۇسكەن شاعىمدار بويىنشا دا جۇمىس جۇرگىزە باستادى. بىرنەشە پاتەردى ارالاپ, تۇرعىنداردىڭ جەكە كۋالىكتەگى جسن-ءى ارقىلى قىزمەتتىك پلانشەتپەن سول كىسىنىڭ وسى پاتەردە تىركەۋدە بار-جوعىن تەكسەردى. ماسەلەن, ع.مۇسىرەپوۆ كوشەسىندەگى 19-ءۇيدىڭ تۇرعىنى تىركەۋگە تۇرماعاندىعى انىقتالدى. وعان قر اقبتك-ءنىڭ 492-بابى, 1-بولىگى بويىنشا ەسكەرتۋ بەرىلدى. ەندى بۇل ازامات 10 كۇن ىشىندە تۇرعىلىقتى مەكەنجايى بويىنشا تىركەۋگە تۇرماسا, ايىپپۇل تولەۋگە مىندەتتەلەدى.
پوليتسيا ينسپەكتورى 18:30-دا عابيدەن مۇستافين كوشەسىندە ورنالاسقان تىرەك قوسىنىنا كەلىپ, ءوزىنىڭ WhatsApp-ىنا تۇسكەن حابارلامالارمەن تانىسىپ, كوپتەگەن ساۋالدارعا جاۋاپ بەردى. كەيبىرىن ەرتەڭ بارىپ تەكسەرەتىن بولىپ كەلىستى. شاعىمدار كوبىنە تىنىشتىقتى بۇزۋعا, سوسىن وتباسىنداعى تۇرمىستىق زورلىق-زومبىلىققا بايلانىستى ءتۇسىپ جاتادى ەكەن.
«مەنىڭ قىزمەت اۋماعىمدا 7 ءۇي قامتىلادى. وندا 1366 پاتەر بار. مىنە, وسى پاتەردىڭ كوپتەگەن تۇرعىندارى قازىر مەنى تانيدى. قانداي دا ءبىر ماسەلە تۋىنداسا, تىكەلەي وزىمە قوڭىراۋ شالادى. سوسىن 3-4 بەلسەندى كومەكشىم بار. سولار ماعان قوعامدىق ءتارتىپتى ساقتاۋعا ۇنەمى كومەكتەسىپ وتىرادى» دەيدى نۇرالى ورىنبايۇلى.
سول كۇنى ونىڭ جۇمىسى 23.00 شاماسىندا اياقتالدى. «جۇمىستىڭ بۇلاي ەرتەرەك اياقتالعانىنا قۋانامىز» دەيدى ول. كەيدە ءتۇن ورتاسىنا دەيىن وتىرىپ قالاتىن كەزدەرى بولادى ەكەن.
