سونىمەن, ەلىمىزدەگى پرەزيدەنت سايلاۋى دا ءوز مارەسىنە جەتتى. بۇل جولعى سايلاۋدا 6,5 ملن قازاقستاندىق قاسىم-جومارت توقاەۆتى تاڭدادى. قازىرگى پرەزيدەنت سايلاۋشىلاردىڭ 70,76 پايىز داۋىسىنا يە بولدى. مۇنداي اقپاراتتى كەشە سايلاۋدىڭ الدىن الا قورىتىندىلارىن جاريالاعان ورتالىق سايلاۋ كوميسسياسى تاراتتى.
داۋىس سانى بويىنشا ەكىنشى ورىندا ساياسي دوداعا «ۇلت تاعدىرى» قوزعالىسىنىڭ اتىنان قاتىسقان ءامىرجان قوسانوۆ ورنالاسقان. ول سايلاۋشىلاردىڭ 16,2 پايىز (1472733 ادام) داۋىسىن جيناعان.
ءۇشىنشى ورىندا – 5,2 پايىزبەن (478153 ادام) «اقجولدىق» دانيا ەسپاەۆا, ءتورتىنشى – 3,2 پايىزبەن (294271 ادام) «اۋىلدىق» تولەۋتاي راقىمبەكوۆ, بەسىنشى – 2,7 پايىزبەن (190304 ادام) كاسىپوداقتاردىڭ ۇمىتكەرى امانگەلدى تاسپيحوۆ, التىنشى – 1,82 پايىزبەن (167249 ادام) حالىقشىل-كوممۋنيست جامبىل احمەتبەكوۆ, جەتىنشى ورىندا 0,92 پايىزبەن «ۇلى دالا قىراندارى» قوزعالىسىنىڭ جەتەكشىسى سادىبەك تۇگەل تۇر.
ايتپاقشى, كەشە تۇندە جاريالانعان exit poll-دىڭ دەرەگىندە ءسال ايىرماشىلىق بولعان. «قوعامدىق پىكىر» زەرتتەۋ ينستيتۋتى جۇرگىزگەن ساۋالنامانىڭ ناتيجەسىندە ق.توقاەۆ – 70,13 پايىز, ءا.قوسانوۆ – 15,39 پايىز, دانيا ەسپاەۆا – 5,32 پايىز, جامبىل احمەتبەكوۆ – 3,86 پايىز, تولەۋتاي راقىمبەكوۆ – 3,03 پايىز, امانگەلدى تاسپيحوۆ – 1,41 پايىز, سادىبەك تۇگەل 0,86 پايىز داۋىس جيناعان ەدى.
مەگاپوليستەر اراسىندا ەلوردا كوش باستادى
جەكسەنبىنىڭ تۇنىندە وسك-دا وتكەن قورىتىندى بريفينگتە وسك توراعاسىنىڭ ورىنباسارى كونستانتين پەتروۆ جالپى تىزىمدەگى 11947995 ادامنىڭ 77,4 پايىزى ەلىمىزدەگى 9920 جانە شەتەلدەگى 48 سايلاۋ ۋچاسكەسىنە كەلىپ, ءوز تاڭداۋىن جاساعانىن حابارلادى. سايلاۋ پروتسەسىنە باقىلاۋشى رەتىندە ءارتۇرلى شەتەلدىك ۇيىمدار تاراپىنان 1013 ادام قاتىستى.
ءبىر قۋانارلىعى, رەسپۋبليكالىق ماڭىزى بار ءۇش قالانىڭ ىشىنەن نۇر-سۇلتان كوش باستاپ, سايلاۋشىلاردىڭ 68,9 پايىزى داۋىس بەرگەن. شىمكەنتتىكتەردىڭ 67,6 پايىزى, الماتىلىقتاردىڭ 52,2 پايىزى سايلاۋعا قاتىستى.
وبلىستار بويىنشا ءبولىپ قاراساق, ەرەكشە بەلسەندىلىك تانىتقان الماتى وبلىسىنىڭ تۇرعىندارى ەكەن, وندا سايلاۋشىلاردىڭ 89 پايىزى ازاماتتىق ۇستانىمىن بىلدىرگەن. 84,9 پايىز كورسەتكىشپەن ەكىنشى ورىندا اقتوبە جانە شىعىس قازاقستان وبلىستارى, 84,8 پايىزبەن ءۇشىنشى ورىندا تۇركىستان وبلىسى ورنالاسقان. اقمولا وبلىسىندا سايلاۋشىلاردىڭ 83,4 پايىزى, اتىراۋ وبلىسىندا – 71,2 پايىزى, جامبىل وبلىسىندا – 81,3 پايىزى, باتىس قازاقستان وبلىسىندا – 66,3 پايىزى, قاراعاندى وبلىسىندا – 77,3 پايىزى, قىزىلوردا وبلىسىندا – 81,6 پايىزى, قوستاناي وبلىسىندا – 84,1 پايىزى, ماڭعىستاۋ وبلىسىندا – 68,9 پايىزى, پاۆلودار وبلىسىندا – 81,2 پايىزى, سولتۇستىك قازاقستان وبلىسىندا 79,8 پايىزى داۋىس بەرگەن.
