كەشە ەلورداداعى سايلاۋالدى بەيپارتيالىق باقىلاۋ ورتالىعىندا ورتالىق باسشىلارى مەن قازاقستان حالىق پارتياسىنىڭ وكىلدەرىمەن كەزدەسۋ ءوتتى. كەزدەسۋدە 2021 جىلى 10 قاڭتاردا وتەتىن سايلاۋدىڭ دايىندىق جانە ۇگىت-ناسيحات جۇمىستارىن ءونىمدى ورىستەتۋ ماسەلەلەرى تالقىلاندى.
– الەمدىك تاجىريبەدەن الىپ قاراعاندا, بەيپارتيالىق ۇيىمداردىڭ باقىلاۋىنا ايرىقشا ءمان بەرىلەدى. «تۋرا بيدە تۋعان جوق» دەگەندەي, مۇنداي ۇيىمدار سايلاۋدىڭ زاڭدى تۇردە ءادىل وتۋىنە كەپىلدىك ەتەدى. ءبىزدىڭ ورتالىق تا وسىنداي ماقساتتا قۇرىلدى. سايلاۋدىڭ جالپى بارىسىن باقىلاۋعا ءبىزدىڭ ورتالىق جاعىنان 18 مىڭنان اسا بايقاۋشى جۇمىلدىرىلادى, – دەدى سايلاۋالدى بەيپارتيالىق باقىلاۋ ورتالىعىنىڭ باسشىسى بانۋ نۇرعازيەۆا.
وسىدان كەيىن ءسوز العان قازاقستان حالىق پارتياسىنىڭ وكىلدەرى پارتيانىڭ سايلاۋعا تاس-ءتۇيىن دايىن ەكەنىن ايتا كەلىپ, سايلاۋدىڭ ءادىل ءوتۋى ءۇشىن باقىلاۋشىلىق جۇمىسىنا باسا نازار اۋداراتىنىن جەتكىزدى.
– سايلاۋعا ءبىز دە بايقاۋشىلاردى جىبەرۋگە دايىندالىپ جاتىرمىز. بۇل رەتكى سايلاۋعا ءبىزدىڭ پارتيا اتىنان 113 ۇمىتكەر قاتىسادى. ونىڭ 36 پايىزىن ايەلدەر, 12 پايىزىن 29 جاسقا دەيىنگى جاستار قۇرايدى. ءبىز سايلاۋدا سەنىمدى تۋ ەتەمىز. بىلايشا ايتقاندا, ءبىزدىڭ ماقساتىمىز – حالىقتىڭ قالاۋى بويىنشا جۇمىس ىستەۋ, – دەدى پارتيا حاتشىسى ولجاس سىزدىقوۆ.
ايتا كەتەيىك, ەلورداداعى سايلاۋالدى بەيپارتيالىق باقىلاۋ ورتالىعى بۇعان دەيىن سايلاۋعا قاتىساتىن 5 پارتيانىڭ وكىلدەرىمەن كەزدەسۋ وتكىزىپ, سايلاۋدى اشىق ءارى ءادىل وتكىزۋدىڭ تەتىكتەرىن تالقىلادى. كەزدەسۋگە قاتىسقان پارتيالاردىڭ وكىلدەرى سايلاۋالدى بەيپارتيالىق باقىلاۋ ورتالىعىنىڭ اتقاراتىن قىزمەتىنە وڭ باعاسىن بەرىپ, ورتالىق قىزمەتكەرلەرىنىڭ سايلاۋ كەزىندە ءونىمدى جۇمىس جاسايتىنىنا سەنىم ءبىلدىردى. سونداي-اق ءار پارتيا ءوز تاراپىنان دا باقىلاۋشىلار شىعارىپ, اتالعان ورتالىق قىزمەتكەرلەرىمەن تىزە قوسا جۇمىس ىستەيتىنىن جەتكىزدى.
– حالىقتىڭ بۇل سايلاۋدان كۇتكەنى كوپ. حالىقتىڭ سەنىمىنە سەلكەۋ تۇسىرمەۋ ءۇشىن باقىلاۋشىلار ءوز مىندەتتەرىن ابىرويمەن اتقارادى دەپ سەنەمىن. ويتكەنى بۇل – ەلىمىزدىڭ گۇلدەنىپ-كوركەيۋىنە ساياتىن اسا ماڭىزدى ماسەلە. قازىر بىزدە باقىلاۋشىلاردىڭ 45 پايىزى دايىن, سايلاۋعا دەيىن 100 پايىز دايىن بولامىز, – دەدى پارتيالىق بايقاۋ ۇيلەستىرۋشىسى نۇربولات مۇراتۇلى.