بيىل وزبەك ەلىنىڭ قازاقستان رەسپۋبليكاسىنداعى جىلى بولىپ جاريالاندى. جىل اياسىندا ءبىرشاما شارالار ءوتىپ جاتىر. ولاردىڭ ورتاسىندا ءوزىمىز دە ءجۇرمىز. مەن – قازاقتىڭ وزبەگىمىن. ونى ماقتان تۇتامىن. اتا ءداستۇرىمىزدى جالعاستىرىپ, ءوز دىنىمنەن, دىلىمنەن اجىراماعانىما قۋانامىن. ءتۇپ قازىعىمنىڭ نىق بولۋىنا ءوزىم جاساپ جاتقان قازاق ەلىنىڭ كەڭدىگى, ۇلتتار ساياساتىنىڭ سالتاناتى دەر ەدىم.
وسى ورايدا, قازاقستان حالقى بىرلىگى كۇنىنىڭ قارساڭىندا ءوتكەن كەزەكتى القالى جيىنعا توقتالماي وتە المايمىن. ول – جىل سايىن الداعى جىلدىڭ باعىتىن انىقتاپ بەرەتىن, قازاقستان حالقى اسسامبلەياسىنىڭ سەسسياسى. كەزەكتى ءححVى سەسسيا «بەس الەۋمەتتىك باستاما – قوعامنىڭ الەۋمەتتىك بىرلىگىنىڭ تۇعىرى» تاقىرىبىندا ءوتتى.
مەنىڭ ءوزىم, ەلىمىزدەگى مىزعىماس بىرلىكتىڭ ۇيىتقىسى ءارى تاتۋلىق پەن بىرلىكتىڭ كەپىلىندەي بولعان قازاقستان حالقى اسسامبلەياسىنىڭ ءبىر مۇشەسى رەتىندە وسى جيىندى اسىعا كۇتتىم. ونداعى ايتىلاتىن سەسسيا توراعاسى نۇرسۇلتان ءابىشۇلىنىڭ تۇجىرىمدارى كۇندەلىكتى ىستەپ جۇرگەن شارۋاما دا باسقا كوزبەن قاراپ, ونىڭ تەرەڭ ماعىناسىنا بويلاۋعا جەتەلەيدى. بىزدەردى يگىلىكتى جۇمىستارعا جۇمىلدىرىپ, ءومىردىڭ ءمانىن تابۋعا يتەرمەلەيدى. ەلىمىزدىڭ تۇكپىر-تۇكپىرىنەن كەلىپ, جينالىس مىنبەرىنە جارىسا شىعىپ, ەلباسىعا ارناپ ايتىلعان ءارىپتەستەرىمنىڭ لەبىزدەرى دە كوڭىلدەن شىعىپ جاتتى. سونىڭ ىشىندە استانا قالاسىنىڭ وزبەك ەتنو-مادەني ورتالىعىنىڭ توراعاسى شەرزود پۋلاتوۆتىڭ پرەزيدەنتكە جولداعان قۇرمەتكە تولى العىس سوزىنە تولىقتاي قوسىلامىن. ەل ءۇشىن, وتان ءۇشىن جان اياماي جۇمىس جاساعان ەلباسىعا ءدان ريزاشىلىعىمىز جۇرەگىمىزدىڭ تۇكپىرىنەن شىعادى. بۇل ەلباسىمىزدىڭ باعدارلاماسى بويىنشا العا قويعان نەگىزگى مىندەتتەرىن ورىنداۋعا قۇلشىنا كىرىسۋگە باستايدى.
مىنە, مەن 20 جىل بويى نان ءپىسىرۋ كاسىبىمەن اينالىسىپ كەلەمىن. استانانىڭ ناۋبايىمىن دەسە دە بولادى. جۇمىسىم وزىمە قاتتى ۇنايدى. ءيىسى بۇرقىراعان ىستىق نان ءاربىر جانۇيانىڭ داستارحانىندا بولسا ەكەن دەپ تىلەيمىن. نان بولسا, ءان دە بولادى. مەن باستاعان جۇمىس كاسىبىمنىڭ ەڭبەك ءوتىلى استانا قالاسىنىڭ مەرەيلى جاسىمەن تەڭ ەكەن. قۇرداس دەسەم دە بولادى. كاسىبىم مەن باس قالام كوز الدىمدا ءوسىپ, وركەن جايدى. سودان دا ەلوردانىڭ دامۋىنا مۇددەلى بولىپ, تابىسىمنىڭ ءبىر بولىگىن قايىرىمدىلىق قورىنا بولەمىن. ەگدە تارتقان قارتتارعا, ۇلى وتان سوعىسىنىڭ ارداگەرلەرىنە, قارتتار ۇيىنە, كوپ بالالى وتباسىلارىنا قولىمنىڭ ۇشىن بەرىپ, كومەگىمدى اياماۋعا تىرىسۋدامىن. ءوزىمنىڭ جۇمىسىم ارقىلى قالامىزدىڭ كوركەيۋىنە, دوستىعىمىزدىڭ نىعايا تۇسۋىنە, حالقىمىزدىڭ تىنىشتىعىن قورعاۋعا وسىلايشا اتسالىسۋدامىن.
قازاقستان رەسپۋبليكاسىنداعى وزبەك «دوستىق» ەتنو-مادەني ورتالىعىنىڭ توراعاسىنىڭ ورىنباسارى رەتىندە رەسپۋبليكامىزدا وزبەك مادەنيەتىن ناسيحاتتاۋعا دا ارالاسۋدامىن. ءاربىر مەرەكەگە جايىلعان داستارحاندى وزبەكتىڭ ۇلتتىق تاعامى پالاۋ جانە ءپاتىر نانىمەن تولتىرىپ, ىرىسىن ارتتىرۋ – مەن ءۇشىن ارداقتى ءىس. ءوز باسىم وسىنداي كەشتەر ارقىلى ەكى تۋىسقان ەل تاتۋلىعى نىعايا تۇسەدى دەپ ويلايمىن.
ودان باسقا ۇلت وكىلدەرى مەن قالالىق ەتنومادەني ورتالىقتارىنىڭ توراعالارىمەن وسىنداي مول داستارقان باسىندا دا كەزدەسىپ جاتامىز. وسىنداي وتىرىستا استانا قالاسىنىڭ 20 جىلدىق تويى جانە وزبەك ەلىنىڭ قازاقستان رەسپۋبليكاسىنداعى جىلىنا قاتىستى نە ايتارىمىز بار, نەنى ناسيحاتتاپ, بۇقاراعا نەنى جەتكىزۋىمىز كەرەك دەگەندەي ىشكى ماسەلەلەردى بىرلەسە شەشەمىز. مۇنداي ساتتەردە ويىمىز ءبىر جەردەن شىعىپ, ءبىر-ءبىرىمىزدى ءتۇسىنىپ, ءتىلى مەن دىلىنە, ۇلتى مەن ۇلىسىنا قاراماستان بىرگە تۋعان باۋىرداي سەزىنەمىز. ونىڭ قۇپياسى – دۇنيەدەگى بار بەرەكەنىڭ باستاۋى, جاقسى كۇنىمىزدىڭ بەلگىسى قاسيەتتى ناننىڭ ارقاسىندا دەر ەدىم.
دارا جولدى جازباي تانىپ, بار ىقىلاسىمىزدى بەيبىتشىلىك پەن كەلىسىم جولىنا اۋدارىپ, دۇرىس تاڭداۋ جاساۋعا سەرپىن بەرگەن حالقىمىزدىڭ باسشىسى, ەلباسىعا العىسىمىزدى بىلدىرەمىن.
وسىنداي مامىردىڭ مەرەكەلى ساتتەرىندە قازاقستان رەسپۋبليكاسىنىڭ بايراعى جەلبىرەي بەرسىن دەگىم كەلەدى.
