وتان سوعىسىنىڭ مۇگەدەكتەرىنە ارنالعان ورتالىق كلينيكالىق گوسپيتالدىڭ ۇيىمداستىرۋىمەن پرەزيدەنتتىڭ «رۋحاني جاڭعىرۋ» باعدارلاماسىن ىسكە اسىرۋ اياسىندا استانانىڭ 20 جىلدىعىنا جانە ۇلى جەڭىستىڭ 73 جىلدىعىنا ارنالعان «استانا – بەيبىتشىلىك پەن رۋحاني جاڭعىرۋ ورداسى» اتتى V حالىقارالىق سۋرەتشىلەر بايقاۋى ءوتتى.
سالتاناتتى جيىنعا سوعىس ارداگەرلەرى, قر پارلامەنتى دەپۋتاتتارى, قوعام جانە مەملەكەت قايراتكەرلەرى, رەسەي, بەلارۋس, ۋكراينا ەلدەرىنىڭ قازاقستانداعى ەلشىلىگى, بىرقاتار مينيسترلىكتەردىڭ وكىلدەرى قاتىستى.
– ءبىزدىڭ ورتالىقتا ەمدەلۋگە ۇلى وتان سوعىسىنىڭ ارداگەرلەرى, جاۋىنگەر- ينتەرناتسيوناليستەر, چەرنوبىل اپاتى مەن سەمەي يادرولىق پوليگونىنان زارداپ شەككەن ازاماتتار ەلىمىزدىڭ تۇكپىر-تۇكپىرىنەن كەلەدى. دەنساۋلىقتارىن قالپىنا كەلتىرەدى. سوندىقتان بايقاۋ تاقىرىبىن جان-جاقتى, اۋقىمدى بولۋىن قاراستىردىق, – دەگەن استانا قالاسى وتان سوعىسىنىڭ مۇگەدەكتەرىنە ارنالعان ورتالىق كلينيكالىق گوسپيتالدىڭ ديرەكتورى ءادىلحان ابدۋلين جينالعانداردى وتان قورعاۋشىلار جانە جەڭىس كۇندەرى مەرەكەسىمەن قۇتتىقتادى.
بايقاۋعا ەڭ ۇزدىك 73 ەكسپوزيتسيالىق جۇمىس تاڭداپ الىنعان ەكەن. جۇزدەن جۇيرىك شىققانداردى ەلتاڭبا اۆتورى جانداربەك مالىبەكوۆ باستاعان قازىلار القاسى انىقتاعان. بايقاۋ قورىتىندىسى بويىنشا امانگەلدى دۇيسەمبەكوۆ پەن تولقىن تابىسبەك جانە يزرايلدىك ەلياۋ ەلينا ءىىى ورىندى يەلەنسە, رەسەيلىك ناتاليا شەۆچەنكو مەن ۋكرايندىق ۆاسيلي سكاكاندي ءىى ورىندى, سايلاۋ تەمىربەكوۆ
ءى ورىندى ەنشىلەدى. ال باس جۇلدەنى شىنىباي پىرىمباەۆ قانجىعالادى. جەڭىمپازدار قارجىلاي سىيلىقتارمەن جانە ارنايى سەرتيفيكاتپەن ماراپاتتالدى. ايتا كەتۋ كەرەك, شىنىباي پىرىمباەۆتىڭ تۋىندىسىندا استانانىڭ تەمىرجول ۆوكزالى مەن ەلورداعا ءار ايماقتان قونىس اۋدارۋشىلاردىڭ بەينەسى كورىنىس تاپقان.
– ەلوردادا وتكەن بۇدان باسقا بايقاۋلارعا وسىعان دەيىن استانانىڭ باس ساۋلەتشىسى ءارى اۆتورى – ەلباسى مەن قالا اكىمى بەينەلەنگەن سۋرەتتەرىمدى ۇسىنعان بولاتىنمىن. وسى جولى باس قالاعا كوشىپ كەلىپ جاتقان ەسكى پويىز بەن ءارتۇرلى كوڭىل كۇيدەگى ادامداردىڭ بەينەسى ۇتىمدى شىققان سياقتى, – دەيدى باس جۇلدە يەگەرى تىلشىلەرگە بەرگەن سۇحباتىندا. سالتاناتتى شارا سوڭى ونەر جۇلدىزدارىنىڭ كونتسەرتىنە ۇلاستى.
نۇرداۋلەت كاكىشتەگى
