ەلوردادا قالا اكىمىنىڭ ورىنباسارى باقتيار ماكەننىڭ مەديتسينا ۇيىمدارىنىڭ باسشىلارىمەن كەڭەسى ءوتتى. كەزدەسۋ بارىسىندا ىندەت جايى تالقىلاندى.
كارانتين شارالارى مەن امبۋلاتوريالىق ەمدەۋدى كۇشەيتۋ ناتيجەسىندە ەمحانالاردا ەپيدەميولوگيالىق احۋال جاقسارىپ, پنەۆمونيانىڭ تارالۋ قارقىنىنىڭ تومەندەگەنى بايقالادى.
سونداي-اق كارانتين كەزىندە, ياعني 6 شىلدەدەن باستاپ ستاتسيونارلاردا ەمدەلىپ جاتقان ناۋقاستار سانى 4,4 ەسە ازايىپ, توسەك-ورىن قورىنىڭ جۇكتەمەسى 90 پايىزدان 25 پايىزعا دەيىن تومەندەدى. COVID-19 ينفەكتسياسى راستالىپ, اۋرۋحاناعا جاتقىزىلعاندار سانى 4,3 ەسە ازايدى. پنەۆمونيامەن اۋىراتىن ناۋقاستار سانى بەس ەسە كەمىدى. جەدەل جاردەم شاقىرۋ سانى 3 مىڭنان 1 مىڭعا دەيىن تومەندەدى.
بۇگىندە قالادا 12530 ىندەت جۇقتىرعاندار تىركەلىپ, ونىڭ ىشىندە 9629 ادام (76 پايىز) ەمدەلىپ شىقتى.
كەڭەس قورىتىندىسى بويىنشا قالا اكىمىنىڭ ورىنباسارى باقتيار ماكەن قوعامدىق دەنساۋلىق ساقتاۋ باسقارماسى مەن مەديتسينا مەكەمەلەرىنىڭ باسشىلارىنا ازاماتتار تاراپىنان شاعىم تۋدىرعان ناۋقاستارعا ارنالعان ەلەكتروندى مەديتسينالىق سەرۆيس – DamuMed قوسىمشاسى مونيتورينگىن تۇراقتى نەگىزدە جۇرگىزىپ, ساپالى سەرۆيس ۇسىنۋىن قامتاماسىز ەتۋدى تاپسىردى.
– بۇل ماسەلە DamuMed اقپاراتتىق جۇيەسىنىڭ جەتىلمەگەنى, سونداي-اق كورسەتىلگەن قىزمەت تۋرالى دارىگەرلەردىڭ جازباسىن كەش ەنگىزۋمەن بايلانىستى. نۇر-سۇلتان قالالىق قوعامدىق دەنساۋلىق ساقتاۋ باسقارماسى وسى باعدارلامانىڭ اكىمشىلىگىمەن بىرلەسىپ ءاربىر ناقتى جاعدايعا تالداۋ جۇرگىزەدى. سونىمەن قاتار قازىرگى ۋاقىتتا قارجىلىق پايدا الۋ ماقساتىنداعى جالعان جازبالاردىڭ ناقتى فاكتىلەرى تىركەلگەن جوق, – دەپ حابارلادى قالالىق قوعامدىق دەنساۋلىق ساقتاۋ باسقارماسى.
نايما نۇرالىقىزى
