قالالىق №65 مەكتەپتە مۇمكىندىگى شەكتەۋلى بالالارعا ءبىلىم بەرۋدىڭ وزەكتى ماسەلەلەرى مەن وسى سالاداعى قول جەتكەن وڭ ناتيجەلەردى ناسيحاتتاۋ, مۇگەدەك بالالاردىڭ دۇنيەتانىمىن كەڭەيتۋ تاجىريبەلەرىن تالقىلاعان «قازاقستان رەسپۋبليكاسىندا ينكليۋزيۆتى ءبىلىم بەرۋدى دامىتۋ جولدارى» اتتى رەسپۋبليكالىق كونفەرەنتسيا ءوتتى.
اتالمىش مەكتەپ ينكليۋزيۆتى ءبىلىم بەرۋدى جۇزەگە اسىراتىن, ۇلتتىق تۇزەتۋ پەداگوگيكاسىنىڭ عىلىمي-تاجىريبەلىك ورتالىعى بولىپ ەسەپتەلەدى.
وسى شارا اياسىندا «دارا» قايىرىمدىلىق قورى, قازاقستان رەسپۋبليكاسىنداعى فينليانديا ەلشىلىگى جانە حەيليبەري-استانا مەكتەبىنىڭ قولداۋىمەن جالپى سوماسى 3 ملن تەڭگە تۇراتىن ساڭىراۋ جانە ەستۋ قابىلەتى ناشار بالالارعا ارنالعان قازىرگى زاماندىق قۇرىلعىنى تارتۋ ەتتى. «فم» دەپ اتالاتىن جۇيە ءسوز بەن دىبىستاردى ۇعىنۋدا كەدەرگى شۋدىڭ بولماۋىن قامتاماسىز ەتەدى. وسىنداي وزىق تەحنيكامەن جابدىقتالعان ءتورت بىردەي سىنىپتىڭ اشىلۋى ءبىلىم ساپاسىنا ەلەۋلى ۇلەس قوساتىن بولدى.
– مۇمكىندىگى شەكتەۋلى بالالارعا كوپ جىلدان بەرى قامقورلىق جاساپ كەلەمىز. جاڭا جۇيە بوگدە شۋدى باسىپ, تەك قانا ۇستازدىڭ ءسوزىن كەدەرگىسىز تىڭداۋعا مۇمكىندىك بەرەدى ءارى بالالاردىڭ ەستۋ قابىلەتىن جەتىلدىرەدى.
ءبىزدىڭ ماقساتىمىز – ينكليۋزيۆتى ءبىلىم بەرۋدە ءارتۇرلى تەحنيكالىق كومەكشى قۇرالداردىڭ قاجەتتىلىگىن, ونىڭ تيىمدىلىگىن كورسەتۋ. وزىق قۇرالدارمەن جابدىقتالعان ورتادا بالالار وزدەرىن كەم سەزىنبەيتىن بولادى, – دەيدى «دارا» قايىرىمدىلىق قورىنىڭ ديرەكتورى ءمادينا باكيەۆا.
ايگۇل ۋايسوۆا
