اياجان داۋىتاليەۆا:
بىرىنشىدەن, تەك جاڭا ۇيلەردى الا الاسىز. ال جاڭا ۇيلەر سالىنباي جاتىپ ساتىلىپ كەتەدى. ەكىنشىدەن, ءۇشىنشى پاتەردى الۋ ماقساتىندا ءوتىنىش بىلدىرگەن ازاماتتار باعدارلاما جەڭىلدىكتەرىن پايدالانا المايدى. ۇشىنشىدەن, يپوتەكالىق نەسيەنىڭ ايلىق تولەماقىسى وتباسى تابىسىنىڭ 30 پايىزىنان اسپاۋى ءتيىس. مىسالى, ءسىز ايىنا 57 مىڭ تەڭگەدەن تولەپ وتىرساڭىز, وتباسىڭىزدىڭ ايلىق بيۋدجەتى 190 مىڭ تەڭگەدەن تومەن بولماۋى قاجەت. ءار وتباسى مۇشەسىنىڭ ايلىق تابىسى, بالالارىنا جۇمسالاتىن قاراجاتقا دەيىن ەسەپتەلەدى. تورتىنشىدەن, ازاماتتىڭ جۇمىس ورنىنان رەسمي كىرىسى 6 ايدىڭ ىشىندە ۇزىلمەۋى ءتيىس. ول جەكەمەنشىك كومپانيالاردا جىل سايىن جىلدىڭ سوڭىندا جۇمىستان شىعارىلىپ, قاڭتاردان باستاپ جۇمىسقا قايتا قابىلداناتىن ازاماتتار ءۇشىن قولايسىز. ياعني, نەسيە الا الماي قالادى. بۇل مەن بىلەتىن تۇستارى عانا. قاراپايىم حالىقتىڭ تابىسى بۇل باعدارلامامەن باسپانا الۋعا جەتپەيتىن سياقتى. ال جەتكەندەرى ۇستىنەن بىرنەشە ەسەلەپ تولەيدى, ارينە.
مۇسىركەپ ءالىمجانوۆ:
قازاقستاننىڭ تۇرعىن ءۇي, باسپاناعا قاتىستى قاي باعدارلاماسى بولسا دا, قارا حالىق ءۇشىن قولجەتىمسىز. «7-20-25» تە ورتا قوڭدى قازاقستاندىقتار ءۇشىن عانا ءتيىمدى. 45-150 مىڭ جالاقىسى بار ادامدار جوعارىداعى باعدارلاما بويىنشا باسپانالى بولۋدى ارمانداماسا دا بولادى. ال حالىقتىڭ 60-70 پايىزى – تومەندەگى ساناتتىڭ قاتارىنان. بۇل ماسەلە باتىس ەلدەرىندە باياعىدا شەشىمىن تاپقان.
كوپ ەل كەزىندە حان سارايىنداي داليتىپ قوس قاباتتى, ءۇش قاباتتى ءزاۋلىم ۇيلەردى جىپىرلاتىپ سالىپ, سونىڭ كوبى سودان ەندى وزدەرى قۇتىلا الماي, ءتۇرلى قىزىق-قۋانىشىن وتكىزەتىن جۇرتقا جالداپ ءجۇر. ەگەر دە سالىق تولەۋدىڭ باتىستىق نۇسقاسى ەلىمىزدە جۇزەگە اسسا, مەنشىك يەسى بولۋدان ەل باسىن الىپ قاشاتىن بولادى. بىزدە باي دا, كەدەي دە سالىققا تابىسىنىڭ ون-اق پايىزىن تولەيدى. ەگەر دە, نارىقتى ەرتە يگەرگەن ەلدەر سەكىلدى تاپقان تابىسىنىڭ كولەمىنە سايكەس سالىقتى ءوسىرىپ وتىرسا, كوپ دۇنيە وزگەرەر ەدى. وكىنىشكە قاراي, ءبىزدىڭ بيلىك ونداي قادامعا بارمايدى-اۋ. ويتكەنى زاڭ شىعاراتىن سەنات پەن ماجىلىستە وتىرعاندار مەن بيلىكتەگىلەردىڭ دەنى – قالتالىلار.
