ەلورداداعى كاسىپتىك-تەحنيكالىق كوللەدجدە «World Skills Kazakhstan» اتتى حالىقارالىق بايقاۋدىڭ قالالىق كەزەڭى ءوتتى. وندا كونديتەر, رەستوراتور, اسپاز, شاشتاراز, ديزاينەر, دانەكەرلەۋشى سەكىلدى ماماندىقتار بويىنشا ءبىلىم الىپ جۇرگەن ستۋدەنتتەر مەن جاس ماماندار باسەكەگە ءتۇسىپ, كاسىبي شەبەرلىكتەرىن پاش ەتتى.
– بۇل بايگەنى ەكىنشى رەت وتكىزىپ وتىرمىز. جارىس الەمنىڭ 70-تەن استام مەملەكەتىندە ۇيىمداستىرىلادى. دەمەك, سىزدەر دە وسىناۋ دۇنيەجۇزىلىك قوزعالىستىڭ ءبىر بولشەگىسىزدەر. «World Skills» – اقپارات, تاجىريبە جانە جاڭالىق الماسۋدىڭ ءتيىمدى الاڭى. سوندىقتان اتالعان سايىس جۇمىس بەرۋشىلەر ءۇشىن ءوز سالاسىنىڭ بولاشاق مايتالماندارىمەن تانىسۋدىڭ تاماشا مۇمكىندىگىنە اينالعان, – دەپ «كاسىپقور» حولدينگى ءتورايىمىنىڭ مىندەتىن اتقارۋشى ايجان احمەتوۆا جيىنعا جينالعاندارعا ساتتىلىك تىلەدى.
كونكۋرستىق باعدارلاما اياسىندا شاشتارازدار مودەلدەردىڭ شاشتارىن قيىپ, سوڭعى ۇلگىدە ساندەدى. ديزاينەرلەر پيدجاك ءپىشىپ, كوزدىڭ جاۋىن الاتىن كويلەكتەر تىكتى. ال جاس اسپازدار ءۇش ءتۇرلى تاعام ازىرلەپ, ساراپشىلاردىڭ باعالاۋىنا ۇسىندى. شەتكەرىرەك تۇرعان اققۇبا جىگىتتى اڭگىمەگە تارتقانبىز. ءوزىن باۋىرجان اۋساق دەپ تانىستىرعان ستۋدەنت ەكونوميكا, تەحنولوگيا جانە تاعام ءوندىرىسىن ستاندارتتاۋ كوللەدجىندە وقيدى ەكەن. «بۇگىن بىرىنشىگە – بوتقا, ەكىنشىگە – تاۋىقتىڭ ءتوسىن دايىندادىم. تىسكەباسار رەتىندە ىرىمشىكتەن جاسالعان دەسەرت ءپىسىردىم. ەكسپەريمەنتتەردى ۇناتامىن, بۇل قابىلەت مەنىڭ ماماندىعىما اۋاداي قاجەت قوي» دەپ ونەرلى ورەن اعىنان جارىلدى.
ەكى كۇنگە سوزىلعان چەمپيونات سوڭىندا كەيىپكەرىمىز «ۇزدىك اسپاز» اتاندى. ال ەڭ ءدامدى كونديتەرلىك ءونىمدى كاسىپتىك-تەحنيكالىق كوللەدجدىڭ ستۋدەنتى ازامات سابىرقۇلوۆ دايارلادى. «مەيرامحانا سەرۆيسى» ساناتىندا قوعامدىق تاماقتانۋ جانە سەرۆيس كوللەدجىنىڭ شاكىرتى ولجاس ءجۇسىپنازار توپ جاردى. بۇدان بولەك, «قۇرعاق قۇرىلىس جانە سىلاۋ جۇمىستارى» بىلىكتىلىگى بويىنشا پوليتەحنيكالىق كوللەدجدىڭ وكىلدەرى ءامىرجان قىزداربەكوۆ پەن كونستانتين نوۆيكوۆ, دانەكەرلەۋشىلەر اراسىندا «تۇران-پروفي» كوللەدجىنىڭ ستۋدەنتى الماس ماتاەۆ, بالاباقشا تاربيەشىلەرى ىشىنەن گۋمانيتارلىق كوللەدج ستۋدەنتى الميرا تۇياقوۆا جەڭىسكە جەتتى. سونداي-اق, پوليتەحنيكالىق كوللەدجدىڭ ستۋدەنتتەرى ۆلاديسلاۆ شلاگەر جەلىلىك جانە جۇيەلىك اكىمشىلەندىرۋ سالاسىندا جەڭىمپاز بولىپ تانىلسا, يۋري اپرەتوۆ «دارىندى ۆەب-باعدارلاماشى» اتالىمىن يەلەندى. مەنەدجمەنت جانە بيزنەس كوللەدجىنىڭ ستۋدەنتى زارينا نۋرحاليەۆا شاشتارازدىق قىرىمەن كوزگە تۇسسە, وسى كوللەدجدىڭ تاعى ءبىر شاكىرتى گۇلميرا رۋزماتوۆا «تالانتتى مودەلەر» جۇلدەسىن قانجىعاعا بايلادى.
ەندى ولار مامىردىڭ 1-ءى مەن 5-ءى ارالىعىندا بولاتىن رەسپۋبليكالىق بايقاۋعا قاتىسادى. ۇلتتىق ىرىكتەۋدەن سۇرىنبەگەن جەڭىمپازدار مينسك پەن ماسكەۋدە وتەتىن «World Skills تمد» كونكۋرسىنا جولداما الادى. وندا توپ جارعاندار كەلەر جىلى ءابۋ-دابيدە ۇيىمداستىرىلاتىن حالىقارالىق چەمپيوناتتا باق سىنايدى.
بوتاگوز ماراتقىزى
ماتەريالدى “استانا اقشامى” گازەتىنىڭ astana-akshamy.kz رەسمي سايتىنا سىلتەمە جاساعاندا عانا پايدالانۋعا رۇقسات ەتىلەدى.
