ەلوردادا «1000 ورىن – كوشە ساۋداسى» جوباسى اياسىندا كاسىپكەرلەر ءوز ءىسىن باستاۋ ءۇشىن زور مۇمكىندىكتەرگە يە بولىپ وتىر. ءوز ءىسىن تابىستى جۇزەگە اسىرعانداردىڭ اراسىندا كوپبالالى انالار دا بار.
ءجاميلا ناۋرىزباەۆا – بەس بالانى جالعىز تاربيەلەپ وتىرعان انا. ول «1000 ورىن – كوشە ساۋداسى» باعدارلاماسىنا 2016 جىلدان قاتىسىپ كەلەدى. كاسىپكەر ايەل كوكونىستەر مەن جەمىستەردى ساتۋعا ارنالعان نىساندى ورنالاستىرۋ ءۇشىن ارنايى كوميسسيانىڭ شەشىمىمەن جەر ۋچاسكەسىن العان بولاتىن.
اتالمىش ساۋدا ورنى كوپبالالى اناعا ءوز ءىسىن دامىتۋعا كومەكتەستى. ءوز ءىسىن ءبىر ساۋدا ورنى ارقىلى تابىستى جۇرگىزگەن ءجاميلا ناۋرىزباەۆا 2018 جىلى باعدارلاما بويىنشا تاعى دا ءبىر جەر ۋچاسكەسىن الۋ ءۇشىن ءتيىستى قۇجاتتار تاپسىرىپتى. بۇگىنگى تاڭدا كاسىپكەر ساۋدانى ەكى نۇكتەدە جۇرگىزىپ كەلەدى. وسىلايشا ول ءوز وتباسىن اسىراپ وتىر.
«Astana» اكك» اق ءباسپاسوز قىزمەتىنىڭ ءمالىمەتىنە سۇيەنسەك, «1000 ورىن – كوشە ساۋداسى» باعدارلاماسى بويىنشا كورپوراتسيا جىل سايىن 15 جەر ۋچاسكەسىن بولەدى. اتالمىش جەر ۋچاسكەلەرى استانا قالاسىنىڭ وڭىرلىك كاسىپكەرلەر پالاتاسىنىڭ ۇسىنىمى بويىنشا حالىقتىڭ الەۋمەتتىك جاعىنان وسال توپتارىنىڭ قاتارىنا كىرەتىن كاسىپكەرلىك سۋبەكتىلەر اراسىندا ۇلەستىرىلەدى.
ەلوردانىڭ كاسىپكەرلەر پالاتاسى ءوز تاراپىنان «Astana» اكك» اق اتىنا «1000 ورىن – كوشە ساۋداسى» باعدارلاماسىنا قوسىمشا جەر ۋچاسكەلەرىن قوسۋ جونىندەگى باستاماسىن كوتەردى. بۇدان كەيىن اتالمىش جەر ۋچاسكەلەرى كۆوتا بويىنشا كاسىپكەرلىك سۋبەكتىلەرى اراسىندا ۇلەستىرىلۋى ءتيىس.
استانانىڭ كاسىپكەرلەر پالاتاسى بەكىتەتىن ىشكى ءتارتىپ شەڭبەرىندە جەر ۋچاسكەسىن كۆوتا بويىنشا العىسى كەلەتىن ۇمىتكەرلەردى ىرىكتەۋدى ءوز بەتىنشە وتكىزىپ, تاڭدالعان ۇسىنىمدى «Astana» اكك» اق-قا جولدايدى. قوعام ءوز كەزەگىندە جەر تەلىمىن قوسالقى جالعا الۋ كەلىسىمشارتىن بەكىتۋ جونىندە شەشىم شىعارادى.
