قابىلداۋعا كەلگەن سەگىز بالانىڭ اناسى ءوز قيىندىقتارىن ورتاعا سالدى
استانا قالاسى اكىمىنىڭ ينۆەستيتسيالىق جانە يننوۆاتسيالىق دامۋ, كاسىپكەرلىك, ونەركاسىپ, اۋىل شارۋاشىلىعى جانە تۋريزم سالاسى جونىندەگى ورىنباسارى ماليكا بەكتۇروۆا «نۇر وتان» پارتياسىنىڭ قالالىق فيليالىندا ازاماتتاردى قابىلدادى.
جيىنعا اۋدان اكىمدەرىنىڭ ورىنباسارلارى, بىرقاتار باسقارما مەن كومپانيا باسشىلارى, سالا ماماندارى قاتىستى. قالا باسشىسى ورىنباسارىنىڭ قابىلداۋىنا سان الۋان سۇراقپەن كەلگەن تۇرعىندار ءتۇرلى ماسەلەلەرىن ءسوز ەتىپ, جەكەلەگەن ءوتىنىش-تىلەكتەرىن دە ايتتى. ولاردىڭ ءبىرى جەرگىلىكتى بيلىكتەن جوعىن تۇگەندەۋدى وتىنسە, ەندى ءبىرى كاسىبىن جانداندىرۋعا قولداۋ سۇرادى. مىسالى, اسفالت پەن تاسجولدارعا, تروتۋارعا ەش زاقىم كەلتىرمەيتىن, كەز كەلگەن ادامنىڭ قولدانۋىنا ىڭعايلى مۇز ويۋعا ارنالعان يننوۆاتسيالىق قۇرال ويلاپ تاپقان كونسترۋكتورلىق كومپانيا باسشىسى ءمادينا جانىبەكوۆا وسى وتاندىق ءونىمدى كوپشىلىكتىڭ پايدالانۋى ءۇشىن كەڭىرەك ناسيحاتتاۋ جاعىنان جەرگىلىكتى بيلىكتىڭ قولداۋى قاجەت ەكەنىن ايتتى.
ءوز كەزەگىندە اينۇر قىدىرباەۆا مەكەمەلەرگە جوندەۋ جۇمىستارىن جۇرگىزەتىن توپتىڭ جۇمىسىن ۇيىمداستىرىپ جۇرگەنىن ايتا كەلىپ, ويىنداعى يدەيالارىن جۇزەگە اسىرىپ, كاسىبىن ءارى قاراي دوڭگەلەتۋ ءۇشىن ۇلكەن سومادا كەپىلسىز نەسيە الۋعا اكىمدىكتەن قانداي كومەك بولاتىنىن سۇرادى. الايدا بانكتەردىڭ ىشكى جۇمىسىنا ەشبىر قۇزىرلى ورگاننىڭ ارالاسۋعا قۇقىعى جوق ەكەنىن, سوندىقتان بيزنەس باستاۋ ءۇشىن ۇلكەن سوماداعى كەپىلسىز نەسيەنىڭ بولمايتىنىن ايتقان ماليكا بەكتۇروۆا اينۇر قىدىرباەۆاعا كاسىپكەرلەر اراسىندا وتكىزىلەتىن قايتارىمسىز تەگىن گرانتتىڭ كونكۋرسىنا قاتىسۋدى ۇسىندى. وعان قاتىسۋ ءۇشىن قانداي قۇجاتتىڭ قاي ۋاقىتقا دەيىن قايدا تاپسىرىلۋى قاجەت ەكەنىن جيىنعا قاتىسىپ وتىرعان قۇزىرلى مەكەمەلەردىڭ ماماندارىمەن كەڭەستى. جالپى, قالا اكىمى ورىنباسارىنىڭ قابىلداۋىندا بولعان بارلىق استانالىق ءوزىنىڭ ماسەلەسىنە قاتىستى جاۋاپتى مامانمەن جەكەلەي سويلەسۋگە مۇمكىندىك الىپ, تەلەفون نومىرلەرىمەن الماستى.
الدىنا كەلگەن ءار ادامنىڭ بازىناسىن تىڭداعان ماليكا بەكتۇروۆا ءتيىستى مەكەمە باسشىلارىنا بىرقاتار تاپسىرما بەردى. ماسەلەن, عاليا تىلەۋوۆا ەسىمدى قاريا مۇمكىندىگى شەكتەۋلى جاندار مەن كوپبالالى جانە الەۋمەتتىك جاعىنان از قامتىلعان وتباسىلارعا قولداۋ كورسەتەتىن ورتالىق اشقىسى كەلەتىنىن, سوعان عيمارات قاجەت ەكەنىن ايتسا, سماق ماۋلەتقاري ەسىمدى زەينەتكەر مۋزىكا مەكتەبىن اشۋ ءۇشىن قاجەتتى نىساندى ساتىپ الۋعا بانكتەردىڭ نەسيە بەرمەگەنىن جەتكىزدى. سول سياقتى اۋتيزممەن اۋىراتىن بالالاردىڭ ماسەلەسىمەن اينالىساتىن قور وكىلدەرى مەن اۋلا كلۋبتارىن دامىتۋدى قولعا الۋعا نيەتتى تۇرعىندار دا وزدەرىنىڭ ۇسىنىستارىن ءبىلدىردى. عاليا تىلەۋوۆانىڭ ماسەلەسىن سارىارقا اۋداندىق اكىمدىگىنە جۇكتەگەن قالا اكىمىنىڭ ورىنباسارى سماق ماۋلەتقاريعا قوسىمشا ءبىلىم بەرۋ ۇيىمىن اشۋدىڭ زاڭدىلىقتارىن تىڭعىلىقتى تۇردە ءتۇسىندىرىپ ءوتتى. ال 8 بالانىڭ اناسى نۇرگۇل قادىرباەۆا جەرگىلىكتى بيلىك وكىلدەرىنىڭ الدىندا كوز جاسىنا ەرىك بەردى.
– ماليكا ەرلانقىزى, ءسىزدى انا رەتىندە مەنىڭ جاعدايىمدى جاقسى ءتۇسىنەدى دەپ ويلايمىن. ءبىز قازىر 8 بالامەن ءۇيسىز-كۇيسىز ءجۇرمىز. جۇبايىمنىڭ كوپ جۇمىسقا دەنساۋلىعى جارامسىز. ءوزى كۇزەتشى بولىپ ەڭبەك ەتەدى. جالاقىسى – 70 مىڭ تەڭگە. مەن باستاۋىش سىنىپ مۇعالىمىمىن. بىراق قازىر بالالارىما قاراپ, جۇمىسسىز وتىرمىن. ولاردىڭ الدى ستۋدەنت بولسا, كەنجەمىز – 3 جارىم جاستا. كىشكەنتايىمىز قازىر سىرقاتتانىپ قالدى. الايدا وعان ءدارى الاتىن اقشامىز جوق. بالالارعا 15 مىڭ تەڭگە عانا جاردەماقى الامىز. قارنىمىز اشسا مەشىتكە بارامىز. قازىر تۇركىستان كوشەسىندەگى پاتەرلەردىڭ ءبىرىن ۋاقىتشا پانالاپ وتىرمىز. مەشىت قىزمەتكەرلەرى بىرنەشە كۇنگە پاتەر جالداپ بەرگەن بولاتىن. ءارى-بەرى كوشىپ-قونىپ ءجۇرمىز. ابدەن قينالىپ كەتتىك. بىزگە كومەك بەرۋلەرىڭىزدى سۇرايمىز, – دەدى ول.
كوپبالالى انانىڭ مۇڭىن تىڭداعان ماليكا بەكتۇروۆا ونىڭ بارلىق ءوتىنىش-تىلەگىن ءتيىستى ورگاندارعا جەتكىزەتىنىن ايتا كەلىپ, جيىنعا قاتىسىپ وتىرعان مەكەمە باسشىلارىنا, ەسىل اۋداندىق اكىمدىگىنە بۇل وتباسىعا قاجەتىنشە كومەك بەرۋدى تاپسىردى.
