ەلوردا حالقىنىڭ ۇشتەن ءبىر بولىگى قوعامدىق كولىك قىزمەتىنە جۇگىنەدى. وسى جايت ەسكەرىلىپ, وتكەن شىلدە ايىنىڭ اياعىندا استانا قالاسى جولاۋشىلار كولىگى جانە اۆتوموبيل جولدارى باسقارماسى مەن قالالىق ءىىد اكىمشىلىك پوليتسيا باسقارماسىنىڭ قولداۋىمەن «Bus Lane» جوباسى ىسكە قوسىلدى. حالىقتى كەرەك جەرىنە جەدەل ءارى قاۋىپسىز جاعدايدا جەتكىزۋ ماقساتىن كوزدەگەن اتالمىش جوبا اياسىندا شاھار جولدارىندا قوعامدىق كولىككە ارنالعان جولاقتار سالىندى.
ازىرگە مۇنداي جولاقتاردى باۋىرجان مومىشۇلى (ابىلاي حان داڭعىلىنان باستاپ سارايشىق كوشەسىنە دەيىنگى ارالىق, ۇزىندىعى – 2,84 كم) جانە بوگەنباي باتىر ء(ۋاليحانوۆ كوشەسىنەن سارىارقا كوشەسىنە دەيىنگى جول بولىگى, ۇزىندىعى – 2,15 كم) داڭعىلدارى بويىمەن جۇرەتىن اۆتوبۋستار پايدالانۋدا. بىراق, جىل اياعىنا دەيىن ولاردىڭ سانىن ارتتىرۋ جوسپارلانعان. «استانا LRT» جشس ءباسپاسوز قىزمەتىنىڭ حابارلاۋىنشا, جىل اياقتالعانشا وسىنداي جولاقتار سول جاعالاۋدا سالىنادى. وڭ جاعالاۋعا قاراعاندا سول جاعالاۋداعى جولدار كەڭدەۋ كەلەتىندىكتەن باسىمدىق وسىعان بەرىلىپ وتىر.
«Bus Lane» جوباسىنىڭ ارتىقشىلىقتارىن ءسوز ەتسەك, ول قوعامدىق كولىكتىڭ قوزعالىس كەستەسىن رەتتەپ, كەستەدەن اۋىتقۋ جاعدايلارىن تومەندەتەدى جانە جولداعى قاۋىپسىزدىكتى كۇشەيتەدى. سونداي-اق, اۆتوبۋستاردىڭ ورتاشا جىلدامدىعىن 20 پايىزعا ارتتىرادى. قاراپايىم تىلمەن ايتساق, قوعامدىق كولىك جۇرگىزۋشىلەرى بۇل جوبا ارقىلى تارتىپكە ۇيرەنەدى. جولاقتار سالىنعان جولداردا ءبىرى ەكىنشىسىمەن جارىسپاي, جولاۋشىلاردىڭ جانە وزدەرىنىڭ ومىرىنە جاۋاپكەرشىلىكتى سەزىنە باستايدى.
ايتا كەتەر جايت, كولىك ماماندارىنىڭ بىلىكتىلىگىن ارتتىرۋ ورتالىعىندا اۆتوبۋس جۇرگىزۋشىلەرى ءۇشىن «Bus Lane» جوباسى بويىنشا قوسىمشا ساعاتتار قوسىلعان. جوبانىڭ قىر-سىرىمەن ولار سول جەردە تانىسۋدا.
بۇل جوبا ىسكە قوسىلعان ۋاقىتتان بەرى ەكى اپتا ءوتتى. العاشقى كەزەڭدە جۇرگىزۋشىلەر بۇعان ۇيرەنسىن دەگەن نيەتپەن اۆتوبۋس جولاعىنا كىرىپ كەتكەن وزگە كولىك تۇرلەرىنىڭ يەلەرى ەشقانداي جاۋاپكەرشىلىككە تارتىلمادى. 11 تامىزدان باستاپ قانا ارنايى جولاقتار تولىققاندى جۇمىس رەجيمىنە ەندى. ياعني, سول كۇننەن باستاپ جولاققا كىرگەندەر ايىپپۇل تولەيدى. ايىپپۇل كولەمى 5 ايلىق ەسەپتىك كورسەتكىشكە تەڭ نەمەسە 9910 تەڭگە. قالالىق ءىىد اكىمشىلىك پوليتسيا باسقارماسىنىڭ اعا ينسپەكتورى باقىتجان التىباەۆتىڭ ايتۋىنشا, ەكىنشى مارتە سايكەس ەرەجەنى بۇزعاندار ءۇشىن ايىپپۇل ەكى ەسەگە كوبەيەدى. ءبىر ەسكەرتەر جايت, ارناۋلى ورگانداردىڭ كولىكتەرىنە دابىل قوسىپ اتالعان جولاقتارمەن جۇرۋگە رۇقسات ەتىلەدى. سونداي-اق, وزگە كولىك يەلەرىنە جولاۋشىلاردى مىنگىزىپ, ءتۇسىرۋ ءۇشىن دە بۇل جولاقتارعا كىرۋگە بولادى.
قازىرگى تاڭدا اعىمداعى جىلدىڭ سوڭىنا دەيىن قوسىمشا جولاقتاردى سالۋ ماسەلەسى شەشىلۋدە. ناقتىراق ايتساق, ولاردى ورنالاستىرۋ جەرى بويىنشا سايكەس سىزبالار جاسالۋدا.
امانعالي قالجانوۆ
