استاناداعى ۇلتتىق اكادەميالىق كىتاپحانادا اسا كورنەكتى جازۋشى, مەملەكەت جانە قوعام قايراتكەرى, قازاقستاننىڭ ەڭبەك ەرى ءابىش كەكىلبايۇلى اتىنداعى جاڭا وقۋ زالى اشىلدى. سالتاناتتى جيىنعا قر پارلامەنت سەناتىنىڭ توراعاسى قاسىم-جومارت توقاەۆ باستاعان لاۋازىمدى تۇلعالار, زيالى قاۋىم جانە سۋرەتكەردىڭ كىندىك قانى تامعان ماڭعىستاۋ وبلىسىنان كەلگەن دەلەگاتسيا وكىلدەرى قاتىستى.
ايتۋلى شارادا العاشقى ءسوز كەزەگىن العان قاسىم-جومارت توقاەۆ ۇلت رۋحانياتىنا ولشەۋسىز ۇلەس قوسقان تۇلعانىڭ ەسىمى شىن مانىندە ەڭ جوعارعى قۇرمەتكە لايىق ەكەندىگىن ايتتى.
– ءبىز بۇگىن ەرەكشە ءىس-شاراعا جينالىپ وتىرمىز. حالقىمىزدىڭ ماڭدايىنا بىتكەن زاڭعار جازۋشىسى, مەملەكەت جانە قوعام قايراتكەرى ءابىش كەكىلبايۇلى اتىنداعى جاڭا وقۋ زالى اشىلىپ وتىر. بۇل – ءابىش اعامىزدىڭ الداعى 80 جىلدىق مەرەيتويى قارساڭىندا ونىڭ ەسىمىن ۇلىقتاۋ جولىنداعى العاشقى قادامداردىڭ ءبىرى. سوندىقتان وسىنداي يگى باستامانىڭ عۇمىرى ۇزاق بولارى داۋسىز. ءبىرتۋار تۇلعانىڭ قايتالانباس قولتاڭباسى قازاق ادەبيەتىنىڭ عانا ەمەس, الەم ادەبيەتىنىڭ قازىناسىنا اينالدى. اسىل ءسوز زەرگەرىنىڭ شىعارماشىلىعى بويىنشا تەرەڭ زەرتتەۋلەر جۇرگىزۋ – كەلەشەك بۋىن عالىمدارىنىڭ الدىنداعى ماڭىزدى مىندەت بولۋى ءتيىس. سەبەبى كەمەل سۋرەتكەردىڭ ادەبي الەمى شەكسىز دۇنيە. ايگىلى جازۋشى تەك ادەبيەتتانۋشى, تاريحشى, ويشىل, فيلوسوف قانا بولعان جوق, سونىمەن بىرگە, ول ەلىمىزدىڭ دامۋىنا ەلەۋلى ەڭبەك سىڭىرگەن قايراتكەر بولدى. بۇل ۇلى جازۋشىلاردىڭ اراسىندا وتە سيرەك كەزدەسەتىن قۇبىلىس, – دەدى سەنات توراعاسى.
سودان كەيىن ارداقتى ازاماتپەن جاقىن سىيلاسقان بەلگىلى عالىم مىرزاتاي جولداسبەكوۆ پەن پارلامەنت ءماجىلىسىنىڭ دەپۋتاتى قۋانىش سۇلتانوۆ ءوز ەستەلىكتەرىمەن ءبولىستى.
جازۋشى اتىنداعى جاڭا وقۋ زالى كوركەمسوز زەرگەرىنىڭ كوزى تىرىسىندەگى جۇمىس كابينەتىنىڭ نۇسقاسىمەن جاسالعان. وعان قالامگەردىڭ ءوزى تۇتىنعان دۇنيەلەرى قويىلعان. ۇلتتىق كىتاپحاناعا ەرەن تۇلعانىڭ جەتى مىڭعا جۋىق باسىلىمدارى تاپسىرىلعان. دالىرەك ايتقاندا, ونىڭ ىشىندە 5 883 دانا كىتاپ, CD جانە DVD ديسكىلەرىندەگى بەينەفيلمدەر مەن اۋديوكىتاپتار, 134 دانا جانە 2 بيبليوگرافيالىق بروشيۋرالار بار. قازىرگى ۋاقىتتا وقىرمانداردىڭ سۇرانىسىنا بايلانىستى سۋرەتكەردىڭ «اڭىزدىڭ اقىرى» اتتى رومانى فرانتسۋز جانە قىتاي تىلدەرىنە اۋدارىلىپ جاتقان كورىنەدى.
سونداي-اق ءىس-شارا بارىسىندا قابىرعالى قالامگەردىڭ ءومىرىنىڭ سوڭىنا دەيىن ون جىل تۇرعان ەلورداداعى دوستىق كوشەسىندەگى «نۇرسايا-1» تۇرعىن ءۇي كەشەنىنىڭ قابىرعاسىنا ەسكەرتكىش تاقتا قويىلدى.
بۇل جەردە اكادەميك كەنجەعالي ساعاديەۆ جاقىن دوسى تۋرالى تەبىرەنىپ سويلەدى. «ءابىشتىڭ ەكىنشى ءومىرى جان-جاقتى باستالىپ كەلە جاتىر. بۇل تولاستاماۋ كەرەك. ونىڭ ەڭبەگى ءبىزدى ماڭگىلىكپەن جالعاستىرادى. بۇگىنگى ەسكەرتكىش تاقتا اشىلىپ وتىرعان ۇيدە كلارا ەكەۋى پەرزەنتتەرىمەن بىرگە جاقسى ءومىر وتكىزدى. وسى ۇيدەن ءبىز دە ءدام تاتتىق. ول ءبىر جادىمىزدان ەشقاشان شىقپايتىن كەرەمەت كۇندەر ەدى. ءابىش وسى ۇيدە تاماشا تۋىندىلارىن جازىپ, مەملەكەتتىك قايراتكەرلىك قىزمەتتى كەمەڭگەرلىكپەن اتقاردى» دەسە, تولەن ابدىكۇلى: «ابەكەڭ دۇنيەدەن وزعالى ءبىراز ۋاقىت ءوتتى. سابىرعا كەلىپ, سالقىندايتىن كەز دە بولدى. بىراق سالقىنداۋ مۇمكىن ەمەس. ءالى كۇنگە دەيىن ابەكەڭنىڭ مىنەزى, ءجۇرىسى, بولمىسى كوڭىلىمىزدە ءتىرى تۇرعانداي كورىنەدى. ەلدىڭ اتىن ۇلىلار شىعارادى. سوندىقتان ۇلىلاردى تانىپ, ۇلىقتاي ءبىلۋىمىز قاجەت. قويىلعان ەسكەرتكىش تاقتا – ابەكەڭنىڭ اتىن شىعارۋ ءۇشىن ەمەس, ونىڭ ارتىندا ەلى بار دەگەن ءوزىمىزدىڭ اتىمىزدى شىعارۋ ءۇشىن كەرەك. ابەكەڭ دەگەن ول – مول مۇرا. ونى بىزدەن كەيىن دە تالاي ۇرپاق اڭگىمە قىلادى. وندا دا تاۋسىلماۋى مۇمكىن. ول قاشاندا ءوز حالقىمەن عانا ەمەس, ادامزاتپەن بىرگە جاساي بەرەدى. ويتكەنى ادەبيەتتەگى كلاسسيكالىق شىعارما بارلىق ادام بالاسىنا ورتاق. ءابىشتانۋ دەپ اتالاتىن ۇلى شەرۋدىڭ باسى ەندى باستالدى. ەندى بۇدان ءارى ول جالعاسا بەرمەك» دەدى پاراساتتى پروزاشى.
شارا سوڭىندا جازۋشىنىڭ زايىبى كلارا جۇمابايقىزى جينالعاندارعا: «ءابىش ارۋاقىتتا مەن قازاقپىن دەگەن ادامنىڭ تىلەگىن تىلەگەن ازامات. ونىڭ ەسىمى ەشقاشان ۇمىتىلمايدى دەپ ويلايمىن. وسى جۇمىستاردى ۇيىمداستىرۋعا ۇيىتقى بولعان بارلىق ازاماتقا العىسىمدى ايتامىن» دەپ ريزاشىلىعىن ءبىلدىردى.
