قازاقستان رەسپۋبليكاسىنىڭ ۇلتتىق مۋزەيىندە «ۇلتتىق مۋزەيگە سىي-تارتۋ» اكتسياسىنىڭ ءۇش جىلدىق قورىتىندىسىنا ارنالعان كورمە اشىلدى. ءىس-شارانىڭ اشىلۋىندا ءان ءدۇلدۇلى امىرە قاشاۋباەۆتىڭ 1925 جىلى پاريجدە جەڭىپ العان كۇمىس مەدالى سالتاناتتى جاعدايدا مۋزەي قورىنا تاپسىرىلدى.
امىرەنىڭ بۇل ناگراداسىن رەجيسسەر دجۋليا عاني ساتىپ الىپ, وسىدان ەكى جىل بۇرىن تۇڭعىش رەت قالىڭ جۇرتشىلىقتىڭ نازارىنا ۇسىندى. كەيىننەن «امىرە» ءفيلمىنىڭ باس پروديۋسەرى اليدار وتەمۇراتوۆتىڭ قولىنا تاپسىرعان. ال ۇلتتىق مۋزەي ديرەكتورىنىڭ ورىنباسارى اباي ساتۋبالدينگە مەدالدى فيلمدە امىرە بەينەسىن سومداعان سانجار ماديەۆ تابىستادى.
«1925 جىلى كۇمىس مەدالدىڭ 40 داناسى عانا جاسالدى. امىرەمەن قاتار كەڭەس دەلەگاتسياسىنان وسىنداي مەدالدى ۆلاديمير ماياكوۆسكي, سەرگەي ەيزەنشتەين سەكىلدى بەلگىلى ادامدار يەلەندى. وزگە مەدالداردىڭ تاعدىرى بەلگىسىز. بىراق جەكە كوللەكتسيالارعا الىنعانى ايتىلۋدا. قازىر عالامتوردا كوشىرمەلەرى قاپتادى. الايدا لوندون مەن موناكودان تابىلعان ەكى-اق تۇپنۇسقاسى انىق. ونىڭ ءبىرى امىرەنىڭ وسى مەدالى» دەگەن اكتەر مەدالمەن قاتار «امىرە» ءفيلمى ءۇشىن ارنايى جاسالعان قوس دومبىرا مەن «ەكسپو-1925» تۋرالى سول كەزدەگى ماتەريالدار شىققان گازەتتى مۋزەيگە سىيلادى.
«ۇلتتىق مۋزەيگە سىي تارتۋ» شاراسى 2015 جىلعى 18 ناۋرىزدان بەرى ءداستۇرلى تۇردە ۇيىمداستىرىلىپ كەلەدى. وسى ۋاقىتقا دەيىن اتالمىش جيىن استانا, الماتى, قىزىلوردا, شىمكەنت, اقتوبە, قوستاناي, ورال, پەتروپاۆل, تاراز, تالدىقورعان قالالارىندا وتكىزىلدى. ءۇش جىل ىشىندە اكتسياعا 300-دەن اسا ادام قاتىسىپ, مۋزەي قورىنا 3000-نان استام اسا قۇندى جادىگەر قابىلداندى.
سول جادىگەرلەردىڭ ءبىر پاراسى قويىلعان كورمەگە قازاقستاننىڭ ەڭبەك سىڭىرگەن ونەر قايراتكەرى, ايتىسكەر اقىن نادەجدا لۋشنيكوۆا, مەملەكەت جانە قوعام قايراتكەرى دىنمۇحامەد قوناەۆتىڭ جيەنى جاننەتا سەرىكباەۆا, قازاق بەينەلەۋ ونەرىنىڭ نەگىزىن سالۋشىلاردىڭ ءبىرى, ايگىلى سۋرەتشى ءابىلحان قاستەەۆتىڭ شوبەرەسى ايسانىم قاستەەۆا, ت.ب. بەلگىلى ادامداردىڭ ۇرپاقتارى مەن جاقىندارى قاتىستى. ۇلتتىق مۋزەي باسشىلىعى اكتسياعا ۇلەس قوسقان ازاماتتارعا ەستەلىك سىيلىقتار تاپسىرىپ, العىس حاتپەن ماراپاتتادى.
