كەشە نان قالدىعىن جينايتىن كۇبىدەگى ناندى الىپ, «كەپتەر جەسىن» دەپ جولعا شاشىپ جاتقان زامانداسىمدى كورىپ تاڭعالدىم.
سوڭعى كەزدەرى ناننان مال ازىعىن دايىنداپ, جەم جاسايتىن ازاماتتار قالاداعى قوقىس جاشىكتەرىنىڭ قاسىنا ارناۋلى نان قالدىعىن جينايتىن كۇبىلەر قويعان ەدى. كاسىپكەر رۋسلان ۋبەنيازوۆتىڭ ايتۋىنشا, قازىرگە دەيىن قالانىڭ 40 پايىز اۋماعىنا 1500 كونتەينەر قويعان. بىراق قوقىستى سۇرىپتاپ تاستاۋ مادەنيەتىن قالىپتاستىرماعان قالا تۇرعىندارى نان جينايتىن كونتەينەرلەرگە باسقا تۇرمىستىق قالدىقتى سالىپ كەتەتىنىن ايتىپ نالىعانى بار ەدى.
قازىر تۇرعىن ءۇي كەشەندەرىندەگى قوقىس جينايتىن ورىنداردىڭ ماڭىندا قىپ-قىزىل نان شاشىلىپ جاتاتىنى وتىرىك ەمەس. سەبەبى تۇرعىندار «وبال بولماسىن, ودان دا كەپتەر جەسىن» دەپ نان قالدىعىن قوقىس كونتەينەرىنىڭ ماڭىنداعى ادام باسپايتىن جەرگە قويادى. بىراق قاتقان ناندى ءارى شۇقىپ, بەرى شۇقىپ جەي الماعان قۇستار سوڭىندا بۇكىل ناندى شاشىپ تىنادى دا, قوقىس جيناۋ الاڭىنىڭ ماڭى قىپ-قىزىل نان بوپ جاتادى. نان جينايتىن كونتەينەرلەر قويىلعالى بۇل جاعداي وزگەرەتىن شىعار دەپ ۇمىتتەنىپ ەدىك, وزگەرگەن تۇگى دە جوق, ەسەسىنە نان جينايتىن كونتەينەرگە تاستالعان ناندى كەپتەرگە شاشىپ «مەيىرىمدىلىك» تانىتاتىن جاندار كوبەيدى.
ناننان مال ازىعىن دايىنداۋ الەمدىك تاجىريبەدە بار بولعانىمەن, بۇل سالا ءبىزدىڭ قازاقستاندا مۇلدە ەسكەرىلمەگەن. تۇرعىنداردىڭ قوقىستى سۇرىپتاپ تاستاۋ مادەنيەتى وتە تومەن بولعاندىقتان, قوقىسقا تاستالعان ناندى سۇرىپتاپ الۋ دا وتە قيىن. ونىڭ ۇستىنە ەلىمىزدە نان قالدىعىن وڭدەيتىن بىردە-ءبىر زاۋىت جوق ەدى. وعان قوسىمشا قاراجات تا قاراستىرىلماعان. مىنە, وسى جاعدايدى وزگەرتىپ, نان قالدىعىن كەرەككە جاراتۋ قۋانا قولداۋ كورسەتەتىن باستاما ەدى. الايدا تۇرعىنداردىڭ كوبى مۇنى تۇسىنبەيتىن سەكىلدى. وبال بولىپ, اياقتىڭ استىندا جاتقان ناندى جيناعاننىڭ ورنىنا شاشىپ, نان جينايتىن كونتەينەرگە باسقا تۇرمىس قالدىعىن اپارىپ تاستاي سالۋ مادەنيەتسىزدىكتەن باسقا تۇك تە ەمەس. ناندى ىسىراپ قىلۋعا, ونى اياقپەن باسۋعا اسىل دىنىمىزدە دە قاتاڭ شەكتەۋ قويعان. «قالامىز تازا بولۋى ءۇشىن قوقىستى سۇرىپتاپ شىعارىڭىزدار» دەگەن ناسيحاتتىڭ ءجۇرىپ جاتقانىنا دا از بولعان جوق. بىراق سونى ەسكەرىپ, تۇرمىستىق قالدىقتى سۇرىپتاپ, بەلگىلەنگەن كونتەينەرلەرگە تاستاپ جاتقان تۇرعىندار دا نەكەن-ساياق. وسىنىڭ وزىنەن قالا تۇرعىندارىنىڭ مادەنيەت ورەسى بايقالىپ تۇرعان جوق پا؟!
