تاۋلىكتە قانشا سۋ ءىشۋ قاجەت؟
ادام دەنساۋلىعى ءۇشىن سۋدىڭ الاتىن ورنى ەرەكشە. تىرشىلىك كوزى ادام اعزاسىنا تەك پايدا اكەلەدى. ەگەر اعزاڭىزدا سۋ تاپشىلىعى بولماسا, ءوزىڭىزدى قۋناق اتتاي سەزىنەسىز. سونىمەن, ادام تاۋلىگىنە قانشا سۋ ءىشۋ قاجەت؟
بىلىكتى عالىمدار كۇن سايىن ەرلەرگە 3 ليتر, ايەلدەرگە 2,2 ليتر سۋ ءىشۋ كەرەك ەكەندىگىن ايتادى. الايدا بۇعان تازا گازدالماعان سۋ عانا ەمەس, وزگە دە سۋسىندار كىرەدى. ورتاشا العاندا كۇنىنە 240 ميلليگرامنان 8 ستاقان سۋ ءىشۋ قاجەت. ەسكەرە جۇرەتىن ءبىر جايت بار. ەگەر جۇرەگىڭىز بەن بۇيرەگىڭىز اۋىرعان جاعدايدا سۋ ءىشۋدى ازايتقان دۇرىس. كەرىسىنشە, ءىش ءوتۋ كەزىندە سۋدى كوبىرەك ىشكەن ءجون. جاي قيمىل-قوزعالىستىڭ ءوزى اعزاداعى سۋدى تەر ارقىلى شىعارىپ جىبەرەدى. سوندىقتان ونىڭ ورنىن تولتىرۋ ءۇشىن كۇنىنە سۋدىڭ كولەمىن 1,5-2,5 پورتسياعا كوبەيتۋ كەرەك.
كەدەي بولعىڭىز كەلمەسە
ادامدى كەدەيلىككە الىپ كەلەتىن توعىز ادەتتى قاپەرىڭىزدەن شىعارماڭىز. ولار: 1. ءوزىن-ءوزى اياۋشىلىق. 2.ساراڭدىق. 3.ۇناتپايتىن ىسپەن شۇعىلدانۋ. 4.جۇمىس ناتيجەسىن تەك اقشامەن ولشەۋ. 5. اقشانى بوسقا شاشۋ. 6. ءاپ-ساتتە پايدا كورۋ. 7.شاعىمدانۋ. 8.ءوزىن باسقالارمەن سالىستىرۋ. 9. بايلىقتى اقشامەن تەڭەستىرۋ.
تۇزدى تالعاپ تۇتىنىڭىز
ءبىز كوبىنەسە ادام دەنساۋلىعىنا تيگىزەتىن كەرى اسەرى كوپ دەپ الكوگولدى ىشىمدىكتەر, تەمەكى, گازدى سۋسىندار جانە قۋىرىلعان ەتتى ايتامىز. بىراق شامادان ارتىق تۇز بۇلاردان دا وتە زيان. دۇنيە جۇزىلىك دەنساۋلىق ساقتاۋ ۇيىمى الەمدە كەڭ ەتەك الىپ بارا جاتقان جۇقپالى ەمەس اۋرۋلاردىڭ تەمەكىدەن كەيىنگى سەبەپشىسى ءارى قاۋىپتىسى – تۇز دەپ مالىمدەدى.
قازىر تۇزدىڭ تاۋلىكتىك تۇتىنىلۋى ورتا ەسەپپەن 8 گرامعا كوتەرىلگەن. ول تەز ازىرلەنەتىن تاعامداردىڭ اسەرىنەن كوبەيگەن. وسىدان ەلۋ جىل بۇرىن جاپونيادا تۇز مولشەرى كۇنىنە 18 گرامعا دەيىن قولدانىلعان. سونىڭ كەسىرىنەن سال اۋرۋىنا شالدىققاندار سانى ارتقان. كەيىن ۇكىمەت تۇزدى تۇتىنۋدىڭ كولەمىن ازايتىپ, ونىڭ تاۋلىكتىك مولشەرىن 4 گرامعا ءتۇسىردى. ناتيجەسىندە, سال اۋرۋىمەن اۋىراتىندار 80 پايىزعا ازايعان. ال تۇزدى قولدانۋدى 2 گرامعا تومەندەتكەن 4 جىل ىشىندە جۇرەك دەرتىنە شالدىققاندار 25 پايىزعا كەمىگەن.
