– مەنىڭ ومىرىمدە ەلباسىمىز نۇرسۇلتان ابىشۇلىمەن وتكەن كەزدەسۋلەر ەرەكشە ەستە قالدى. ۇلكەن بەلەستەردى باعىندىرىپ, ەلىمىز ءۇشىن ايانباي ەڭبەك ەتۋگە جىگەر بەردى.
العاش رەت ماعان قازاقستان رەسپۋبليكاسىنىڭ تۇڭعىش پرەزيدەنتىن كورۋ باقىتى قازاقستان حالقى اسسامبلەياسىنىڭ 2009 جىلى وتكەن «ۇلتتىق بىرلىك – ءبىزدىڭ ستراتەگيالىق تاڭداۋىمىز» اتتى 15-سەسسياسىندا بۇيىردى. ول كەزدە مەن ەلوردالىق وزبەك ەتنومادەني ورتالىعى توراعاسىنىڭ ورىنباسارى لاۋازىمىندا قىزمەت ەتىپ ءجۇردىم. سەسسيانىڭ بارلىق قاتىسۋشىلارى سەكىلدى قازاقستان پرەزيدەنتىن وسىنداي جوعارى دەڭگەيدەگى ءىس-شارادا كورىپ, ءتالىمى مەن كەڭەستەرىن تىڭداپ, ءوزىمدى قازاقستان حالقىنىڭ بىرلىگى مەن كەلىسىمىنىڭ قاجەتتى قۇرامداس بولىگى رەتىندە سەزىندىم.
سەسسيا سوڭىندا تۇڭعىش پرەزيدەنتتىڭ ءسوزىن تىڭداي وتىرىپ, زور شابىت الىپ, ىنتالاندىم. ءدال سول كەزدە مەن ەلدەگى بەيبىتشىلىك, كەلىسىم جانە تۇراقتىلىق ساياساتىن ىسكە اسىرۋعا جان-جاقتى ءوز ۇلەسىمدى قوسىپ, كومەك كورسەتۋىم كەرەك دەپ شەشىم قابىلدادىم. مەنىڭ الدىمدا تۇرعان ەڭ ءبىرىنشى مىندەت ەلوردالىق وزبەك ەتنومادەني ورتالىعىنىڭ قىزمەتىن جاقسارتىپ, ونى ءتيىستى دەڭگەيگە جەتكىزۋ بولدى.
بۇدان كەيىن دە ەلباسىمەن قازاقستان حالقى اسسامبلەياسىنىڭ وكىلدەرى قاتىسقان ءتۇرلى الاڭداردا, ناۋرىز مەرەكەسى, قازاقستان حالقىنىڭ بىرلىگى كۇنى, سونداي-اق قحا-نىڭ جىل سايىنعى سەسسيالارىندا بىرنەشە رەت كەزدەسۋ بۇيىردى.
2014 جىلى قازاقستان حالقىنىڭ بىرلىگى كۇنىن تويلاۋ كەزىندە ەلوردا اكىمدىگى سالعان ەتنواۋىلدا ەتنوستىق عيمارات ۇيلەرى الدىندا داستارحانىمىزدى جايىپ, تۇڭعىش پرەزيدەنتتى قارسى الدىق. نۇرسۇلتان ءابىشۇلى بىزگە جاقىنداعاندا, قوشەمەت كورسەتىپ, اقساقالدارىمىز ونىڭ دانا ساياساتى ءۇشىن ۇلكەن العىستارىن ءبىلدىردى. ەلباسىمىزعا التىن جىپپەن كەستەلەنگەن حان شاپانىن سىيعا تارتۋدى جانە شىعىس بيلەۋشىلەرىنىڭ (سالليا) باس كيىمىن تاپسىرۋدى ءوتىندى. ۇلكەندەردىڭ بۇل ريزاشىلىعىنا ەلباسى قاتتى قۋاندى. بىزگە العىسىن ءبىلدىرىپ: «ال ەندى مەن سۇلتانعا ۇقسادىم با؟» دەپ ازىلمەن جاۋاپ بەردى.
ءداستۇر بويىنشا ەلورداداعى بارلىق ۇلكەن ءىس-شارالار وزبەك پالاۋىنسىز وتپەيدى. ۇلكەن قازانداردا وسى ۇلتتىق تاعامدى دايىنداپ, ەلوردا تۇرعىندارى مەن قوناقتارىنا ءدام ۇسىنامىز. 2014 جىلى بىرلىك كۇنىن تويلاۋ كەزىندە تاعى دا پالاۋ دايىندادىق. ءبىزدىڭ اۋىلىمىزعا تۇڭعىش پرەزيدەنت كەلىپ, ۇستەلدىڭ ورتاسىندا تۇرعان وزبەك شەلپەگى مەن پالاۋىنىڭ ءدامىن تاتقاننان كەيىن ورتالىعىمىزعا كەلۋشىلەر سانى كۇرت ارتتى. ەلباسى كەلگەندە ءبىز ازداپ ابدىراپ, اسقا قاجەتتى قۇرالداردى ۇسىنا باستادىق, بىراق ول: «ءبىزدىڭ اتا-بابالارىمىز ارقاشان قولىمەن تاماقتانعان جانە سول داستۇرلەردى ۇمىتپاۋىمىز كەرەك» دەپ, ءوز قولىمەن وزبەك شەلپەگىن سىندىرىپ, ءبىزدىڭ پالاۋىمىزدىڭ ءدامىن تاتتى. ءبىز ءۇشىن بۇل ءسات ءومىر بويى جادىمىزدا قالدى.
ماعان ەلباسىمەن ءتۇرلى ءىس-شارالاردا, سونىڭ ىشىندە ءدىني سيپاتتاعى كەزدەسۋلەردە جولىعۋعا مۇمكىندىك بەرگەن تاعدىر ءۇشىن اللاعا شەكسىز العىس ايتامىن. نۇرسۇلتان ءابىشۇلى جىل سايىن قاسيەتتى رامازان ايىندا ورازا ۇستاعان جانداردى اۋىزاشارعا شاقىرادى.
وسى جولداعى ەتكەن ەڭبەگىم مەن وتانعا دەگەن سۇيىسپەنشىلىگىم نازاردان تىس قالعان جوق. 2019 جىلدان باستاپ مەن نۇرسۇلتان ءابىشۇلىنىڭ اسسامبلەياداعى قوعامدىق ورىنباسارى لاۋازىمىندا ءوز ۇلەسىمدى قوسىپ كەلەمىن. ەلىمىزدەگى بەيبىتشىلىك پەن كەلىسىم يدەياسىن جۇزەگە اسىرۋدا ۇلكەن كۇش-جىگەرىمدى جۇمساپ, كومەگىمنىڭ ءتيىپ جۇرگەنىنە قۋانىشتىمىن. مەن ءۇشىن ەلباسىمەن سەرىكتەس, جولداس جانە پىكىرلەس بولۋ – ۇلكەن ابىروي جانە جاۋاپكەرشىلىك. ويتكەنى ول كىسىنىڭ بارلىق ويلارى مەن تىلەكتەرى ارقاشان حالىق پەن ەل قامقورلىعىنا باعىتتالعان. ەلباسىنىڭ سوزىنەن حالقىمىزدىڭ بولاشاعىنا شىنايى الاڭداۋشىلىق پەن نيەتتەستىك ارقاشان بايقالادى.
نۇرسۇلتان ءابىشۇلى قازاقستاننىڭ بارلىق ەتنوستارىن ءبىر شاڭىراق استىنا بىرىكتىرۋدە كوپ جۇمىس اتقاردى. سونىڭ ارقاسىندا ءبىز تاتۋ, ىنتىماقتاستىقتا ءومىر سۇرۋدەمىز. ءبىزدىڭ ەندىگى مىندەتىمىز – بەيبىتشىلىك پەن كەلىسىمدى ۇزاعىنان ساقتاۋ ءۇشىن قولىمىزدان كەلگەننىڭ ءبارىن جاساۋ. بۇل – ءداستۇردى بولاشاق ۇرپاققا تابىستاۋ.
شەرزود پۋلاتوۆ,
قازاقستان حالقى اسسامبلەياسى مۇشەسى,
نۇر-سۇلتان قالاسى وزبەك
ەتنومادەني ورتالىعىنىڭ توراعاسى
