كىم ۇتتى, كىم ۇتىلدى؟
قازىرگە دەيىن قولدا بار مالىمەتتەرگە سۇيەنسەك, ەلىمىزدەگى ۇبت-نىڭ 6-كۇنىنىڭ ناتيجەلەرى مىناداي: تۇلەكتەردىڭ 96 پايىزى تەست تاپسىرىپ ءۇلگەردى. شەكتىك 50 بالدى تالاپكەرلەردىڭ 85 پايىزى جينادى. ال كەشەگى كۇنگە دەيىن وقۋشىلاردىڭ 15 پايىزى سىننان وتە العان جوق.
بۇعان دەيىن اپەللياتسيالىق كوميسسياعا 566 ءوتىنىش كەلىپ تۇسكەن بولاتىن. وزدەرىڭىز بىلەتىندەي, ەلوردادا ۇبت تاپسىرۋ بارلىق پۋنكتتە توقتادى. ەسكە سالا كەتەيىك, استانا مەكتەپتەرىندە 6229 وقۋشى مەكتەپ ءبىتىردى. ونىڭ ىشىندە 301 ءبىلىمپاز «التىن بەلگىنى» دالەلدەدى. ال ۇزدىك اتتەستاتتى 373 بالا قولىنا ۇستادى. قالا بويىنشا ەڭ كوپ «التىن بەلگى» العان مەكتەپتەر – №48 – 14, №1 – 13, №54 – 11, №66 جانە №75 ءبىلىم وشاقتارى. اتالعان ءبىلىم ورداسىندا التىن يەگەرلەر سانى كەمىندە 10-عا جۋىقتايدى.
ۇلتتىق تەستىلەۋ ورتالىعى سايتىنداعى ناتيجەگە سۇيەنسەك, ۇبت-عا قاتىسۋعا ءوتىنىش بەرگەندەردىڭ ىشىنەن 88583 مەكتەپ ءبىتىرۋشى تەستىلەۋگە قاتىستى. اۋديتوريادا ءتارتىپ ساقتاۋ ەرەجەسىن بۇزعانى جانە تىيىم سالىنعان زاتتاردى قولدانعانى ءۇشىن 12 مەكتەپ ءبىتىرۋشىنىڭ تەست ناتيجەلەرى جويىلعان. ۇلتتىق تەستىلەۋگە بارلىعى 4932 جالپى ورتا ءبىلىم بەرۋ ۇيىمدارى قاتىستى. تەستىلەۋگە قاتىسۋعا ءوتىنىش بەرگەن مەكتەپ بىتىرۋشىلەردىڭ سانىنان ۇبت-عا قاتىسۋ ۇلەسى جاعىنان مىنا ايماقتار جوعارى بولدى: جامبىل وبلىسى – 99,33 پايىز, ماڭعىستاۋ وبلىسى – 98,49 پايىز جانە وڭتۇستىك قازاقستان وبلىسى – 98,41 پايىز. تومەن كورسەتكىشتەر سولتۇستىك قازاقستاندا – 90,73 پايىز, الماتى قالاسىندا – 88,21 پايىز جانە قوستاناي وبلىسىندا 87,62 پايىز مولشەردە بايقالدى. ازىرگە قازاقستان بويىنشا ۇبت-نىڭ ورتاشا بالل ناتيجەسى بەس ءپان بويىنشا 80,5 بالدى (مۇمكىن بولعان 140 بالدان), ەكى ءپان بويىنشا (شىعارماشىلىق ەمتيحان تاپسىرعاندار) 30,9 بالدى (مۇمكىن بولعان 40 بالدان) ايقىندادى. شەكتىك دەڭگەيدەن 74520 ادام (84,12 پايىز تەستكە قاتىسۋشىلاردىڭ جالپى سانىنا شاققاندا) ءوتتى.
ۇلتتىق تەستىلەۋ ورتالىعىنىڭ ديرەكتورى رامازان الىمقۇلوۆتىڭ ايتۋىنشا, العاشقى ءۇش كۇندە استانالىق ءۇش وقۋشى اعىلشىن تىلىندە سىناق تاپسىرىپ, ولار كورسەتكەن ءبىلىمنىڭ ورتاشا دەڭگەيى 83 پايىزدى كورسەتتى.
ءبىر ايتا كەتەرلىگى, بيىلعى ۇبت فورماتىندا دا, وتكىزىلۋىندە, شەكتىك بالدا دا وزگەرىس جوق. تەك تەست تاپسىرمالارىنا فۋنكتسيونالدى تەستەر ەنگىزىلدى. ويتكەنى بۇعان دەيىن تەك جىلدار حرونيكاسى مەن ساقىرلاعان تسيفرلار فاكتىسىن ەمەس, وقۋشىنىڭ قورىتىندى (اناليز) جاساپ ۇيرەنۋىنە باعىتتالعان تاپسىرمالارعا باسىمدىق بەرىلدى. رامازان سىيقىمۇلىنىڭ ايتۋىنشا, بيىل بازالىق سۇراقتار 50 پايىزعا جاڭارعان.
ۇبت وتكىزۋ فورماتىنداعى سوڭعى وزگەرىستەرگە سايكەس, لايىقتى كورسەتكىش كورسەتە الماعان تۇلەكتەر دە بيىل وقۋعا تۇسە الادى. مۇنى ۇبت باستالماي تۇرىپ تىلشىلەرمەن ءوتكىزگەن بريفينگتە ءبىلىم جانە عىلىم مينيسترلىگى وكىلى اسحات ايماعامبەتوۆ ايتقان ەدى. «بيىل تالاپكەرگە تامىزدا ءمۇمكىندىك بەرىلەدى. ودان وتە الماسا, سوڭعى مۇمكىندىگىن قاڭتاردا قايتالايدى. بىراق بۇل سىناقتى ۇمىتكەر اقىلى تۇردە, ياعني 2242 تەڭگە كولەمىندەگى قاراجاتقا تاپسىرادى. ەگەر ۇبت-نىڭ ءۇش مۇمكىندىگىنەن دە شەكتىك ناتيجە جيناي الماسا, وندا وقۋعا تۇسە المايدى» دەگەن ەدى ۆيتسە-مينيستر.
بۇرىندارى ۇبت كەزىندە ۇيىمداستىرۋشىلار تۇلەكتەردى تەكسەرەمىز دەپ اسىرەلەي ايتقاندا «شەشىندىرۋگە» دەيىن بارعانى ايتىلدى. بيىلعى ون بەسىنشى ۇلتتىق سىن دا تۇلەكتەر ءۇشىن تىنىش بولعان سياقتى.
ەلىمىزدە ۇبت-نىڭ التى كۇنىندە تۇلەكتەردىڭ 96 پايىزى تەستكە كىرگەنىن جوعارىدا ايتتىق. بۇل جەردە سىناق استانا بويىنشا اياقتالعانىمەن, باسقا وڭىرلەردە ءالى جالعاسىپ جاتقانىن ەسكە سالعان ءجون. ال رەسپۋبليكا بويىنشا تەست تاپسىرۋشىلاردىڭ جالپى سانى – 92827 تۇلەك. ونىڭ ىشىندە 69209 – قازاق تىلىندە جانە 23618 – ورىس تىلىندە.