ەلورداداعى كينوتەاترلار تەكسەرىلدى. سانيتارلىق-ەپيدەميولوگيالىق باقىلاۋ باسقارماسى «حان-شاتىر» جانە «كەرۋەن» ساۋدا ويىن-ساۋىق ورتالىقتارىنداعى كينوتەاترلارعا باس سۇعىپ, سانيتارلىق تالاپتاردىڭ قانشالىقتى ساقتالاتىنىن انىقتادى.
«جالپى, ناتيجەلەر قاناعاتتانارلىق. اراقاشىقتىق بەلگىلەرىن جاڭارتۋ, سونداي-اق كينوتەاترلاردان شىققان كەزدە الەۋمەتتىك اراقاشىقتىقتى ساقتاۋ تۋرالى بىرقاتار ەسكەرتپەلەر ايتىلدى. وسى ەسكەرتۋلەردى تۇزەتكەننەن كەيىن كينوتەاترلار ءوز جۇمىسىن جالعاستىرا الادى» دەدى نۇر-سۇلتان قالاسىنىڭ ينۆەستيتسيالار جانە كاسىپكەرلىكتى دامىتۋ باسقارماسىنىڭ ساۋدا جانە سەرۆيستىك قىزمەتتى دامىتۋ ءبولىمىنىڭ باسشىسى رۋسلان ىدىرىسوۆ.
ەلورداداعى كينوتەاترلار 26 جەلتوقساننان باستاپ جۇمىسىن قايتا باستادى. ورىندار سانىن 30 پايىزدان اسىرماي, كورەرمەندەردى ەكى ورىن سايىن جانە قاتار بويىنشا شاحمات تارتىبىمەن وتىرعىزۋ ارقىلى كۇشەيتىلگەن سانيتارلىق-ەپيدەميولوگيالىق تالاپتاردى ساقتاي وتىرىپ جۇمىس ىستەۋدە. جۇمىس, دەمالىس جانە مەرەكە كۇندەرىندەگى جۇمىس ۋاقىتى – 10:00-دەن 24:00-گە دەيىن, اكتسيالار وتكىزىلمەيدى. كارانتين جانە شەكتەۋ شارالارىن بۇزۋ فاكتىلەرى انىقتالعان جاعدايدا كينوتەاترلاردىڭ جۇمىسى توقتاتىلادى.